ជាតិ
កម្ពុជា និងព័រទុយហ្គាល់ ឯកភាពឲ្យមានកម្មវិធីសិក្សាភាសាព័រទុយហ្គាល់
× ភ្នំពេញ៖ កម្ពុជា និងព័រទុយហ្កាល់ ឯកភាពគ្នាឲ្យមានការដាក់កម្មវិធីសិក្សាភាសារព័រទុយហ្គាល់នៅកម្ពុជា ដើម្បីពង្រឹងផ្នែកវប្បធម៌រវាងប្រទេសទាំងពីរ។ នេះបើតាមសេចក្ដីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ។
ក្នុងជំនួបពិភាក្សាគ្នាលើកិច្ចសហប្រតិបត្តិការផ្នែកវប្បធម៌នោះ កម្ពុជានិងព័រទុយហ្គាល់ បានឯកភាពពិចារណាអំពីការផ្លាស់ប្ដូរនិស្សិត និងគ្រូបង្រៀនទៅវិញទៅមក ហើយក្នុងនោះក៏មានការសិក្សាភាសាព័រទុយហ្គាល់ផងដែរ។ ការលើកឡើងនេះនៅក្នុងជំនួបរវាងរដ្ឋមន្ត្រីក្រសួងការបរទេសលោក ប្រាក់ សុខុន និង លោក Francisco Vaz Patto ឯកអគ្គរដ្ឋទូតព័រទុយហ្គាល់ប្រចាំកម្ពុជា។
ពាក់ព័ន្ធនឹងកម្មវិធីសិក្សាភាសាព័រទុយហ្គាល់នេះ ឯកអគ្គរដ្ឋទូតប្រទេសព័រទុយហ្គាល់ថ្មីប្រចាំកម្ពុជា ក៏បានស្នើសុំលោក ជេត ជេលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ បើកបង្រៀនភាសាព័រទុយហ្គាល់ (Portuguese) នៅកម្ពុជា។
លោក ជេត ជេលី សាកលវិទ្យាធិការ RUPP បានសរសេរលើហ្វេសប៊ុកថា ឯកអគ្គរដ្ឋទូតព័រទុយហ្គាល់ បានសន្យាផ្តល់គ្រូបង្រៀនថ្នាក់ភាសាព័រទុយហ្គាល់នៅកម្ពុជាទៀតផង នាពេលថ្មីៗនេះ។
លោក ជេត ជេលី បានបន្ថែមថា លោក និងឯកអគ្គរដ្ឋទូតប្រទេសព័រទុយហ្គាល់ បានពិភាក្សាគ្នារួចថា ការបើកថ្នាក់ភាសានេះសម្រាប់តែនិស្សិតថ្នាក់សិក្សាអន្តរជាតិ (International Studies) និង ពាណិជ្ជកម្មអន្តរជាតិ (International Business) ពិសេសសិស្ស និស្សិតត្រៀមទៅសិក្សានៅព័រទុយហ្គាល់ផង។ តាមលោក ជេត ជេលី បច្ចុប្បន្ន មនុស្សជាង ៣០០លាននាក់ប្រើភាសាព័រទុយហ្គាល់ និងប្រទេស ១០ បានយកភាសាព័រទុយហ្គាល់ជាភាសាផ្លូវការ៕
Tag:
កម្ពុជា
ព័រទុយហ្គាល់
© រក្សាសិទ្ធិដោយ thmeythmey.com