លីកកំពូលកម្ពុជា៖ បឹងកេតរំកិលឡើងមួយកម្រិតចំណាត់ថ្នាក់ ខណៈណាហ្គាវើលឡើងពីរកម្រិត

កីឡាជាតិ

ជាតិ

លីកកំពូលកម្ពុជា៖ បឹងកេតរំកិលឡើងមួយកម្រិតចំណាត់ថ្នាក់ ខណៈណាហ្គាវើលឡើងពីរកម្រិត

10, Apr 2017 , 10:35 am

រូបភាព

ដោយ:

ក្រោយយកឈ្នះក្រុមអគ្គិសនីកម្ពុជា ៤-០ កាលពីម្សិលមិញ ក្រុមបឹងកេតបានឡើងចំណាត់ថ្នាក់មួយកម្រិតក្នុងសប្តាហ៍ទី៧នៃពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧ ខណៈណាហ្គាវើល ឡើងពីរកម្រិតបន្ទាប់ពីយកឈ្នះអាស៊ីអឺរ៉ុប ៤-០ នៅពហុកីឡដ្ឋានជាតិដូចគ្នា។ ចំណែក ភ្នំពេញក្រោន និងអគ្គិសនីកម្ពុជាបានធ្លាក់ចំណាត់ថ្នាក់ក្រោយចាញ់គូប្រជែង។

ក្រុមឈរលេខរៀងទី៤សប្តាហ៍ទី៦ បឹងកេត បានឡើងមកឈរលេខរៀងទី៣ក្នុងសប្តាហ៍ទី៧នៃពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧ ដោយមាន១៤ពិន្ទុ។ បន្ទាប់ពីក្រុមនេះបានយកឈ្នះក្រុមអគ្គិសនីកម្ពុជា ៤-០ កាលពីម្សិលមិញនៅពហុកីឡដ្ឋានជាតិ។ ក្រុមអគ្គិសនីកម្ពុជាក្រោយចាញ់បឹងកេត បានធ្លាក់មកឈរលេខរៀងទី៦ ដោយរក្សា១០ពិន្ទុដូចកាលឈរលេខរៀងទី៥សប្តាហ៍ទី៦។

រីឯក្រុមណាហ្គាវើល ដែលឈរលេខរៀងទី៦ក្នុងសប្តាហ៍ទី៦បានឡើងមកឈរលេខរៀងទី៤ក្នុងសប្តាហ៍ទី៧ដោយមាន១២ពិន្ទុ បន្ទាប់ពីក្រុមនេះបានយកឈ្នះក្រុមអាស៊ីអឺរ៉ុប ៤-០ នៅពហុកីឡដ្ឋានជាតិ។ ចំណែកក្រុមអាស៊ីអឺរ៉ុប បន្តឈរលេខរៀងទី១០ក្នុងសប្តាហ៍ទី៧ ដោយមាន៣ពិន្ទុ។

ជាមួយគ្នានេះ ក្រុមអគ្គស្នងការនគរបាលជាតិ(ប៉ូលិស)ក្រោយយកឈ្នះក្រុមខេមបូឌានថាយហ្គឺរ ៥-២ នៅកីឡដ្ឋានកងយោធពលខេមរភូមិន្ទ បានឡើងមកឈរលេខរៀងទី៧ដោយមាន៩ពិន្ទុ។ រីឯលេខរៀងទី៨របស់ថាយហ្គឺរ បានជំនួសដោយក្រុមវេស្ទើនភ្នំពេញ ក្រោយយកឈ្នះជើងខ្លាំងភ្នំពេញក្រោន ៣-១ នៅកីឡដ្ឋាន RSN កាលពីថ្ងៃសោរ៍សប្តាហ៍មុន។ ចំណែកភ្នំពេញក្រោនដែលឈរលេខរៀងទី៣ បានធ្លាក់មកឈរលេខរៀងទី៥ ក្រោយប្រកួតចាញ់វេស្ទើនភ្នំពេញ។

ដោយឡែកក្រុមព្រះខ័នរាជស្វាយរៀងបានបន្តឈរកំពូលតារាងដោយមាន១៩ពិន្ទុក្រោយយកឈ្នះក្រុមស៊ីម៉ាក់ ៧-០ នៅកីឡដ្ឋានជាតិស្តាតចាស់ ខណៈក្រុមក្រសួងការពារជាតិក្រោយយកឈ្នះក្រុមគីរីវង់សុខសែនជ័យ ២-០ បានបន្តឈរលេខរៀងទី២ដោយមាន១៧ពិន្ទុ។ ចំណែក ក្រុមគីរីវង់សុខសែនជ័យ និងស៊ីម៉ាក់បានបន្តឈរបានតារាង និងបន្ទាប់បាតតារាងដោយមាន១ពិន្ទុ និង៣ពិន្ទុ៕