ជាតិ
មេសហជីព ថា កម្មករនឹងទទួលបានផលវិជ្ជមានច្រើន ក្នុងជំនួបជាមួយសម្ដេច ហ៊ុន សែន
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន គ្រោងជួបកម្មករនៅតាមរោងចក្រ ដើម្បីពិនិត្យមើលទៅលើស្ថានភាពការងារនិងការរស់នៅពួកគេ។ មេសហជីពនៅកម្ពុជា សន្និដ្ឋានថា ជំនួបប្រមុខរដ្ឋាភិបាល និងកម្មករនេះ នឹងអាចមានច្រកចេញច្រើន ក្នុងការដោះស្រាយបញ្ហាទុក្ខលំបាករបស់កម្មករ។
ដំណឹងសម្ដេច ហ៊ុន សែន ចុះជួបកម្មករនៅតាមរោងចក្រនេះ ត្រូវបានមេសហជីពនៅកម្ពុជា សាទរយ៉ាងខ្លាំង។ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ យល់ថា បើសម្ដេច ហ៊ុន សែន ចុះជួបកម្មករមែននោះ វាគឺជាឱកាសល្អមួយ សម្រាប់កម្មករទូទាំងប្រទេសកម្ពុជា ដែលអាចបង្ហាញពីទុក្ខលំបាករបស់ពួកគេ ក្នុងការបំពេញការងារកន្លងមក។ លោក ប៉ាវ ស៊ីណា ជឿជាក់ថា បញ្ហាដែលកម្មករលើកចំពោះមុខប្រមុខរដ្ឋាភិបាលផ្ទាល់នោះ វាអាចមានដំណោះស្រាយច្រើន សម្រាប់កម្មករទាំងនោះ។
ថ្លែងប្រាប់សារព័ត៌មានថ្មីៗ ប្រធានសម្ព័ន្ធសហជីពចលនាកម្មកររូបនេះ បានបញ្ជាក់ដូច្នេះថា៖«ខ្ញុំមើលឃើញដែរពីចំណុចវិជ្ជមានថា បើជំនួបនោះកើតឡើងវា អាចមានការវិវត្តច្រើន ព្រោះទី១ វាជិតរដូវការបោះឆ្នោត ។ ទី២ ខ្ញុំសង្កេតឃើញ នៅពេលដែលកម្មករជួបប្រមុខរដ្ឋាភិបាលផ្ទាល់ តែងតែមានការវិវត្តមកដល់ម៉ោងនេះ មានទាំងការវិវត្តការចរចាប្រាក់ឈ្នួលតាមរយៈរដ្ឋាភិបាលចម្រុះ។ ហើយក៏មានការកែទម្រង់គោលនយោបាយ ដូចជាបញ្ហាទឹក ភ្លើង ហានិភ័យការងារ បញ្ហាសុខភាព រួមទាំងបញ្ហាជាប់ពន្ធរបស់កម្មករជាដើម។ ទាំងអស់នេះខ្ញុំមើលឃើញថា វាក៏ជាសម្មិទ្ធផលដែលសហជីព និងរដ្ឋាភិបាលជជែកគ្នាដែរ»។
បញ្ហាប្រាក់ឈ្នួលទាប លក្ខខណ្ឌការងារអាក្រក់ និយោជកធ្វើបាប និងមន្ត្រីមួយចំនួនកេងប្រវ័ញ្ចកម្លាំងញើសឈាមកន្លងមកនេះ គឺសុទ្ធតែជាបញ្ហាដែលកម្មករ ត្រូវរៀបរាប់ដោយផ្ទាល់ចំពោះមុខនាយករដ្ឋមន្ត្រី។ នេះជាការលើកឡើងរបស់លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(CCAWDU) ដែលជំរុញឲ្យកម្មករយកឱកាសល្អមួយនេះ ស្នើរដ្ឋាភិបាលដោះស្រាយបញ្ហាពួកគេបន្ថែមទៀត។
លោក អាត់ ធន់ បានបញ្ជាក់ដូច្នេះថា៖«កម្មករអាចយកឱកាសជួបប្រមុខរដ្ឋាភិបាលនោះ ស្នើឲ្យមានការផ្លាស់ប្តូរនូវបញ្ហាអវិជ្ជមានកន្លងទៅ។ ហើយត្រង់ថា ប្រមុខរដ្ឋាភិបាលចុះទៅជួបកម្មករយកបញ្ហាអវិជ្ជមានទាំងនោះ មកដោះស្រាយវាជារឿងល្អ ប៉ុន្តែបើគាត់(ហ៊ុន សែន)ចុះទៅហើយ មិនយកបញ្ហាកម្មករមកដោះស្រាយ ហើយស្ដាប់តែមន្ត្រីរដ្ឋាភិបាលដដែល ក៏វាគ្មានន័យអ្វីដែរ»។
