អន្តរជាតិ
តៃវ៉ាន់ សុំឲ្យថៃលើកលែងទិដ្ឋាការដើម្បីបង្កើនភ្ញៀវទេសចរនិងវិនិយោគខ្លួននៅថៃ ![](https://image.thmeythmey.com/pictures/2017/10/16/taiwan.jpg)
×![]()
រដ្ឋាភិបាលកោះតៃវ៉ាន់ បានស្នើឲ្យរដ្ឋាភិបាលថៃលើកលែងទិដ្ឋាការសម្រាប់ពលរដ្ឋខ្លួន ដូចដែលតៃវ៉ាន់ បានធ្វើចំពោះថៃដែរ ។ សំណើនេះធ្វើឡើងដោយតៃវ៉ាន់ មើលឃើញថា វានឹងផ្តល់អត្ថប្រយោជន៍ទៅវិញទៅមក ជាពិសេសនៅក្នុងវិស័យទេសចរណ៍តែម្តង ។
«ការលើកលែងទិដ្ឋការ នឹងអាចជួយទាក់ទាញភ្ញៀវទេសចរ និងអ្នកវិនិយោគធំៗរបស់តៃវ៉ាន់ទៅកាន់ប្រទេសថៃ។» នេះ គឺជាសេចក្តីថ្លែងការណ៍បញ្ចុះបញ្ចូលថៃឲ្យលើកលែងទិដ្ឋការដល់ពលរដ្ឋតៃវ៉ាន់ របស់លោក Chen-Yuan តំណាងការិយាល័យសេដ្ឋកិច្ច និងវប្បធម៌ក្រុងតៃប៉ិប្រចាំក្រុងបាងកក ។
អ្នកតំណាងកោះតៃវ៉ាន់ ក៏បានលើកឡើងថា វាមានភ្ញៀវទេសចរដែលជាពលរដ្ឋតៃវ៉ាន់ជាង៣០ម៉ឺននាក់ បានមកលេងនៅប្រទេសថៃនៅអំឡុងខែមករាដល់ខែសីហាឆ្នាំនេះ ។ នេះបើយោងតាមការចុះផ្សាយរបស់សារព័ត៌មានថៃ The Nation ដែលបានដកស្រង់សម្តីលោក Chen-Yuan ដែលអះអាងទៀតថា ចំនួនទេសចររបស់ពលរដ្ឋខ្លួនទៅកាន់ថៃ បានធា្លក់ចុះបន្តិច បើប្រៀបធៀបជាមួយនឹងតួលេខនៅឆ្នាំមុន ។
យ៉ាងណាក៏ដោយ អ្នកតំណាងកោះតៃវ៉ាន់ ជឿជាក់ថា កំណើនអ្នកទេសចរតៃវ៉ាន់ទៅកាន់ថៃ នឹងកើតឡើងវិញ ប្រសិនបើថៃ ព្រមលើកលែងទិដ្ឋាការឲ្យតៃវ៉ាន់នោះ។
លើសពីនេះទៅទៀតនោះ តំណាងតៃវ៉ាន់ ក៏រំពឹងដែរថា ការផ្តល់លក្ខខណ្ឌទិដ្ឋការបែបនេះ ក៏នឹងជួយជំរុញឲ្យវិនិយោគិនតៃវ៉ាន់ទៅវិនិយោគនៅថៃកាន់តែច្រើនផងដែរ ដ្បិតអ្នកវិនិយោគតៃវ៉ាន់ដែលមានសក្តានុពលផ្នែកបច្ចេកវិទ្យាខ្ពស់លើវិស័យរោងចក្រជាដើមនោះ ក៏បានបង្ហាញចំណាប់អារម្មណ៍ខ្ពស់ទៅកាន់ថៃហើយនោះ ។
បើតាមការិយាល័យសេដ្ឋកិច្ច និងវប្បធម៌ក្រុងតៃប៉ិ មានប្រទេសអាស៊ានដូចជាម៉ាឡេស៊ី សិង្ហបុរី ឥណ្ឌូណេស៊ី កន្លងមកបានផ្តល់ការលើកលែងទិដ្ឋការសម្រាប់តៃវ៉ាន់ ៕
Tag:
តៃវ៉ាន់
ថៃ
Chen Yuan
© រក្សាសិទ្ធិដោយ thmeythmey.com