អន្តរជាតិ
ក្រោយគេចពីយោធាមីយ៉ាន់ម៉ា ស្ត្រីរ៉ូហ៊ីងយ៉ានិងកូនតូចៗបែរជាត្រូវសត្វដំរីព្រៃសម្លាប់នៅបង់ក្លាដែស ![រូបតំណាង៖ ស្ត្រីរ៉ូហ៊ីងយ៉ា និងកូនស្ថិតនៅជំរំជនភៀសខ្លួនបង់ក្លាដែរ (រូបភាព៖ Xihua)](https://image.thmeythmey.com/pictures/2017/10/16/ba.jpg)
រូបតំណាង៖ ស្ត្រីរ៉ូហ៊ីងយ៉ា និងកូនស្ថិតនៅជំរំជនភៀសខ្លួនបង់ក្លាដែរ (រូបភាព៖ Xihua)
×![]()
ស្ត្រីជនជាតិរ៉ូហ៊ីងយ៉ាម្នាក់ និងកូនៗបីនាក់ បានស្លាប់បាត់បង់អាយុជីវិត ដោយវាយប្រហារក្នុងពេលពួកគេកំពុងសម្រាកក្នុងជំរំនៅបង់ក្លាដែសនាថ្ងៃទី១៤ តុលាកន្លងទៅ។ ពួកគេបានមកដល់បង់ក្លាដែសក្រោយរត់គេចខ្លួនពីការធ្វើទុក្ខបុកម្នេញពីសំណាក់យោធាមីយ៉ាន់ម៉ានៅរដ្ឋ Rakhine។
លោក Mohammed Ali Kabir មន្ត្រីព្រៃឈើស្រុកនៃបង់ក្លាដែស នៅថ្ងៃ១៥ តុលា បានឲ្យដឹងថា មានដំរីព្រៃមួយហ្វូង បានចូលទៅក្នុងជំរំ Balukhali នៅថ្ងៃសៅរ៍សប្តាហ៍មុន ដោយហ្វូងដំរីទាំងនោះ បានបំផ្លាញជំរំមួយចំនួនរបស់ជនភៀសខ្លួនរ៉ូហ៊ីងយ៉ា និងថែមទាំងវាយប្រហារជនភៀសខ្លួន រហូតដល់បាត់បង់អាយុជីវិតទៀតផង ។ នេះបើយោងតាមការចុះផ្សាយរបស់សារព័ត៌មាន Bangkok Post ។
ប្តីជនរងគ្រោះលោក Abu Bakar Siddique បាននិយាយថា លោកប្រឈមការលំបាកណាស់ទម្រាំតែបានរត់គេចផុតពីមីយ៉ាន់ម៉ាមកដល់បង់ក្លាដែស និងស្វែងរកជំរំសម្រាប់ស្នាក់នៅ ។ បុរសនោះបន្តថា ចំណាយពេលបួនថ្ងៃឯណោះសម្រាប់ការរត់គេចនេះ ។
ជនភៀសខ្លួនរូបនេះបានពោលពីទុក្ខលំបាករបស់ខ្លួនយ៉ាងដូច្នេះថា៖ ខ្ញុំបានភៀសខ្លួនពីមីយ៉ាន់ម៉ាដើម្បីគេចពីការវាយប្រហាររបស់យោធា។ ប៉ុន្តែ ដំរី បានសម្លាប់ប្រពន្ធ និងកូនខ្ញុំហើយ។ វាពិតជាឈឺចាប់ណាស់..»។
បើតាមរបាយការណ៍អង្គការសហប្រជាជាតិ ជនភៀសខ្លួនមិនតិចជាង៣០ម៉ឺននាក់ឡើយ ដែលបានចាកចេញពីរដ្ឋ Rakhine ទៅកាន់បង់ក្លាដែស ដោយសារតែការប៉ះទង្គិចនៅចុងខែសីហាកន្លងទៅ ។ របាយការណ៍ដដែលក៏បានអះអាងដែរថា ជនភៀសខ្លួននៅតែបន្តចាកចេញ បើទោះបីជាការប្រយុទ្ធគ្នារវាងកងកម្លាំងរដ្ឋាភិបាលមីយ៉ាន់ម៉ា និងក្រុមឧទ្ទាម បានស្ងប់ស្ងាត់ទៅហើយក្តី ៕
Tag:
រ៉ូហ៊ីងយ៉ា
បង់ក្លាដែស
© រក្សាសិទ្ធិដោយ thmeythmey.com