បន្ថែមពីលើនេះ សមាគមរោងចក្រកាត់ដេរនៅកម្ពុជា ហៅកាត់ថា GMAC ចាត់ទុកថា ជំនួបសម្ដេច ហ៊ុន សែន និងកម្មកនាពេលខាងមុខ នឹងអាចលើកកម្ពស់ជីវភាពរស់នៅកម្មកររោងចក្រទូទាំងប្រទេស ឲ្យកាន់តែប្រសើរឡើង។ ហើយវាក៏ឱកាសនៃការសន្ទនាដោយផ្ទាល់រវាងប្រមុខរដ្ឋាភិបាល និងក្រុមថៅកែរោងចក្រ ក្នុងការស្វែងយល់បន្ថែមទៀតពីបញ្ហាប្រឈមនៅក្នុងការវិនិយោគរបស់ពួកគេ ធ្វើយ៉ាងណាធានាឲ្យបាននូវនិរន្តរភាពនៃវិស័យឧស្សាហកម្មនេះផងដែរ។
ក្តីរំពឹងនៃក្នុងការដោះស្រាយបញ្ហាកម្មកររបស់ភាគីសមាគមរោងចក្រកាត់ដេរនៅកម្ពុជា (GMAC) និងមេសហជីពនេះ ធ្វើឡើងក្រោយពីមានដំណឹងថា លោកនាយករដ្ឋមន្ត្រី គ្រោងជួបប្រជុំជាមួយកម្មករ-កម្មការី នៅថ្ងៃទី២០ ខែសីហា ខាងមុខ។
យោងតាមទិន្នន័យពីសមាគមរោងចក្រកាត់ដេរនៅកម្ពុជា (GMAC) បច្ចុប្បន្នសមាគមនេះ មានសមាជិកចំនួន ៥១២ ដោយក្នុងចំណោម ៥៩ក្នុងវិស័យស្បែកជើង ហើយវិស័យនេះបានស្រូបយកការងារជាង ៧០ ម៉ឺននាក់ ។ បច្ចុប្បន្នកម្មកររោងចក្រទូទាំងប្រទេស ទទួលបានប្រាក់ខែគោល១៥៣ដុល្លារ។ ជុំវិញបញ្ហាប្រាក់ខែនេះ ភាគីខាងសហជីពមួយចំនួន ត្រៀមជួបប្រជុំជាមួយភាគីខាងថៅកែរោងចក្រ និងរដ្ឋាភិបាល នាខែកញ្ញា ឆ្នាំ២០១៧ ដើម្បីស្នើសុំឲ្យមានការដំឡើងបន្ថែមទៀត សម្រាប់ប្រាក់ខែគោលរបស់កម្មករនៅឆ្នាំ២០១៨។
ប្រាក់ខែកម្មករ ១៥៣ដុល្លារនេះ បង្ហាញថា កម្មករកម្ពុជាមានលទ្ធភាពទទួលប្រាក់បៀវត្សខ្ពស់ជាងកម្មករនៅប្រទេសភូមា ឡាវ និងបង់ក្លាដេសជាដើម ខណៈដែលកម្មកររោងចក្រនៅប្រទេសវៀតណាមទទួលបានប្រាក់ខែជាង១៦០ដុល្លារ និងកម្មករនៅប្រទេសថៃ ទទួលបានប្រាក់ខែ៣០០ដុល្លារ។ នេះបើតាមលោក អាត់ ធន់ ដែលបន្ថែមដូច្នេះថា៖«មូលហេតុដែលយើងចង់ទាមទាឲ្យដំឡើងប្រាក់ខែដល់កម្មករនោះ ព្រោះប្រាក់ខែកម្មករយើង១៥៣ដុល្លារ និងធ្វើការថែមម៉ោងបានជាង២០០ដុល្លារនេះ មិនអាចចាយវាយគ្រាប់គ្រាន់ទេ ដោយសារតែអតិផលណា និងថ្លៃទំនិញស្រុកយើងថ្លៃ។ ប៉ុន្តែនៅវៀតណាម និងថៃវិញ ប្រាក់ខែគេលើសយើងតិចតួចទេ តែតម្លៃទំនិញពួកគេថោក ដូច្នេះពួកគេអាចចំណាយគ្រប់គ្រាន់សម្រាប់ជីវភាពរស់នៅស្រុកគេ»។
Tag:
ហ៊ុន សែន
កម្មកររោងចក្រ
© រក្សាសិទ្ធិដោយ thmeythmey.com