«វិបត្តិរ៉ូហ៊ីងយ៉ា» ធ្វើឲ្យគ្រួសារអាស៊ាន មីយ៉ាន់ម៉ា-ម៉ាឡេស៊ី បន្តប៉ះសម្តីគ្នា

អន្តរជាតិ

«វិបត្តិរ៉ូហ៊ីងយ៉ា» ធ្វើឲ្យគ្រួសារអាស៊ាន មីយ៉ាន់ម៉ា-ម៉ាឡេស៊ី បន្តប៉ះសម្តីគ្នា

23, Jan 2017 , 8:39 pm

រូបភាព

ដោយ: ថ្មីៗ

វិបត្តិជនជាតិភាគតិចម៉ូស្លីម«រ៉ូហ៊ីងយ៉ា» នៅតែបន្តដិតដាមទំនាក់ទំនងគ្រួសារអាស៊ានមីយ៉ាន់ម៉ា និងម៉ាឡេស៊ីទាំងក្នុងក្របខណ្ឌទ្វេភាគី និងទាំងនៅក្នុងវេទិកាអន្តរជាតិ។ រដ្ឋាភិបាលមីយ៉ាន់ម៉ា ដែលកំពុងតែរងការរិះគន់ខ្លាំងពីបណ្តាសហគមន៍អន្តរជាតិរឿងធ្វើទុកបុកម្នេញលើជនជាតិភាគតិចម៉ូស្លីមរ៉ូហ៊ីងយ៉ា ហាក់ដូចជាមិនសូវបង្ហាញចំណាត់ការដោះស្រាយ ខណៈម៉ាឡេស៊ី យកឈ្មោះជាប្រទេសកាន់សាសនាឥស្លាម បន្តឈឺឆ្អាល និងការពារជនជាតិភាគតិចទាំងនោះ។

តើទំនាក់ទំនងប្រទេសទាំងពីរ នឹងវិវត្តទៅបែបណា បើវិបត្តិរ៉ូហ៊ីងយ៉ាមិនអាចបញ្ចប់?

អនុរដ្ឋមន្ត្រីការពារជាតិមីយ៉ាន់ម៉ាលោក Myint Nwe នៅថ្ងៃទី២៣ មករា ក្នុងវេទិកាសន្តិសុខនៃប្រទេសសិង្ហបុរី បានទទូចឲ្យពិភពលោកទុកពេល និងឱកាសសម្រាប់រដ្ឋាភិបាលមីយ៉ាន់ម៉ាដើម្បីដោះស្រាយវិបត្តិពាក់ព័ន្ធនឹងបញ្ហារ៉ូហ៊ីងយ៉ា ខណៈរឿងជនជាតិភាគតិចនេះ ក្រៅពីត្រូវចោទថាជាការបំពានសិទ្ធិមនុស្សហើយនោះ ក៏ជាបញ្ហាសន្តិសុខដែលអាចឲ្យក្រុមជ្រុលនិយមរដ្ឋឥស្លាម ឆ្លៀតឱកាសចូលមកនោះ។

តាមរបាយការណ៍របស់មន្ត្រីអង្គការសហប្រជាជាតិ មានហិង្សាបានផ្តើមកើតឡើងនៅក្នុងរដ្ឋ Rakhine ចាប់ពីថ្ងៃទី៩ តុលាឆ្នាំមុន ដោយក្រុមយោធាមីយ៉ាន់ម៉ា បានបើកប្រតិបត្តិការវាយប្រហារទៅលើក្រុមឧទ្ទាម ហើយបានបណ្តាលឲ្យមានជនជាតិភាគតិចរ៉ូហ៊ីងយ៉ា រាប់ពាន់នាក់ភៀសខ្លូនចេញពីមីយ៉ាន់ម៉ាទៅកាន់ប្រទេសជិតខាង។ ស្របជាមួយនឹងព្រឹត្តិការណ៍នេះ ក៏មានរបាយការណ៍ ថា យោធា បានបំពានសិទ្ធិមនុស្សយ៉ាងធ្ងន់ធ្ងរទៅលើក្រុមជនជាតិម៉ូស្លីមរ៉ូហ៊ីងយ៉ា រាប់បញ្ចូលទាំងបទល្មើសរំលោភ សម្លាប់ និងបង្ខំឲ្យចាកចេញពីមីយ៉ាន់ម៉ាទៀតផង។

យ៉ាងណាក៏ដោយ បន្ថែមពីការច្រានរបស់រដ្ឋាភិបាលកាលពីពេលមុនៗ លោកអនុមន្ត្រីការពារជាតិមីយ៉ាន់ម៉ា ក៏បានថ្លែងក្នុងវេទិកាដែលមានការចូលរួមពីមេដឹកនាំអាស៊ានថា មីយ៉ាន់ម៉ា ក៏បានដឹងលឺពីរបាយការណ៍ផ្សេងៗពាក់ព័ន្ធនឹងតំបន់មានវិវាទជនជាតិភាគតិចនោះផងដែរ។ ហើយរដ្ឋាភិបាល ក៏មិនបានលើកលែងទោសឲ្យជនដែលបំពាននឹងរឿងសិទ្ធិមនុស្សនោះផងដែរ។ តាមភ្នាក់ងារព័ត៌មាន AFP លោកអនុរដ្ឋមន្ត្រី បានសង្កត់ធ្ងន់ថា៖« ទាំងរដ្ឋាភិបាលយាំងហ្គូន និងសហគមន៍អន្តរជាតិ គួរតែផ្តោតសំខាន់លើការស្វែងរកដំណោះស្រាយរយៈពេលវែង និងទុកពេលឲ្យរដ្ឋាភិបាលដើម្បីសម្រេចកិច្ចការប្រកបដោយផ្លែផ្កាទៀតផង»។

