ទោះមានសម្ពាធពីចិន តៃវ៉ាន់នៅប្រឹងរក្សាទំនាក់ទំនងជាមួយសម្ព័ន្ធមិត្តខ្លួនដែលនៅសេសសល់

អន្តរជាតិ

ទោះមានសម្ពាធពីចិន តៃវ៉ាន់នៅប្រឹងរក្សាទំនាក់ទំនងជាមួយសម្ព័ន្ធមិត្តខ្លួនដែលនៅសេសសល់

17, Oct 2017 , 9:08 am

រូបភាព

ដោយ:

ប្រធានាធិបតីតៃវ៉ាន់លោកស្រី Tsai Ing-wen នឹងបំពេញទស្សនកិច្ចទៅកាន់ប្រទេសសម្ព័ន្ធមិត្តរបស់ខ្លួននៅតំបន់ប៉ាស៊ីហ្វិកនៅចុងខែនេះ ។ ទស្សនកិច្ចនេះ ធ្វើឡើងដើម្បីពង្រឹងចំណងជាមួយនឹងប្រទេស ដែលនៅតែបន្តទទួលស្គាល់តៃវ៉ាន់ ជារដ្ឋ ឬប្រទេសឯករាជ្យ ខណៈសម្ព័ន្ធមិត្តមួយចំនួនបន្តប្រកាសផ្តាច់ការទូតជាមួយតៃវ៉ាន់ហើយរត់មករកចិនវិញ ។

បើមិនមានការប្រែប្រួលនោះទេ លោកស្រី Tsai Ing-wen នឹងផ្តើមទស្សនកិច្ចផ្លូវការដែលនឹងចាប់ពីថ្ងៃ២៨ តុលា ដល់ថ្ងៃ៤ វិច្ឆិកាទៅកាន់ប្រទេសសម្ព័ន្ធមិត្តរបស់ខ្លួននៅប៉ាស៊ីហ្វិកចំនួន រួមមាន កោះសាធារណរដ្ឋម៉ាហ្សាល់ កោះសូឡូមុន និងកោះទូវ៉ាលូ ។ នេះបើយោងតាមការចុះផ្សាយរបស់ភ្នាក់ព័ត៌មាន AFP ។

អនុរដ្ឋមន្ត្រីការបរទេសតៃវ៉ាន់ លោក Francois Wu បានឲ្យដឹងថា តាមរយៈដំណើរទស្សនកិច្ចលើកដំបូងក្រោយនៃការឡើងកាន់តំណែងទៅកាន់ប្រទេសសម្ព័ន្ធមិត្តទាំងបីនេះ លោកស្រីប្រធានាធិបតី នឹងបង្ហាញពីសារៈសំខាន់នៃមិត្តភាព និងការតាំងចិត្តដ៏មុតមាំរបស់តៃវ៉ាន់ដើម្បីធ្វើឲ្យទំនាក់ទំនងកាន់តែរឹងមាំថែមទៀត។

សូមជម្រាបផងដែរថា ក្រោយនៃការឡើងកាន់តំណែងរបស់លោកស្រីប្រធានាធិបតីតៃវ៉ាន់ ដែលមានទំនោរទៅរកការប្រកាសឯករាជ្យ និងបដិសេធ គោលនយោបាយចិនតែមួយ ចិន ត្រូវបានមានឃើញថា មានសកម្មភាពច្រើនទាំងផ្នែកយោធា និងការទូតដើម្បីដាក់សម្ពាធទៅលើតៃវ៉ាន់ ។ ជាក់ស្តែងនោះ មានប្រទេសមួយចំនួន បានប្រកាសផ្តាច់ការទូតជាមួយនឹងតៃវ៉ាន់ ដែលបានបង្កើតជាច្រើនឆ្នាំហើយនោះ ។

មកទល់ពេលនេះ មានរដ្ឋឬប្រទេសមួយចំនួនតូចប៉ុណ្ណោះដែលនៅតែបន្តទទួលស្គាល់តៃវ៉ាន់ ជារដ្ឋឯករាជ្យ ដោយក្នុងចំណោមនោះភាគច្រើនជាប្រទេសតូចៗនិងកោះប៉ាស៊ីហ្វិក។