ជាតិ
សង្ក្រាន្តឆ្នាំថ្មីមកដល់នាវេលាយប់ម៉ោង៣ និង១២នាទី ឈានចូលថ្ងៃសុក្រ ![](https://image.thmeythmey.com/pictures/2017/04/13/sangkran.jpg)
×![]()
ទេវតាឆ្នាំថ្មី ឆ្នាំរកា នព្វស័ក ពុទ្ធសករាជ២៥៦១ នឹងមកដល់នាវេលាយប់ម៉ោង៣ និង១២នាទី ឈានចូលថ្ងៃសុក្រ ៣រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០១៦ ។ នេះបើតាមសៀវភៅមហាសង្ក្រាន្ត ឆ្នាំរកា ដែលផ្សាយដោយគណៈកម្មការស្រាវជ្រាវវិជ្ជាហោរាស្ត្រ និងប្រពៃណីទំនៀមទម្លាប់ខ្មែរ និងវិទ្យាស្ថានពុទ្ធសាសនបណ្ឌិត្យ។
តាមក្បួនតម្រា នៅឆ្នាំនេះ ទេវធីតាមួយព្រះអង្គជាមគ្គនាយិកាព្រះនាម កិមិរាទេវី ជាបុត្រីទី៦នៃកបិលមហាព្រហ្ម ទ្រង់គង់នៅចាតុម្មហារាជិកា ទ្រង់អម្ពរពណ៌សេត លំអនៅព្រះកាណ៌ដោយបុប្ផា ចង្កូរណី អភរណៈកែវបុស្សរាគ័ម ភក្សាហារទ្រង់ចេកណាំវ៉ា ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ពិណ ទ្រង់គង់ផ្ទំបិទព្រះនេត្រលើខ្នងមហឹង្សា (សត្វក្របី)ជាពាហនៈ។
ព្រះនាងកិមិរាទេវី នាំអស់ទេវបុត្រ ទេវធីតាទាំងមួយសែនកោដិហោះទៅកាន់គុហាកែវធម្មាលីនាទីភ្នំកៃលាស ខេត្តហិមពា្តជាទីតម្កល់ទុកនូវព្រះសិរសាកបិលមហាព្រហ្ម ដែលតម្កល់លើពានមាសនាំមកដង្ហែប្រទក្សិណភ្នំព្រះសុមេរុរាជតាមផ្លូវព្រះអាទិត្យចរចំនួន៦០នាទី (២៤ម៉ោង)។
បន្ទាប់មក ព្រះនាងនាំយកទៅតម្កល់ទុកកន្លែងដើមវិញ ហើយប្រជុំទេវបុត្រ ទេវធីតាទាំងមួយសែនកោដិ ចូលទៅស្រង់ទឹកអានោតត្តមហាស្រះ ដែលមានទឹកហូរចេញពីបំពង់ថ្មកែវ ដែលជាមាត់គោឧសភរាជទាំង៧ត្រជាក់ក្សេមក្សាន្តក្នុងព្រះរាជហប្ញទ័យ ហើយនាំគ្នាចូលទៅសមាទានរក្សាសីលដោយសោមនស្សរីករាយគ្រប់ព្រះអង្គក្នុងភគវតីសភាសាលា ដែលវិស្សកម្មទេបុត្រនិមិត្តថ្វាយដើម្បីបន្ទោបង់អពមង្គលឲ្យជ្រះស្រឡះ ហើយចម្រើននូវសិរីសួស្តី ជ័យមង្គល ជន្មាយុយឺនយូរដល់ទេវតា និងមនុស្សសត្វផងទាំងឡាយតាំងពីឆ្នាំថ្មីចូលមកដល់នេះ បានធូរទូលំទូលាយ សុខក្សេមក្សាន្តតរៀងទៅ៕
© រក្សាសិទ្ធិដោយ thmeythmey.com