ជាតិ
កម្ពុជាមិនយកថ្លៃទិដ្ឋាការ សំបុត្រជិះរថយន្ត និងទស្សនាប្រាសាទពីភ្ញៀវចូលរួមវេទិកាសេដ្ឋកិច្ច ![](https://image.thmeythmey.com/pictures/2017/01/23/hs_wef.jpg)
×![]()
ភ្នំពេញ៖ រដ្ឋាភិបាលបានសម្រេចផ្តល់ទិដ្ឋាការ (VISA) សំបុត្រធ្វើដំណើរពីរាជធានីភ្នំពេញទៅទស្សនាខេត្តសៀមរាប និងសំបុត្រទស្សនាប្រាសាទបុរាណខ្មែរទាំងអស់ ឲ្យវាគ្មិនបរទេស និងអ្នកសេដ្ឋកិច្ចទាំងឡាយដែលចូលរួមវេទិកាសេដ្ឋកិច្ចពិភពលោកស្តីពីអាស៊ាននៅកម្ពុជា ដោយឥតគិតថ្លៃ។
សម្តេចនាយករដ្ឋមន្ត្រី ហ៊ុន សែន បានបង្ហាញសេចក្តីសម្រេចនេះ កាលពីថ្ងៃទី២០ ខែមករានេះ នៅពេលសម្តេច ជួបលោក Klaus Schwab ស្ថាបនិក និងជាប្រធាន (World Economic Forum-WEF) នៅសាលសន្និសីទ Congress Center ក្នុងទីក្រុងដាវ៉ូស (Davos) ប្រទេសស្វីស។
សម្តេចនាយករដ្ឋមន្ត្រី បានថ្លែងអំណរគុណលោក Klaus Schwab និងសហការីដែលជួយឲ្យកម្ពុជាធ្វើជាម្ចាស់ផ្ទះរៀបចំវេទិកាសេដ្ឋកិច្ចពិភពលោកស្តីពី អាស៊ាន។ សម្តេចបញ្ជាក់តាមហ្វេសប៊ុកថា សម្តេច រីករាយ បន្តសហការជាមួយលោកស្ថាបនិក WEF និងសហការី ដើម្បីធ្វើឲ្យកិច្ចប្រជុំនៅពេលខាងមុខនេះទទួល បានជោគជ័យ។
វេទិកាសេដ្ឋកិច្ចពិភពលោកនៅកម្ពុជាខាងមុខ ធ្វើឡើងនាឱកាសអបអរសាទរខួប ៥០ឆ្នាំរបស់អាស៊ាន និងការប្រមើលមើលពីអនាគតរបស់អាស៊ានផងដែរ។ កម្ពុជានឹងរៀបចំវេទិកាសេដ្ឋកិច្ចពិភពលោកស្តីពី អាស៊ាន នៅកម្ពុជា នៅថ្ងៃទី១០ ដល់ថ្ងៃទី១២ ខែឧសភា ឆ្នាំ២០១៧ ខាងមុខ៕
Tag:
ហ៊ុន សែន
Klaus Schwab
វេទិកាសេដ្ឋកិច្ចពិភពលោក ស្តីពីអាស៊ាន
© រក្សាសិទ្ធិដោយ thmeythmey.com