ខ្មែរក្រហម
ជាតិ
បុគ្គលិកសាលាក្តីខ្មែរក្រហមផ្នែកប្រតិចារិកប្រកាសមិនធ្វើការដែរ បន្ទប់សវនាការនៃសាលាក្តីខ្មែរក្រហម
× បន្ទប់សវនាការនៃសាលាក្តីខ្មែរក្រហម
× បុគ្គលិកសាលាក្តីខ្មែរក្រហមផ្នែកប្រតិចារិកចំនួន៧នាក់(អ្នកសរសេរដំណើរការសវនាការឡើងវិញ) បានប្រកាសជាផ្លូវការកាលពីថ្ងៃចន្ទ១១មិនាម្សិលមិញអំពីការធ្វើពហិការមិនបំពេញការងាររបស់ពួកគេ ដោយសារតែពួកគេមិនមានប្រាក់បៀវត្សរ៍។ ព័ត៌មាននេះត្រូវបានអះអាងដោយអ្នកនាំពាក្យសាលាក្តីខ្មែរក្រហមលោកនេត ភក្ត្រានៅថ្ងៃអង្គារនេះ។
អ្នកនាំពាក្យរូបនេះបន្តថា ក្រុមបុគ្គលិកផ្នែកប្រតិចារិកគួរតែបានធ្វើពហិការតាំងពីថ្ងៃទីមិនាជាមួយក្រុមបុគ្គលិកផ្នែកបកប្រែភាសាដែរ នេះបើយោតាមញ្ញត្តិរបស់ពួកគេដែលលោកទើបតែទទួលបាន។ ប៉ុន្តែថាពួកគេ (បុគ្គលិកផ្នែកប្រតិចារិក)ទើបតែប្រកាសជាផ្លូវការកាលពីថ្ងៃចន្ទម្សិលមិញ។
«មូលហេតុនៃការធ្វើកូដកម្មមិនធ្វើការងារនេះ គឺដូចគ្នានឹងការចង់បានរបស់ក្រុមអ្នកបកប្រែភាសាដែរ។ គឺប្រាក់បៀវត្សរ៍។ ពួកគេទាមទារប្រាក់បៀវត្សរទាំង៣ខែដែលពួកគេមិនទាន់បានទទួល»។ នេះគឺជាការបញ្ជាក់របស់លោកនេត ភក្ត្រា។
បញ្ហានៅត្រង់ថា ក្រោយពីពេលដែលក្រុមបុគ្គលិកផ្នែកបកប្រែភាសាប្រកាសធ្វើកូដកម្មមិនបំពេញការងារ ការជួបពិភាក្សាគ្នាមួយជាមួយផ្នែករដ្ឋបាលត្រូវបានរៀបចំភ្លាម ហើយថា ក្រុមបុគ្គលិកផ្នែកបកប្រែក៏បានយល់ព្រមទទួលយកប្រាក់បៀវត្សរ៍ខែធ្នូសិន ជាថ្នូរនឹងការចូលបំពេញការងារវិញនោះ។
នៅពេលនេះ បុគ្គលិកផ្នែកប្រតិចារិកដែលមិនបានចូលរួមចរចារជាមួយផ្នែករដ្ឋបាលនោះ ហើយដែលប្រកាសធ្វើពហិការមិនបំពេញការងារដែលនោះ តើនឹងយល់ព្រមធ្វើតាមលក្ខខណ្ឌនេះដែរឬទេ?
ទោះយ៉ាងណាក៏ដោយ រហូតមកដល់ពេលនេះគឺមានតែបុគ្គលិកជាតិ២អង្គភាពនេះទេដែលបានចេញប្រកាសធ្វើកូដកម្មមិនធ្វើការងារនៅក្នុងសាលាក្តីខ្មែរក្រហមនោះ។ បុគ្គលិកទាំង២អង្គភាពបញ្ចូលគ្នាមានចំនួនជាង៣០នាក់។
បុគ្គលិកផ្នែកជាតិទាំងអស់នៅក្នុងសាលាក្តីខ្មែរក្រហមមានចំនួន២៨៧នាក់។ ក្នុងចំណោមនេះ មានតែបុគ្គលិកចំនួន១៧នាក់ដែលធ្វើការនៅក្នុងអង្គភាពជនរងគ្រោះប៉ុណ្ណោះដែលបានទទួលប្រាក់បៀវត្សរធម្មតាដោយសារជំនួយថវិការបស់រដ្ឋាភិបាលអាល្លឺម៉ង់។ ចំណែក២៧០នាក់ផ្សេងទៀតពួកគេធ្វើការដោយឥតប្រាក់ខែ៣ខែមកហើយ។
លោកនេត ភក្ត្រាបានបញ្ជាក់ឡើងវិញថា នៅពេលនេះ ជាពេលដែលបុគ្គលិកជាតិជួបវិបត្តិថវិកាយូរជាងពេលណាៗទាំងអស់ ចាប់តាំងពីមានដំណើរការសាលាក្តីខ្មែរក្រហមមកនោះ សាលាក្តីកំពុងរង់ចាំថវិកាយ៉ាងអន្ទះសាររបស់សហភាពអឺរ៉ុបដែលបានសន្យាផ្តល់៣០ម៉ឺនដុល្លារសម្រាប់ភាគីជាតិនោះ៕
© រក្សាសិទ្ធិដោយ thmeythmey.com