អន្តរជាតិ
ឯកអគ្គរដ្ឋទូតអាមេរិកនៅ UN ថា អាមេរិកនឹងធ្វើឲ្យកិច្ចព្រមព្រៀងនុយក្លេអ៊ែរអ៊ីរ៉ង់ប្រសើរជាងមុន ![](https://image.thmeythmey.com/pictures/2017/10/16/nikki.jpg)
×![]()
ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley បានបញ្ជាក់ប្រាប់អ្នកសារព័ត៌មានថា សហរដ្ឋអាមេរិកសង្ឃឹមថា ខ្លួនអាចបន្តនៅជាសមាជិកកិច្ចព្រមព្រៀងនុយក្លេអ៊ែរអ៊ីរ៉ង់ដើម្បីធ្វើឲ្យកិច្ចព្រមព្រៀងនេះប្រសើរជាងមុន។ ការបញ្ជាក់នេះ កើតឡើងក្រោយពេលលោក ដូណាល់ ត្រាំ បដិសេធទទួលស្គាល់ថា អ៊ីរ៉ង់បានអនុវត្តកិច្ចព្រមព្រៀងអន្តរជាតិនេះបានពេញលេញឡើយ។
ក្នុងបទសម្ភាសន៍ក្នុងកម្មវិធីជួបជាមួយអ្នកកាសែត រៀបចំឡើងដោយសារព័ត៌មាន NBC ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley បានបញ្ជាក់ថា គេអាចនឹងឃើញអាមេរិកនៅបន្តវត្តមានក្នុងកិច្ចព្រមព្រៀងនុយក្លេអ៊ែរអ៊ីរ៉ង់ដដែល។
បេសកជនពិសេសអាមេរិកប្រចាំអង្គការសហប្រជាជាតិខាងលើបានលើកឡើងដូច្នេះ៖ «ខ្ញុំគិតថា អ្នកនឹងឃើញ យើងបន្តជាសមាជិកនៃកិច្ចព្រមព្រៀងនេះ។ អ្វីដែលយើងសង្ឃឹមគឺថា យើងនឹងអាចធ្វើឲ្យស្ថានភាពកាន់តែល្អប្រសើរ។ វាជាគោលដៅរបស់យើង»។
«ដូច្នេះហើយ ខ្ញុំគិតថា បច្ចុប្បន្ន យើងបន្តនៅជាសមាជិកក្នុងកិច្ចព្រមព្រៀងដើម្បីស្វែងរកដំណោះស្រាយធ្វើឲ្យកិច្ចព្រមព្រៀងនេះវាកាន់តែល្អជាងមុន។ វាមិនមែន យើងកំពុងចាកចេញពីកិច្ចព្រមព្រៀងទេ។ វាកំពុងព្យាយាមធ្វើឲ្យស្ថានការណ៍ល្អប្រសើរ ហើយប្រជាជនអាមេរិកមានអារម្មណ៍ថាមានសុវត្ថិភាពជាងមុន»។ លោកស្រី Haley បន្តដូច្នេះ។
សប្តាហ៍មុន ប្រធានាធិបតីអាមេរិកលោក ដូណាល់ ត្រាំ បានបដិសេធទទួលស្គាល់ថា អ៊ីរ៉ង់បានអនុវត្តកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ បានពេញលេញ។ លោកបានឆ្លៀតឱកាសទិតៀន និងចោទប្រកាន់អ៊ីរ៉ង់រឿងរំលោភកិច្ចព្រមព្រៀង។ លោក ថែមទាំងគំរាមដកអាមេរិកចេញពីកិច្ចព្រមព្រៀងប្រវត្តិសាស្ត្រនេះដែរ ក្នុងករណីដែលលោក និងសភាអាមេរិក រួមទាំងសម្ព័ន្ធមិត្តមិនអាចរកចំណុចរួមគ្នាឃើញដើម្បីកែកិច្ចព្រមព្រៀងនិងដាក់លក្ខខណ្ឌថ្មីព្រោះលោកមានអំណាចពេញលេញក្នុងនាមជាប្រធានាធិបតីអាមេរិកនោះ។
ពាក់ព័ន្ធបញ្ហានេះ លោកស្រីបានពន្យល់អ្នកសារព័ត៌មានថា លោក ត្រាំ ព្យាយាមធ្វើអ្វីៗដើម្បីឲ្យកិច្ចព្រមព្រៀងនុយក្លេអ៊ែរនេះប្រសើរជាងមុន និងអាចបញ្ឈប់អ៊ីរ៉ង់ពីការបង្កបញ្ហានៅក្នុងតំបន់ប៉ុណ្ណោះ។ សម្រាប់លោកស្រី អ៊ីរ៉ង់ មិនទាន់បានអនុវត្តតាមកិច្ចព្រមព្រៀងដែលមានឡើយ ហើយអាមេរិកចង់ឃើញអ៊ីរ៉ង់ទទួលខុសត្រូវខ្លាំងជានេះក្នុងការអនុវត្តកិច្ចព្រមព្រៀង។
លោកស្រីបន្តដូច្នេះ៖ អ្វីដែលយើងព្យាយាមនិយាយគឺថា កិច្ចព្រមព្រៀងនេះជាការលើកទឹកចិត្ត។ កិច្ចព្រមព្រៀងនេះគឺតម្រូវឲ្យអ្នកបញ្ឈប់ធ្វើរឿងរ៉ាវជាក់លាក់មួយចំនួន។ អ្នកមិនបានបញ្ឈប់សកម្មភាពទាំងនោះឡើយ។ ដូច្នេះហើយ តើយើងត្រូវធ្វើអ្វីដើម្បីបង្ខំឲ្យអ៊ីរ៉ង់មានការទទួលខុសត្រូវច្រើនជាងមុននោះ?»
សូមបញ្ជាក់ថា កិច្ចព្រមព្រៀងនុយក្លេអ៊ែរអ៊ីរ៉ង់ មានឈ្មោះផ្លូវការថា ផែនការសកម្មភាពគ្រប់ជ្រុងជ្រោយរួម (JCPOA) ដែលត្រូវបានបង្កើតឡើងដោយអ៊ីរ៉ង់ និងមហាអំណាចប្រាំ បូកអាល្លឺម៉ង់នាឆ្នាំ ២០១៥។ វា ជាកិច្ចព្រមព្រៀងប្រវត្តិសាស្ត្រមួយដែលរួមចំណែកក្នុងការបញ្ចប់បញ្ហានុយក្លេអ៊ែរអ៊ីរ៉ង់ និងជួយពង្រឹងការទប់ស្កាត់ការរីកសាយភាយនុយក្លេអ៊ែរនៅទូទាំងពិភពលោកផង។ នៅក្រោមកិច្ចព្រមព្រៀងនេះ អ៊ីរ៉ង់សម្រេចចិត្តផ្អាកកម្មវិធីអភិវឌ្ឍនុយក្លេអ៊ែររបស់ខ្លួន ជាថ្នូរនឹងការលើកលែង ឬលុបចោលទណ្ឌកម្មរបស់អន្តរជាតិ៕
Tag:
UN
កិច្ចព្រមព្រៀងនុយក្លេអ៊ែរអ៊ីរ៉ង់
ដូណាល់ ត្រាំ
Nikki Haley
© រក្សាសិទ្ធិដោយ thmeythmey.com