ឡាវបញ្ចេញរបាយការណ៍ប្រចាំឆ្នាំស្តីពីស្ថាប័ន និងមន្ត្រីដែលបានប្រព្រឹត្តអំពើពុករលួយ

អន្តរជាតិ

ឡាវបញ្ចេញរបាយការណ៍ប្រចាំឆ្នាំស្តីពីស្ថាប័ន និងមន្ត្រីដែលបានប្រព្រឹត្តអំពើពុករលួយ

20, Jan 2017 , 9:59 pm

រូបភាព

លោកនាយករដ្ឋមន្ត្រីឡាវ

ដោយ: ថ្មីៗ

រដ្ឋាភិបាលឡាវ បានចេញរបាយការណ៍ប្រចាំឆ្នាំស្តីពីមន្ត្រីពុករលួយ ដែលរបាយការណ៍នោះ ក៏បានរកឃើញថា មានមន្ត្រីជាច្រើនទាំងនៅថ្នាក់កណ្តាល និងថ្នាក់ក្រោមជាតិ ដែលនៅចម្រុះស្ថាប័ន បានប្រព្រឹត្តអំពើពុករលួយជាច្រើនរូបភាព ហើយ វា ក៏បានបណ្តាលឲ្យបាត់បង់ប្រភពហិរញ្ញវត្ថុជាតិជាច្រើនផងដែរ។

អាជ្ញាធរជាតិស៊ើបអង្កេតនៃឡាវ (SIA) បានបង្ហាញរបាយការណ៍ស្តីពីសកម្មភាពពុករលួយរបស់មន្ត្រីថ្នាក់កណ្តាល និងថ្នាក់ក្រោមជាតិ ដែលបានស៊ើបអង្កេតនៅក្នុងរយៈពេលប៉ុន្មានឆ្នាំចុងក្រោយ។ របាយការណ៍នោះ បានបង្ហាញថា មានមន្ត្រីទាំងមកពីវិស័យកសិកម្ម វិស័យការងារ និងសុខមាលភាពសង្គម ប្រៃសនីយ៍ និងក្រសួងសេដ្ឋកិច្ច បានធ្វើឲ្យបាត់បង់ថវិកាជាតិជាច្រើនលាន។ នេះបើយោងតាមការចុះផ្សាយរបស់សារព័ត៌មានថៃ The Nation។

របាយការណ៍ដែលដកស្រង់ដោយប្រភពព័ត៌មានដដែលនោះ បានបង្ហាញថា តាមរយៈសកម្មភាពអំពើពុករលួយរបស់មន្ត្រីទាំងនោះបានធ្វើឲ្យរដ្ឋាភិបាលឡាវ ត្រូវខាតបង់ថវិកាជាច្រើនលានដុល្លារ ដែលក្នុងនោះតាមរយៈស្ថាប័នកសិកម្ម ១១.៣ ទ្រីលានគីប (ប្រមាណជាង១លានដុល្លារ), ក្រសួងប្រៃសនីយ៍ ២០ ទ្រីលានគីប (ប្រមាណ២លានដុល្លារ) និងជាច្រើនលានផ្សេងទៀតក្រសួងសេដ្ឋកិច្ច និងក្រសួងការងារ។

ហើយតាមបញ្ជាក់របស់អនុប្រធាននៃអាជ្ញាធរជាតិស៊ើបអង្កេតនៃឡាវ (SIA) មន្ត្រីពុករលួយទាំងនោះ បានធ្វើសកម្មភាពនោះតាមរយៈ សំណូកសូកប៉ាន់ បំពានអំណាច គេងបន្លំតាមរយៈការសាងសង់ ការក្លែងបន្លំឯកសារ និងឆបោកទ្រព្យសម្បត្តិសាធារណៈ។ នេះបើយោងតាមការចុះផ្សាយរបស់សារព័ត៌មានដដែលនោះ។

រដ្ឋាភិបាល និងបក្សកុម្មុយនីស្តឡាវ បានចាប់ផ្តើមយុទ្ធនាការរឹតបន្តឹង និងប្រឆាំងអំពើពុករលួយខ្លាំងចាប់ពីឆ្នាំ២០១៤មក ដោយក្នុងនោះ មន្ត្រីសាធារណៈ ត្រូវតែប្រកាសពីទ្រព្យសម្បត្តិ៕