ជាតិ
អ្នកបុរាណវិទ្យាកំពុងធ្វើកំណាយលើទីតាំងផលិតលោហៈទី២នៅតំបន់អង្គរ ![](https://image.thmeythmey.com/pictures/2017/01/23/anc.jpg)
×![]()
សៀមរាប៖ ស្ថានីយស្លដែកបុរាណមួយកន្លែង ត្រូវបានក្រុមអ្នកបុរាណវិទ្យាប្រទះឃើញកាលពីចុងឆ្នាំ២០១៥។ ថ្មីៗនេះ ស្ថានីយទី២ ត្រូវបានប្រទះឃើញដូចគ្នា ហើយវាកំពុងបាននិងកំពុងធ្វើកំណាយ ដើម្បីសិក្សាពីវិសាលភាពទាំងមូល។
មជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គររបស់អាជ្ញាធរជាតិអប្សរា បានចាប់ផ្តើមបើកកំណាយលើទីតាំងស្លដែកបុរាណមួយកន្លែងទៀត ដែលមានទីតាំងនៅភូមិសាលាក្រវ៉ាន់។ ក្រុមអ្នកស្រាវជ្រាវនឹងបើកកំណាយលើស្ថានីយស្លដែកបុរាណទី២នេះ ចាប់ពីថ្ងៃទី២៣ មករា ដល់ថ្ងៃទី១ កុម្ភៈ ឆ្នាំ២០១៧។
ក្នុងសេចក្តីជូនដំណឹងរបស់អាជ្ញាធរជាតិអប្សរា គោលបំណងសំខាន់នៃការបើកកំណាយនេះ គឺពិនិត្យមើលរចនាសម្ព័ន្ធនៃចង្ក្រានស្លដែក ដើម្បីបង្ហាញពីសារៈសំខាន់ និងតម្រូវការលោហៈដែលប្រើប្រាស់នៅក្នុងរាជធានីអង្គរ ព្រមទាំងពិចារណាឡើងវិញអំពីប្រភពផ្គត់ផ្គង់ដល់អង្គរ ដែលកន្លងមកអ្នកស្រាវជ្រាវធ្លាប់គិតថា លោហៈបាននាំចូលពីប្រភពផ្សេង។
គួររម្លឹកថា នៅចុងឆ្នាំ២០១៥ ក្រុមស្រាវជ្រាវផ្លូវបុរាណនៃអាជ្ញាធរជាតិអប្សរា បានប្រទះឃើញស្ថានីយស្លដែកមួយកន្លែង ដែលមានទីតាំងនៅភូមិសាលាក្រវ៉ាន់ ឃុំរំចេក ស្រុកបន្ទាយស្រី ដែលស្ថិតនៅតំបន់ការពារទី២ក្នុងរមណីយដ្ឋានអង្គរ។ វាគឺជាស្ថានីយស្លដែកដំបូងគេបង្អស់ ដែលគេប្រទះឃើញក្នុងតំបន់អង្គរ៕
Tag:
ស្ថានីយស្លដែក
អ៊ឹម សុខរិទ្ធី
© រក្សាសិទ្ធិដោយ thmeythmey.com