ប្រធានក្រុមប្រឹក្សាស្រុកក្រឡាញ់ លោក កែវ សុខុម ស្លាប់ដោយសារគ្រោះថ្នាក់ចរាចរណ៍

ជាតិ

ប្រធានក្រុមប្រឹក្សាស្រុកក្រឡាញ់ លោក កែវ សុខុម ស្លាប់ដោយសារគ្រោះថ្នាក់ចរាចរណ៍

13, Oct 2017 , 12:23 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ លោក កែវ សុខុម ដែលគេស្គាល់ថាជាប្រធានក្រុមប្រឹក្សាស្រុកក្រឡាញ់ ខេត្តសៀមរាប បានទទួលមរណភាព ក្នុងហេតុការណ៍គ្រោះថ្នាក់ចរាចរណ៍មួយនៅល្ងាចថ្ងៃទី១២ ខែតុលា ឆ្នាំ២០១៧។

តាមរបាយការណ៍របស់សមត្ថិកិច្ចស្រុកក្រឡាញ់ គ្រោះថ្នាក់ចរាចរណ៍ដែលបង្កឡើងដោយម៉ូតូ និងរថយន្តបាឡែន កើតឡើងនៅវេលាម៉ោង ៦និង១០នាទីល្ងាចថ្ងៃទី១២ ខែតុលា ត្រង់ចំណុចផ្លូវរាងអក្សរ តេ (T) កែងផ្លូវជាតិលេខ ៦៨ និងផ្លូវជាតិលេខ៦ នៅស្រុកក្រឡាញ់ ឬផ្លូវទៅខេត្ត ឧត្តរមានជ័យ។

អធិការស្រុកក្រឡាញ់ លោក ជី បេងជន បានប្រាប់សារព័ត៌មានថ្មីៗនៅព្រឹកថ្ងៃទី១៣ ខែតុលាថា លោក កែវ សុខុម បានជិះម៉ូតូចេញស្នាក់ការបក្សស្ថិតនៅភូមិត្រពាំងច្រាំង ក្នុងគោលដៅទៅផ្ទះ ហើយមកដល់ចំណុចកើតហេតុខាងលើ ក៏មានរថយន្តមួយគ្រឿង បើកពីក្រោយក្នុងល្បឿនលឿន និងដោយភាពស្រវឹង មកបុកម៉ូតូជនរងគ្រោះពីក្រោយ ហើយរថយន្តបានរាចង្កូតបុកដើមឈើ និងធ្លាក់ទឹកប្រឡាយតែម្តង។ លោកបន្ថែមទៀតថា ក្រោយអន្តរាគមន៍ភ្លាម កម្លាំងអធិការស្រុកក្រឡាញ់ បានជួយវាយកញ្ចក់ឡាន និងបានជួយ សង្គ្រោះបានម្នាក់ជាតៃកង់ឡាន និងម្នាក់ទៀតជិះជាមួយ បានស្លាប់៕

បច្ចុប្បន្ន អធិការដ្ឋានស្រុកក្រឡាញ់ បានបញ្ជូនសំណុំរឿងនេះដល់ថ្នាក់លើ និងរៀបចំចាត់ការ ទៅតាមផ្លូវច្បាប់។ ចំណែកសាកសពលោក កែវ សុខុម ត្រូវបានក្រុមគ្រួសាររៀបចំពិធីបុណ្យ ទៅតាមប្រពៃណី៕