អ្វីគួរកត់សម្គាល់នោះ សេចក្តីថ្លែងការណ៍របស់មីយ៉ាន់ម៉ា ធ្វើឡើងដើម្បីឆ្លើយតបទៅនឹងសុន្ទរកថារបស់ប្រមុខការពារជាតិម៉ាឡេស៊ី ដែលមានវត្តមាននៅទីនោះផងដែរ។ លោករដ្ឋមន្ត្រីការពារជាតិម៉ាឡេស៊ី Hishammuddin Hussein បានព្រមានថា ប្រសិនបើបញ្ហាជនជាតិភាគតិចរ៉ូហ៊ីងយ៉ា មិនអាចដោះស្រាយឲ្យបានសមរម្យនោះទេ ក្រុមជ្រុលនិយមរដ្ឋឥស្លាម នឹងឆ្លៀតឱកាសចូលមកដាក់មូលដ្ឋាននៅក្នុងរដ្ឋអាស៊ីអាគ្នេយ៍។ លោក សង្កត់ធ្ងន់ថា៖«លទ្ធភាព(វត្តមានរដ្ឋឥស្លាម) អាចបណ្តាលឲ្យមានការស្លាប់ និងមហន្តរាយ...»។

ថ្មីៗនេះម៉ាឡេស៊ី ក៏បានបើកកិច្ចប្រជុំបន្ទាន់មួយជាមួយនឹងប្រទេសអង្គការសហប្រតិបត្តិការរដ្ឋឥស្លាមមួយនៅម៉ាឡេស៊ីដើម្បីជជែកពីបញ្ហា«រ៉ូហ៊ីងយ៉ា»។ នាវេទិកាអង្គការកិច្ចសហប្រតិបត្តិការឥស្លាម (OIC) លោកនាយករដ្ឋមន្ត្រី ណាជីប រ៉ាហ្សាក់ បានថ្លែងយ៉ាងដូច្នេះ៖« ការសម្លាប់ ត្រូវតែបញ្ឈប់។ ការបំពានទៅលើស្ត្រី និងកុមារ ត្រូវតែបញ្ឈប់....ការបំពានរបស់អ្នក (អាជ្ញាធរមីយ៉ាន់ម៉ា) ទៅលើជនជាតិម៉ូស្លីម ត្រូវតែបញ្ឈប់»។

លោកនាយករដ្ឋមន្ត្រី ក៏បានទទូចឲ្យមីយ៉ាន់ម៉ាបញ្ឈប់ការរើសអើង និងការវាយប្រហារទៅលើរ៉ូហ៊ីងយ៉ាជាបន្ទាន់ ហើយ អ្នកដែលល្មើស ក៏គួរតែត្រូវបាននាំខ្លួនដើម្បីប្រឈមមុខច្បាប់។ នាយករដ្ឋមន្ត្រី ក៏បានប្រាប់ទៅកាន់មេដឹកនាំនៃប្រទេសឥស្លាមទៀតថា ពួកគេ មិនអាចឈរនៅស្ញៀម និងមិនធ្វើអីបាននោះទេ ដ្បិត វា គឺជារឿងដ៏ចាំបាច់ដើម្បីសង្គ្រោះជនរងគ្រោះពីសោកនាដកម្មមនុស្ស ក្នុងនាមជាសំឡេងសមូហភាពរបស់ពិភពឥស្លាម។

តាមពិតទៅប្រទេសអាស៊ានដែលកាន់សាសនាឥស្លាម មិនមែនមានតែម៉ាឡេស៊ីប៉ុណ្ណោះនោះទេ ពោលគឺ ព្រុយណេ និងឥណ្ឌូណេស៊ី ដែលគ្រួសារអាស៊ានផងដែរនោះ ក៏ជាប្រទេសប្រកាន់សាសនាឥស្លាមផងដែរ។ កន្លងមក មីយ៉ាន់ម៉ា ក៏ធ្លាប់ចោទម៉ាឡេស៊ីថា ជ្រៀតជ្រែកកិច្ចការផ្ទៃក្នុងរបស់ខ្លួនផងដែរ។ ជាងនេះទៅទៀតនោះ មីយា់ន់ម៉ា ថែមទាំងហ៊ានអះអាងថា ម៉ាឡេស៊ី ព្យាយាមបង្វែរបញ្ហានយោបាយក្នុងស្រុក តាមរយៈការបង្កើនចលនាការពារជនជាតិភាគតិចរ៉ូហ៊ីងយ៉ាវិញ៕