អន្តរជាតិ
សេដ្ឋី Jack Ma ប្រាប់ ត្រាំ៖«គ្មានអ្នកណាលួចការងារអ្នកឯងទេ, នេះវាមកពីអ្នកចំណាយលើសង្គ្រាមច្រើនពេក» ![](https://image.thmeythmey.com/pictures/2017/01/20/trump-jackma.jpg)
×![]()
ស្ថាបនិកក្រុមហ៊ុន Alibaba លោក Jack Ma បានព្រលះ ប្រធានាធិបតីជាប់ឆ្នោត ដូណាល់ ត្រាំ មួយទំហឹង ដោយលោកបញ្ជាក់ថា សេដ្ឋកិច្ចអាមេរិកប្រឈមបញ្ហា មិនមែនមកពីសកលភាវូបនីយកម្ម និង គ្មានអ្នកណាលួចការងារប្រជាជនអាមេរិកឡើយ។ គ្រប់យ៉ាងវាបណ្តាលមកពីអាមេរិកខ្លួនឯងចំណាយលុយច្រើនពេកលើសង្គ្រាមនិងយោធា មិនសូវគិតប្រជាជនខ្លួនឯង។
«គ្មានពីណាគេលួចការងារអ្នកឯងទេ, វាមកពីអ្នកចំណាយលុយច្រើនពេកលើយោធានិងធ្វើ សង្គ្រាម»។ នេះជាការលើកឡើងរបស់មហាសេដ្ឋីចិនដ៏ល្បីឈ្មោះលោក Jack Ma ដែលទំនងជាឆ្លើយតបប្រធានាធិបតីថ្មីអាមេរិក ដូណាល់ ត្រាំ ក្នុងពេលលោកជជែកពិភាក្សាក្នុងវេទិកាសេដ្ឋកិច្ចពិភពលោកនៅ Davos សប្តាហ៍នេះ។
មហាសេដ្ឋីចិន Jack Ma បានជួបប្រធានាធិបតីទី៤៥ លោក ដូណាល់ ត្រាំ កាលពីដើមខែមករា ហើយលោកអះអាងថាលោកយល់ឃើញខុសប្លែកពីប្រធានាធិបតីអាមេរិករូបនេះ។ លោក ដូណាល់ ត្រាំ យល់ឃើញថា សេដ្ឋកិច្ចអាមេរិកធ្លាក់ចុះ ហើយក្រុមហ៊ុនឧស្សាហកម្មអាមេរិកប្រឈមបញ្ហា ហើយប្រជាជនអាមេរិកបាត់បង់ការងារដោយសារការបើករោងចក្រនៅម៉ិកស៊ិក និងនៅចិន។ លោកបន្ទោសចិន និងម៉ិកស៊ិកចំពោះបញ្ហានេះ ហើយលោកគំរាមធ្វើសង្គ្រាមពាណិជ្ជកម្មថែមទៀតផង។
យោងតាមខ្សែអាត់វីដេអូសន្និសីទសារព័តមានដែលចុះផ្សាយលើគេហទំព័រ World Economic Forum ស្ថាបនិកក្រុមហ៊ុន Alibaba លោក Jack Ma បានលើកឡើងដូច្នេះថា៖ កន្លងមក អាមេរិកប្រឡូកក្នុងសង្គ្រាម ១៣ ហើយចំណាយលុយប្រហែល ៤០,២ ទ្រីលានដុល្លារ។ ចុះម៉េចបានជាគេមិនចំណាយលុយនោះខ្លះដើម្បីសង់ហេដ្ឋារចនាសម្ព័ន្ធនិងជួយប្រជាជនអាមេរិកវណ្ណៈកណ្តាលនិងវណ្ណៈទាប?»។
លោក Jack Ma សង្កត់ធ្ងន់ថា បើអាមេរិកបង្វែរការប្រើប្រាស់ហិរញ្ញវត្ថុដែលខ្លួនចំណាយលើយោធានិងសង្គ្រាម មកអភិវឌ្ឍឧស្សាហកម្ម គ្រប់យ៉ាងនឹងប្រសើរឡើងច្រើនជាងបច្ចុប្បន្នឆ្ងាយណាស់។
មហាសេដ្ឋីរូបនេះពន្យល់បន្ថែមថា៖ «ទោះជាអ្នកឯងពូកែយុទ្ធសាស្ត្រយ៉ាងណាក៏ដោយ, អ្នកឯងត្រូវចំណាយលុយជួយប្រជាជនខ្លួនឯង។ តាំងពីក្មេងមកខ្ញុំលឺឈ្មោះក្រុមហ៊ុនអាមេរិកធំៗមាន Ford, Boeing និងក្រុមហ៊ុនធំៗដទៃទៀត។ ហើយដល់រយៈពេល១០ឬ ២០ឆ្នាំចុងក្រោយនេះខ្ញុំលឺសូរឈ្មោះ Silicon Valley និង Wall Street។ ដល់ឆ្នាំ ២០០៨ វិបត្តិសេដ្ឋកិច្ចកើតឡើង អាមេរិកខាតបង់លុយ១៩,២ ទ្រីលានម្នាក់ឯង ហើយប្រជាជន៣៤លាននាក់បាត់បង់ការងារទូទាំងពិភពលោក។ ចុះបើយើងយកលុយដែលចំណាយលើតំបន់មជ្ឈិមបូព៌ានិងលើ Wall Street មកអភិវឌ្ឍឧស្សាហកម្មនៅអាមេរិកវិញ? មិនដឹងថាវាផ្លាស់ប្តូរច្រើនប៉ុណ្ណាទេ»។
វាបង្ហាញឲ្យឃើញថា គ្មានអ្នកណាលួចការងារប្រជាជនអាមេរិកឡើយ។ គ្រប់យ៉ាងមកពីការចំណាយថវិកាច្រើនជ្រុលលើរឿងធ្វើសង្គ្រាម។ យោងតាមរបាយតការណ៍ស្រាវជ្រាវរបស់វិទ្យាសា្ថនស្រាវជ្រាវសន្តិភាព សហរដ្ឋអាមេរិកបានចំណាយថវិកាប្រហែល ៥៩៦ ពាន់លានដុល្លារឬស្មើ ៣,៣ភាគរយនៃផលិតផលក្នុងស្រុកសរុបលើការចំណាយផ្នែកយោធាក្នុងឆ្នាំ ២០១៥។ ការចំណាយនេះខ្ពស់ជាងការចំណាយប្រទេសនានាលើពិភពលោក។
លោក Jack Ma បានបញ្ជាក់ចុងក្រោយថា៖« ដូច្នេះគ្មានប្រទេសណាលួចការងារពីអ្នកទេស។ វាជាយុទ្ធសាស្ត្ររបស់អ្នកខ្លួនឯង ហើយវាបណ្តាលមកពីអ្នកមិនបានប្រើប្រាស់លុយរបស់អ្នកឲ្យបានត្រឹមត្រូវប៉ុណ្ណោះ»៕
Tag:
ដូណាល់ ត្រាំ
Jack Ma
© រក្សាសិទ្ធិដោយ thmeythmey.com