អន្តរជាតិ
អូស្ត្រាលី ផ្អាកប្រតិបត្តិការដែនអាកាសនៅស៊ីរី ក្រោយរុស្ស៊ីគំរាមបាញ់ទម្លាក់
× ប្រតិបត្តិការដែនអាកាសរបស់អូស្ត្រាលីនៅស៊ីរី ត្រូវបានទទួលបញ្ជាឲ្យផ្អាកសិននៅថ្ងៃទី២០ ក្រោយមានការគំរាមពីសំណាក់រុស្ស៊ី។ ការបាញ់ទម្លាក់យន្តហោះរដ្ឋាភិបាលស៊ីរីដែលកំពុងធ្វើប្រតិបត្តិការដោយយន្តហោះចម្បាំងអាមេរិកនៅថ្ងៃទី១៨ ខែមិថុនា គឺជាមូលហេតុនាំឲ្យរុស្ស៊ីមិនសប្បាយចិត្ត និងបានព្រមានបាញ់យន្តហោះរបស់ក្រុមចម្រុះដឹកនាំដោយអាមេរិកនៅស៊ីរីវិញ។ ក្រសួងការពារជាតិអូស្ត្រាលីនិយាយថា នេះជាវិធានការការពារទុកសម្រាប់ទាហានរបស់ខ្លួន។
យន្តហោះរបស់ក្រុមសម្ព័ន្ធមិត្តអាមេរិកដែលកំពុងប្រតិបត្តិការនៅស៊ីរី កំពុងប្រឈមមុខគ្រោះថ្នាក់ខ្លាំង បន្ទាប់ពីរុស្ស៊ីគំរាមបាញ់ទម្លាក់រាល់យន្តហោះដែលធ្វើប្រតិបត្តិការនៅខាងលិចទន្លេ Euphrates ។ ការគំរាមរបស់រុស្ស៊ីធ្វើឡើងបន្ទាប់យន្តហោះអាមេរិកបាញ់ទម្លាក់យន្តហោះស៊ីរីដែលកំពុងវាយប្រហារគោលដៅក្រុមរដ្ឋឥស្លាមនៅក្បែរក្រុង Raqqa ដែលមូលដ្ឋានរឹងមាំរបស់ក្រុមជ្រុលនិយមមួយនៅលើទឹកដីស៊ីរី។
ក្នុងគោលដៅការពារកងទ័ពរបស់ខ្លួន អូស្ត្រាលីដែលបានបញ្ជូនយន្តហោះចូលរួមក្នុងក្រុមចម្រុះរបស់អាមេរិក ក៏សម្រេចចិត្តផ្អាកការហោះហើររបស់យន្តហោះខ្លួនសិន។ ក្នុងសេចក្ដីប្រកាសព័ត៌មានថ្ងៃទី២០ ខែមិថុនា ក្រសួងការពារជាតិអូស្ត្រាលីបញ្ជាក់ថា កងទ័ពរបស់ខ្លួនកំពុងពិនិត្យស្ថានការណ៍ដែនអាកាសឲ្យបានច្បាស់លាស់ ហើយការសម្រេចចិត្តចាប់ផ្ដើមប្រតិបត្តិឡើងវិញ ឬអត់នោះ នឹងធ្វើឡើងតាមកាលៈទេសៈជាក់ស្ដែង។
បើតាមទីភ្នាក់ងារព័ត៌មាន Reuters កងទ័ពអូស្ត្រាលីនឹងបន្តប្រតិបត្តិការរបស់ខ្លួនក្នុងក្រុមចម្រុះនៅអ៊ីរ៉ាក់ដដែល។ ទន្ទឹមគ្នានេះ អូស្ត្រាលីក៏ពិនិត្យឲ្យម៉ត់ចត់ស្ថានភាពនៅស៊ីរី ដើម្បីបញ្ចៀសគ្រោះថ្នាក់ និងការគំរាមផ្សេងៗលើកងទ័ពរបស់ខ្លួន។ នេះក៏ព្រោះតែរុស្ស៊ីបានគំរាមហើយថាមីស៊ីល និងយន្តហោះរបស់ខ្លួន នឹងបាញ់មិនរើសមុខរាល់យន្តហោះណាដែលហោះចូលក្នុងបរិវេណតំបន់ខាងលិចទន្លេ Euphrates ។
ក្រោយការបាញ់ទម្លាក់យន្តហោះស៊ីរីធុន Su-22 រុស្ស៊ីដែលតែងជួយគាំទ្ររបបរដ្ឋាភិបាលស៊ីរីរហូតមក បានសម្រេចផ្លាស់ប្ដូរឥរិយាបថរបស់ខ្លួន ដើម្បីឆ្លើយតបទង្វើរបស់ក្រុមចម្រុះដឹកមុខដោយអាមេរិក។ ការបាញ់ទម្លាក់យន្តហោះដែលរដ្ឋាភិបាលស៊ីរីអះអាងថាកំពុងកម្ទេចក្រុមជ្រុលនិយម គឺជាសកម្មភាពលើកទីមួយរបស់សម្ព័ន្ធមិត្តអាមេរិកក្នុងរយៈពេលច្រើនឆ្នាំនៃជម្លោះស៊ីរី ខណៈពីមុនមកក្រុមចម្រុះមិនដែលបាញ់ដូចនេះឡើយ។
រុស្ស៊ី ទំនងជាខឹងសម្បារខ្លាំងដែលទ័ពចម្រុះធ្វើសកម្មភាពដោយមិនប្រាប់ខ្លួននោះ បើទោះជារុស្ស៊ី និងអាមេរិកមានកិច្ចព្រមព្រៀបញ្ចៀសគ្រោះថ្នាក់ក៏ដោយចុះ។ បច្ចុប្បន្នរុស្ស៊ីមានប្រព័ន្ធការពារដែនអាកាសច្រើនប្រភេទពង្រាយនៅមូលដ្ឋានទ័ពមួយចំនួននៅស៊ីរី។ ប្រព័ន្ធការពារដែនអាកាសទាំងនោះមានទាំង ប្រព័ន្ធ S-400, S-300 និងប្រព័ន្ធផ្សេងទៀត ត្រូវបានបញ្ជូនទៅស៊ីរីចាប់ពីចុងឆ្នាំ២០១៥ ក្រោយពេលដែលយន្តហោះចម្បាំង Su-24 របស់ខ្លួនត្រូវកងទ័ពតួកគីបាញ់ធ្លាក់នៅព្រំដែនស៊ីរីនោះ៕
Tag:
អូស្ត្រាលី
ស៊ីរី
រុស្ស៊ី
អាមេរិក
© រក្សាសិទ្ធិដោយ thmeythmey.com