អន្តរជាតិ
ហ្វីលីពីនមិនចូលរួមក្នុងកិច្ចព្រមព្រៀងពាណិជ្ជកម្ម TPP ឡើយ ដរាបណាគ្មានអាមេរិក ![](https://image.thmeythmey.com/pictures/2017/10/16/trump-duterte.jpg)
×![]()
រដ្ឋមន្ត្រីហិរញ្ញវត្ថុហ្វីលីពីនបានបញ្ជាក់ពីជំហររបស់ហ្វីលីពីនជាថ្មីម្តងទៀតនៅសប្តាហ៍មុនពាក់ព័ន្ធការឈានទៅចូលរួមក្នុងកិច្ចព្រមព្រៀងពាណិជ្ជកម្មស្តង់ដាមាស «ភាពជាដៃគូអន្តរប៉ាស៊ីហ្វិក» (Trans Pacific Partnership)។ ហ្វីលីពីនមិនចូលរួមក្នុងកិច្ចព្រមព្រៀងនេះជាដាច់ខាត បើគ្មានអាមេរិកនោះ។
ក្នុងវេទិកាពិភាក្សារៀបចំឡើងដោយមជ្ឈមណ្ឌសម្រាប់ការសិក្សាយុទ្ធសាស្ត្រនិងសិក្សាអន្តរជាតិ (CSIS) នាក្រុងវ៉ាស៊ីនតោនចុងសប្តាហ៍មុន លោក Carlos Sonny Dominguez រដ្ឋមន្ត្រីហិរញ្ញវត្ថុហ្វីលីពីនបានប្រកាសថា ហ្វីលីពីននឹងមិនចូលរួមក្នុងកិច្ចព្រមព្រៀងភាពជាដៃគូអន្តរប៉ាស៊ីហ្វិកនោះឡើយ។
យោងតាមសារព័ត៌មានហ្វីលីពីន Manila Bulletin លោក Carlos បានពន្យល់ថា ហ្វីលីពីនមិនអាចចូលរួមក្នុងកិច្ចព្រមព្រៀងពាណិជ្ជកម្មនេះឡើយ ព្រោះវាគ្មានន័យឡើយបើគ្មានអាមេរិកចូលរួមនោះ។
លោកបានបញ្ជាក់ដូច្នេះ៖« យើងមិនចូលរួមក្នុងកិច្ចព្រមព្រៀង TPP ឡើយ។ គ្មានអាមេរិក ខ្ញុំគិតថា វាគ្មានន័យថាអ្វីទេ។ ដូច្នេះយើងត្រូវធ្វើអ្វីផ្សេងវិញ»។
យ៉ាងណាក៏ដោយ ការលើកឡើងរបស់រដ្ឋមន្ត្រីហិរញ្ញវត្ថុរូបនេះហាក់បីដូចជាខុសពីសម្តីរដ្ឋមន្ត្រីពាណិជ្ជកម្ម Ramon Lopez ដែលបានបង្ហាញចំណាប់អារម្មណ៍ចូលរួមក្នុងកិច្ចព្រមព្រៀងពាណិជ្ជកម្មស្តង់ដាមាសនេះកាលពីថ្មីៗកន្លងទៅ។ លោកបានអធិប្បាយក្នុងជំនួបជាមួយរដ្ឋមន្ត្រីពាណិជ្ជកម្មជប៉ុនលោក Hiroshige Seiko ថា កិច្ចព្រមព្រៀងនេះនឹងបើកចំហទីផ្សាថ្មីកាន់តែធំសម្រាប់ការនាំចេញផលិតផលពីហ្វីលីពីនផង។
តាមពិតទៅ អាមេរិកជាសមាជិកដើមនៃកិច្ចព្រមព្រៀងភាពជាដៃគូអន្តរប៉ាស៊ីហ្វិកនេះ និងបានចូលរួមចរចារហូតដល់សម្រេចបានជាផ្លូវការនៅខែតុលាឆ្នាំ ២០១៥ ក្រោមអាណត្តិលោក បារ៉ាក់ អូបាម៉ា។ ប៉ុន្តែ ថ្ងៃ ២៤ ខែមករា លោក ដូណាល់ ត្រាំ បានប្រកាសដកអាមេរិកចេញពីកិច្ចព្រមព្រៀងនេះ។ កិច្ចព្រមព្រៀងពាណិជ្ជកម្មដែលមានភាគីចូលរួមសរុប ១១ទាំងអាមេរិកនោះ ត្រូវបានលោក ត្រាំ ពិពណ៌នាថាជាកិច្ចព្រមព្រៀងអាក្រក់ និងធ្វើឲ្យអាមេរិកខាតប្រយោជន៍ផង។
សូមបញ្ជាក់ថា សមាជិកកិច្ចព្រមព្រៀងភាពជាដៃគូអន្តរប៉ាស៊ីហ្វិកទាំង ១២នោះមានដូចជា កាណាដា, ព្រុយណេ, ម៉ាឡេស៊ី, ស៊ីលី, ម៉ិកស៊ិក, នូវែលសេឡង់. ប៉េរូ, ជប៉ុន, សិង្ហបុរី, វៀតណាម អូស្ត្រាលី និងសហរដ្ឋអាមេរិក។ ក្រោយអាមេរិកចាកចេញទៅ សមាជិកនៅសេសសល់បានសន្យាបន្តដំណើរទៅមុខ និងធ្វើឲ្យកិច្ចព្រមព្រៀងនេះចេញរូបរាងជាផ្លូវការផងដែរ៕
Tag:
ហ្វីលីពីន
TPP
អាមេរិក
Carlos Sonny Dominguez
© រក្សាសិទ្ធិដោយ thmeythmey.com