២០១៨ កម្ពុជា និងឡាវ ព្រមព្រៀងគ្នាបង្កើតស្ថាប័នគ្រប់គ្រងជលផលរួមគ្នា

ជាតិ

២០១៨ កម្ពុជា និងឡាវ ព្រមព្រៀងគ្នាបង្កើតស្ថាប័នគ្រប់គ្រងជលផលរួមគ្នា

23, Jan 2017 , 11:19 pm

រូបភាព

Laos and Cambodia ក្រុមការងារគម្រោងគ្រប់គ្រងជលផលទន្លេមេគង្គ និងសេគង្គ មកពីប្រទេសកម្ពុជា និងឡាវ ពិភាក្សាជាមួយតំណាងសហគមន៏អំពីការគ្រប់គ្រងធនធានមច្ឆជាតិនៅខេត្ត អាតាពឺ ប្រទេសឡាវ

ដោយ:

ភ្នំពេញ៖ ប្រទេសឡាវ និងកម្ពុជា បានព្រមព្រៀងគ្នា បង្កើតស្ថាប័នគ្រប់គ្រងជលផលរួមគ្នាមួយ នៅដំណាច់ឆ្នាំ២០១៨ ដើម្បីធានានិរន្តរភាពជលផលរបស់ប្រទេសទាំងពីរ។ នេះបើយោងតាមសេចក្តីប្រកាសព័ត៌មានរបស់គណៈកម្មាធិការជាតិទន្លេមេគង្គ(MRC) ដែលបានផ្សព្វផ្សាយនៅថ្ងៃទី២៣ មករា។

កម្ពុជា និងឡាវ បានពង្រឹងកិច្ចការឆ្លងដែន ការពារជនផលនៃប្រទេសទាំងពីរ ឲ្យមាននិរន្តរភាព ដើម្បីលើកកម្ពស់ជីវភាពពលរដ្ឋរាប់លាននាក់ ដែលកំពុងអាស្រ័យផលពីធនធានមច្ឆជាតិនៃទន្លេមេគង្គ និងសេកុង។ គម្រោងនេះ គឺធ្វើឡើងបន្ទាប់មានមន្ត្រីរបស់គណៈកម្មាធិការជាតិទន្លេមេគង្គ និងអាជ្ញាធរជលផលនៃប្រទេសកម្ពុជា និងឡាវ បានទៅទស្សនកិច្ចរួមគ្នាមួយ ទៅកាន់ទន្លេមេគង្គ និងសេកុង។

ទន្លេមេគង្គ និងសេកុង បានភ្ជាប់រវាងខេត្តចំប៉ាសាក់ និងអាតាពឺរបស់ឡាវ ជាមួយខេត្តស្ទឹងត្រែង និងក្រចេះ របស់កម្ពុជា។

លោក វ៉ាត់ បុត្តកុសល អគ្គលេខាធិការរងនៃគណៈកម្មាធិការជាតិទន្លេមេគង្គកម្ពុជា មានប្រសាសន៍ថា៖ «យើងមានបញ្ហា និងក្តីកង្វល់ដូចគ្នា ក្នុងការគ្រប់គ្រងជលផល ដែលកំពុងរងការគំរាមគំហែងដោយសារសកម្មភាពរបស់មនុស្ស និងការអភិវឌ្ឍន៏ហេដ្ឋារចនាសម្ព័ន្ធ។ ដូច្នេះ ការពង្រឹងកិច្ចសហការ សំខាន់ណាស់សម្រាប់ប្រទេសទាំងពីរ ដើម្បីរួមគ្នាដោះស្រាយបញ្ហាប្រកបដោយប្រសិទ្ធភាព»។

គម្រោងគ្រប់គ្រងជលផលនៅទន្លេមេគង្គ និងសេកុង នឹងពិភាក្សាអំពីសហប្រតិបត្តិការឆ្លងដែន និងការអនុវត្តរួមគ្នា ដើម្បីអភិរក្សជីវចម្រុះនៃទន្លេទាំងពីរ។ គម្រោងនេះស្ថិតក្នុងចំណោម គម្រោងទ្វេភាគីចំនួន៥ ដែលផ្តល់មូលនិធិដោយធនាគារពិភពលោក ក្រោមជំនួយបច្ចេកទេសពី MRC។

