ជាតិ
សេដ្ឋកិច្ច
«យុវជន បច្ចេកវិទ្យា និងកំណើន» ជាប្រធានបទសម្រាប់វេទិកាសេដ្ឋកិច្ចពិភពលោកស្ដីពីអាស៊ាន
× ភ្នំពេញ៖ កម្ពុជាបានជ្រើសយកប្រធានបទ «យុវជន បច្ចេកវិទ្យា និងកំណើន» សម្រាប់ការពិភាក្សានៅក្នុងវេទិកាសេដ្ឋកិច្ចពិភពលោកស្ដីពីអាស៊ាន ដែលធ្វើឡើងនៅរាជធានីភ្នំពេញ ក្នុងខែឧសភាឆ្នាំនេះ។
គណៈកម្មការអន្តរក្រសួង ដែលដឹកនាំដោយលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី២៨ខែកុម្ភៈ បានបើកកិច្ចប្រជុំជាមួយគណៈប្រតិភូវេទិកាសេដ្ឋកិច្ចពិភពលោក ដែលដឹកនាំដោយលោក Justin Wood ប្រធានប្រចាំតំបន់អាស៊ីប៉ាស៊ីហ្វិក ដើម្បីធ្វើបច្ចុប្បន្នភាពលើការងារត្រៀមរៀបចំវេទិកាសេដ្ឋកិច្ចពិភពលោកស្តីពីអាស៊ាន ដែលកម្ពុជាធ្វើជាម្ចាស់ផ្ទះ នៅថ្ងៃទី១០ ដល់ថ្ងៃទី១២ខែឧសភា ឆ្នាំ២០១៧ ។ កិច្ចប្រជុំនេះបានសម្រេចកំណត់យកប្រធានបទ «យុវជន បច្ចេកវិទ្យា និងកំណើន» ធ្វើជាប្រធានសម្រាប់វេទិកាសេដ្ឋកិច្ចពិភពលោកស្ដីពីអាស៊ានឆ្នាំនេះ។
លោក ស៊ុន ចាន់ថុល ក្នុងពេលកន្លងមក បានមានប្រសាសន៍ថា ឆ្លៀតក្នុងឱកាសដែលកម្ពុជាធ្វើជាម្ចាស់ផ្ទះវេទិកានេះ រដ្ឋាភិបាលនឹងបង្ហាញសក្ដានុពលសេដ្ឋកិច្ចរបស់កម្ពុជា ដើម្បីទាក់ទាញបណ្ដាវិនិយោគិនបរទេសឲ្យចូលមកបណ្ដាក់ទុនរកស៊ី។
វេទិកានេះនឹងមានការចូលរួមពីសំណាក់ប្រតិភូរដ្ឋាភិបាល និងក្រុមហ៊ុនឯកជន ពីបណ្ដាប្រទេសនានាជុំវិញពិភពលោកប្រមាណ ៧០០នាក់។ កាលពីឆ្នាំ២០១៦ វេទិកានេះត្រូវបានធ្វើឡើងនៅប្រទេសម៉ាឡេស៊ី ដែលមានអ្នកចូលរួមពីបណ្ដាប្រទេសសមាជិកអាស៊ាន និងប្រទេសផ្សេងទៀតជាង៥០ប្រទេស។ វេទិកានេះ គឺវេទិកាថ្នាក់តំបន់មួយរបស់ World Economic Forum ដែលមានមូលដ្ឋាននៅទីក្រុងហ្សឺណែវ ប្រទេសស្វីស៕
Tag:
ស៊ុន ចាន់ថុល
វេទិកាសេដ្ឋកិច្ចពិភពលោក
© រក្សាសិទ្ធិដោយ thmeythmey.com