អន្តរជាតិ
រដ្ឋមន្ត្រីការបរទេសអាមេរិក ប្តេជ្ញាការពារសម្ព័ន្ធមិត្តជប៉ុនប្រឆាំងកូរ៉េខាងជើង
× រដ្ឋមន្ត្រីការបរទេសអាមេរិកចាប់ផ្តើមទស្សនកិច្ចលើកដំបូងរបស់ខ្លួននៅអាស៊ីដោយចាប់ផ្តើមពីប្រទេសជប៉ុន។ លោកបានធានាប្រាប់មេដឹកនាំជប៉ុនថា អាមេរិកនៅតែបន្តប្រឹងប្រែងរក្សានិងការពារសម្ព័ន្ធមិត្តជប៉ុនដើម្បីទប់ទល់និងដោះស្រាយរាល់បញ្ហាសន្តិសុខតំបន់។
លោក Rex Tillerson រដ្ឋមន្ត្រីការបរទេសអាមេរិកបានអញ្ជើញទៅដល់ប្រទេសជប៉ុនក្នុងដំណើរទស្សនកិច្ចថ្នាក់តំបន់ដំបូងបំផុតរបស់ខ្លួននាថ្ងៃព្រហស្បតិ៍ទី ១៦មីនានេះ។ នៅជប៉ុន មន្ត្រីការទូតជាន់ខ្ពស់រូបនេះបានប្រាប់ជប៉ុនថា អាមេរិកឲ្យតម្លៃសម្ព័ន្ធភាពរវាងជប៉ុននិងអាមេរិកខ្លាំងណាស់។
យោងតាមសារព័ត៌មាន New York Times មុនពេលជួបជាមួយសមភាគីជប៉ុនលោក Fumio Kishida លោក Rex Tillerson បានថ្លែងថា៖« ពេលខ្ញុំធ្វើដំណើរមកក្នុងតំបន់នេះ ជប៉ុនជាកន្លែងខ្ញុំមកទស្សនកិច្ចមុនគេដែលវាឆ្លុះបញ្ចាំងឲ្យឃើញពីសារសំខាន់មួយដែលថា អាមេរិកឲ្យតម្លៃសម្ព័ន្ធភាពរវាងអាមេរិកនិងជប៉ុន។ ប៉ុន្តែក្រៅពីនេះវាក៏បង្ហាញឲ្យឃើញពីសារសំខាន់នៃតំបន់អាស៊ីប៉ាស៊ីហ្វិកទាំងមូលចំពោះអាមេរិកដែរ»។
បន្ថែមពីបង្ហាញការប្តេជ្ញាចិត្តរក្សាសម្ព័ន្ធភាពជាមួយជប៉ុន ររដ្ឋមន្ត្រីការបរទេសអាមេរិករូបនេះក៏កត់សម្គាល់ផងដែរថា សម្ព័ន្ធភាពត្រីភាគីរវាងជប៉ុន, កូរ៉េខាងត្បូងនិងជប៉ុនពិតជាសំខាន់ក្នុងការជួយដោះស្រាយបញ្ហានុយក្លេអ៊ែរកូរ៉េខាងជើងផងដែរ។
តាមពិតទៅ ដំណើរទស្សនកិច្ចរបស់រដ្ឋមន្ត្រីការបរទេសអាមេរិកនេះកើតឡើងស្របពេលដែលភាពតានតឹងកើនឡើងនៅក្នុងតំបន់បន្ទាប់ពីក្រុងព្យុងយ៉ាងបាញ់សាកល្បងមីស៊ីលបាលីស្ទិកជាច្រើនគ្រាប់កាលពីដើមសប្តាហ៍មុន។ ស្ថានការណ៍តានតឹងនេះបង្កឲ្យមានការព្រួយបារម្ភខ្លាំងនៅក្នុងតំបន់ជាពិសេសនៅជប៉ុននិងកូរ៉េខាងត្បូង ហើយសហរដ្ឋអាមេរិកក៏សម្រេចពង្រាយប្រព័ន្ធការពារមីស៊ីល THAAD ទៅកូរ៉េខាងត្បូងនិងយន្តហោះទម្លាក់គ្រាប់បែក B-52 ទៅសម្ញែងសាច់ដុំយោធាថែមទៀត។ យ៉ាងណាមិញគេនៅតែរស់ចាំមើលចំណាត់ការជាដុំកំភួនរបស់រដ្ឋបាល ដូណាល់ ត្រាំ ក្នុងការដោះស្រាយបញ្ហាកូរ៉េខាងជើងក៏ដូចជាបញ្ហាសន្តិសុខតំបន់ផ្សេងទៀតដែរ។
បន្ទាប់ពីចាកចេញពីជប៉ុន រដ្ឋមន្ត្រីការបរទេសអាមេរិករូបនេះនឹងបន្តដំណើរទៅកាន់កូរ៉េខាងត្បូង។ លោកនឹងជួបពិភាក្សាជាមួយប្រធានាធិបតីស្តីទីនិងជានាយករដ្ឋមន្ត្រីកូរ៉េខាងត្បូង Hwang Kyo-ahn មុននឹងបន្តទៅទស្សនកិច្ចនៅតំបន់គ្មានយោធាជាប់ព្រំដែនកូរ៉េខាងជើង (DMZ)។ គេបារម្ភថា វត្តមានរបស់លោក Tillerson នៅតំបន់គ្មានយោធា អាចនឹងជំរុញឲ្យក្រុងព្យុងយ៉ាងធ្វើសកម្មភាពបង្ករឿងផ្សេងទៀតផងដែរ ប៉ុន្តែការអញ្ជើញទៅទស្សនកិច្ចនៅតំបន់ប្រទាញប្រទង់គ្នានេះឆ្លុះបញ្ចាំងពីការប្តេជ្ញាចិត្តរបស់ក្រុងវ៉ាស៊ីនតោនក្នុងការការពារសម្ព័ន្ធមិត្តខ្លួនប្រឆាំងកូរ៉េខាងជើង។
បន្ទាប់ពីកូរ៉េខាងត្បូង រដ្ឋមន្ត្រីការបរទេសអាមេរិករូបនេះ នឹងបន្តដំណើរទៅប្រទេសចិនជាទិសដៅចុងក្រោយនៃទស្សនកិច្ចតំបន់អាស៊ីរបស់លោក។ប្រធានបទសំខាន់ដែលនឹងត្រូវលើកឡើងក្នុងពេលលោកទៅទស្សនកិច្ចមានបញ្ហាសមុទ្រចិនខាងត្បង បញ្ហាកូរ៉េខាងត្បូង និងទស្សនកិច្ចរបស់ប្រធានាធិបតី ស៊ី ជិនពីង ទៅអាមេរិកនិងជួបជាមួយលោកដូណាល់ ត្រាំ នៅខែ មេសាខាងមុខផងដែរ៕
Tag:
Rex Tillerson
កូរ៉េខាងជើង
ជប៉ុន
Fumio Kishida
© រក្សាសិទ្ធិដោយ thmeythmey.com