ជាតិ
របាយការណ៍៖«កម្ពុជាស្ថិតក្នុងចំណោមប្រទេសដប់ទទួលជំនួយអភិវឌ្ឍន៍ពីចិនច្រើនជាងគេ»
× របាយការណ៍ថ្មីមួយស្តីពីជំនួយអភិវឌ្ឍន៍បានបង្ហាញថា មហាយក្សចិនបានផ្តល់ជំនួយអភិវឌ្ឍន៍ក្នុងទំហំ ៣៥៤,៣ពាន់លានដុល្លារក្នុងរយៈពេល ១៥ ឆ្នាំ ទៅប្រទេសជាង១០០ លើពិភពលោក។ កម្ពុជាស្ថិតក្នុងចំណោមប្រទេសដប់ ដែលទទួលជំនួយអភិវឌ្ឍន៍ពីចិនច្រើនគេផងដែរ ដែលជំនួយនោះមានទំហំប្រមាណ ៣ពាន់លានដុល្លារអាមេរិក។
របាយការណ៍ថ្មីមួយនៃស្ថាប័នស្រាវជ្រាវ AidData ដែលចេញផ្សាយកាលពីសប្តាហ៍មុនបង្ហាញថា ប្រទេសកម្ពុជាស្ថិតនៅលេខរៀងទីប្រាំបី ក្នុងចំណោមប្រទេសចំនួនដប់ ដែលទទួលបានជំនួយអភិវឌ្ឍន៍ពីចិនច្រើនជាងគេ ខណៈគុយបាស្ថិតក្នុងលេខរៀងទីមួយឯណោះ។ កម្ពុជាទទួលបានជំនួយសរុប ៣ពាន់លានដុល្លារអាមេរិកចន្លោះពីឆ្នាំ ២០០០ ដល់ឆ្នាំ ២០១៤។
បើតាមរបាយការណ៍របស់ស្ថាប័នស្រាវជ្រាវដដែល រដ្ឋាភិបាលចិននេះបានផ្តល់ជំនួយអភិវឌ្ឍន៍ក្នុងទំហំទឹកប្រាក់រហូតដល់ ៣៥៤,៣ ពាន់លានដុល្លារអាមេរិកឯណោះពីឆ្នាំ ២០០០ ដល់ ២០១៤ ទៅកាន់ប្រទេស ១៤០ ទូទាំងពិភពលោក។
ប្រទេសទាំងដប់ដែលទទួលជំនួយពីចិនច្រើនជាងគេមានដូចខាងក្រោម៖
១.គុយបា ទទួលបានជំនួយ ៦,៧ពាន់លានដុល្លារអាមេរិក
២.កូឌីវ័រ បានទទួលជំនួយ ៤ពាន់លានដុល្លារអាមេរិក
៣.អេត្យូពី បានទទួលជំនួយ ៣,៧ ពាន់លានដុល្លារអាមេរិក
៤.ស៊ីមបាវ៉េ បានទទួលជំនួយ ៣,៦ពាន់លានដុល្លារអាមេរិក
៥.កាមេរ៉ូន បានទទួលជំនួយ ៣,៤ ពាន់លានដុល្លារអាមេរិក
៦.នីហ្សេរីយ៉ា បានទទួលជំនួយ ៣,១ ពាន់លានដុល្លារអាមេរិក
៧.តង់សានី បានទទួលជំនួយ ៣ ពាន់លានដុល្លារអាមេរិក
៨.កម្ពុជា បានទទួលជំនួយ ៣ ពាន់លានដុល្លារអាមេរិក
៩.ស្រីលង្ការ បានទទួលជំនួយ ២,៨ ពាន់លានដុល្លារអាមេរិក
១០.ហ្កាណា បានទទួលជំនួយ ២,៥ ពាន់លានដុល្លារអាមេរិក៕
Tag:
AidDat
ជំនួយអភិវឌ្ឍន៍
ចិន
កម្ពុជា
© រក្សាសិទ្ធិដោយ thmeythmey.com