លោក អាន ពេជ្រហត្តដា នាយកផ្នែកផែនការ របស់ MRC មានប្រសាសន៍ថា៖«គម្រោងនេះ នឹងរឹតចំណងសហការរវាងកម្ពុជា និងឡាវ។ យើងសង្ឃឹមថា វានឹងនាំមកនូវសកម្មភាពរួម និងសហប្រតិបត្តិការដ៏ទូលំទូលាយ ដែលអនុញ្ញាត ឲ្យប្រទេសទាំងពីរ ធ្វើការរួមគ្នាដើម្បីគ្រប់គ្រងធនធានធម្មជាតិរបស់ពួកគេ»។

អ្នកជំនាញផ្នែកជលផលមកពីប្រទេសទាំងពីរ បានកំណត់ បញ្ហាចម្បងៗ ដូចជា៖ ការនេសាទគ្មាននិរន្តរភាព កង្វះការអនុវត្តច្បាប់ជលផល និងការបាត់បង់ជម្រកត្រី ជាដើម។ ពូជត្រីចំនួន៥ប្រភេទ ដែលធ្វើដំណើរឆ្ងាយពីទីជម្រក នឹងកំណត់សម្រាប់ការត្រួតពិនិត្យ។ លើសពីនេះ ក្រុមទាំងពីរ ក៏បានព្រមព្រៀងប្រើប្រាស់វិធីសាស្ត្រតាមដាន និងត្រួតពិនិត្យត្រី ដែលបង្កើតឡើងដោយ MRC ផងដែរ។ ប្រទេសទាំងពីរនឹងចាប់ផ្តើមសកម្មភាពត្រួតពិនិត្យ និងបណ្តុះបណ្តាលក្រុមអ្នកនេសាទ អំពី៖ ការចងក្រងសកម្មភាពនេសាទ ឧបករណ៍នេសាទ និងកំណត់ជម្រកត្រី។ លទ្ធផលដ៏ចម្បងមួយទៀតនោះ គឺ កម្ពុជា និងឡាវ បានព្រមព្រៀង បង្កើត     ស្ថាប័នគ្រប់គ្រងជលផលរួមគ្នាមួយ នៅដំណាច់ឆ្នាំ ២០១៨។ ពួកគេ នឹងចាប់ផ្តើមពិភាក្សាពីហេដ្ឋារចនាសម្ព័ន្ធនៃស្ថាប័ននេះ បញ្ហាហរិញ្ញវត្ថុ និងស្វែងយល់ពីតម្រូវការរបស់ដៃគូពាក់ព័ន្ធ ដើម្បីធានាបាននូវភាពជោគជ័យក្នុងការបង្កើត និងការអនុវត្តផែនការការពារជលផលរួមគ្នា។

លោក Viengsay Sophachan អ្នកសម្របសម្រួលថ្នាក់ជាតិ នៃគណៈកម្មាធិការទន្លេមេគង្គឡាវ និយាយថា៖«កិច្ចសហការនេះ នឹងជួយឲ្យធនធានមច្ឆាជាតិរបស់ប្រទេសទាំងពីរមាននិរន្តរភាព»។

ទន្លេសេកុង ហូរពីប្រទេសវៀតណាម កាត់ប្រទេសឡាវ មុននឹងហូរ ចូលប្រទេសកម្ពុជា ដោយភ្ជាប់ជាមួយទន្លេមេគង្គ។ ក៏ប៉ុន្តែ ប្រព័ន្ធអេកូឡូស៊ីនៃទន្លេទាំងពីរ កំពុងរងការគំរាមគំហែង ពីការកើនឡើងនៃសកម្មភាពនេសាទខុសច្បាប់ គ្រោះទឹកជំនន់ និងគ្រោះរាំងស្ងួត ព្រមទាំងការអភិវឌ្ឍហេដ្ឋារចនាសម្ព័ន្ធ រួមទាំងទំនប់វារីអគ្គិសនីផងដែរ៕