អន្តរជាតិ
ប្រមុខការទូតអាមេរិក សរសើរឥណ្ឌា តែចោទថាចិនកំរាមកំហែងសណ្តាប់ធ្នាប់ពិភពលោក ![](https://image.thmeythmey.com/pictures/2017/10/19/india-us.jpg)
×![]()
រដ្ឋមន្ត្រីការបរទេសអាមេរិកសង្ឃឹមថា ភាពជាដៃគូយុទ្ធសាស្ត្ររវាងអាមេរិកនិងឥណ្ឌានឹងកាន់តែរឹងមាំសករាជថ្មីនៅពេលអនាគតខាងមុខ ទាំងយោធា សេដ្ឋកិច្ច ការទូតនិងនយោបាយ។ ពេលសរសើរឥណ្ឌា ប្រមុខការទូតអាមេរិករូបនេះបែរជាចោទថា មហាយក្សចិនព្យាយាមបង្កផលប៉ះពាល់សណ្តាប់ធ្នាប់ពិភពលោកកន្លងមកដែរ។
ក្នុងវេទិកាស្តីពីភាពជាដៃគូរវាងអាមេរិកនិងឥណ្ឌានៅមជ្ឈមណ្ឌលសម្រាប់ការសិក្សាយុទ្ធសាស្ត្រនិងសិក្សាអន្តរជាតិ រដ្ឋមន្ត្រីការបរទេសអាមេរិកលោក រិច ធីល័រសិន បានឆ្លៀតឱកាសលើកសរសើរសម្ព័ន្ធភាពរវាងអាមេរិក និងឥណ្ឌាក្នុងភាពជាដៃគូយុទ្ធសាស្ត្រ។
លោក ធីល័រសិន បានសង្កត់ធ្ងន់ក្នុងសុន្ទរកថាខ្លួនថា អាមេរិកនិងឥណ្ឌានឹងឈានទៅបង្កើសតវត្សថ្មីនៃភាពជាដៃគូយុទ្ធសាស្ត្រ ដោយបន្តពង្រឹងសម្ព័ន្ធភាពទ្វេភាគីលើវិស័យយោធា ការទូត នយោបាយ និងសេដ្ឋកិច្ច។ វានឹងរួមចំណែកយ៉ាងសំខាន់ក្នុងការរក្សាសន្តិសុខ សន្តិភាព និងធានាការលូតលាស់នៃសេដ្ឋកិច្ចក្នុងតំបន់ឥណ្ឌូប៉ាស៊ីហ្វិកដែរ។
«អាមេរិក និងឥណ្ឌាកំពុងពង្រឹងភាពជាដៃគូលើឆាកអន្តរជាតិ ដោយមានការកើនឡើងនៃយុទ្ធសាស្ត្ររួមគ្នាផងដែរ។ ទាំងឥណ្ឌា និងអាមេរិកមិនត្រឹមតែចែករម្លែកប្រជាធិបតេយ្យឡើយ យើងចែករម្លែកទស្សនវិស័យសម្រាប់អនាគត ក្នុងពេល ១០០ឆ្នាំខាងមុខ»។
លោក ធីល័រសិន នឹងទៅបំពេញទស្សនកិច្ចនៅឥណ្ឌាលើកដំបូងក្នុងនាមជាប្រមុខការទូតអាមេរិកនៅសប្តាហ៍ក្រោយនោះដែរ។
យ៉ាងណាមិញ ក្រៅពីសរសើរ និងរំពឹងពង្រឹងភាពជាដៃគូយុទ្ធសាស្ត្រជាមួយឥណ្ឌា ប្រមុខការទូតអាមេរិករូបនេះយកវេទិកាខាងលើទិតៀន និងចោទប្រកាន់ចិនដែលជាមហាអំណាចទើបត្រដែតថ្មីដែរ។
លោក ធីល័រសិន ថ្លែងពេញមាត់ថា ឥណ្ឌាល្អជាងចិន ព្រោះក្នុងនាមជាមហាអំណាច ចិនធ្វើសកម្មភាពដែលប៉ះពាល់ដល់ច្បាប់ និងទំនៀបទម្លាប់អន្តរជាតិ រួមទាំងគំរាមកំហែងសណ្តាប់ធ្នាប់ពិភពលោកផង។
«ចំណែក ចិនមិនសូវមានការទទួលខុសត្រូវប៉ុន្មានឡើយ ផ្ទុយទៅវិញប្រទេសនេះបានព្យាយាមគំរាមកំហែងសណ្តាប់ធ្នាប់អន្តរជាតិ ខណៈដែលខ្លួនរះត្រដែតឡើងជាមួយឥណ្ឌាក្នុងនាមជាមហាអំណាចពិភពលោក។ នេះជាការបញ្ជាក់របស់លោក ធីល័រសិន។
លោកបន្ថែមថា៖«សកម្មភាពបង្ករឿងរបស់ចិននៅសមុទ្រចិនខាងត្បូងធ្វើឲ្យប៉ះពាល់ខ្លាំងដល់ច្បាប់ និងទំនៀមទម្លាប់អន្តរជាតិ ដែលជាចំណុចមហាអំណាចទាំងពីរអាមេរិក និងឥណ្ឌាព្យាយាមការពារនោះ»។
ការលើកឡើងពីអនាគតនៃសម្ព័ន្ធភាពរវាងអាមេរិក និងឥណ្ឌា ជាសញ្ញាអវិជ្ជមានមួយសម្រាប់មហាយក្សចិនផង។ ក្រៅពីមានជម្លោះព្រំដែនជាមួយចិនរាប់ទសវត្សន៍មកនោះ ឥណ្ឌាក៏បន្តគាំទ្រជំហរអាមេរិកក្នុងការពង្រឹងតួនាទីរបស់ខ្លួននៅតំបន់អាស៊ីប៉ាស៊ីហ្វិកជាពិសេសនៅសមុទ្រចិនខាងត្បូង ដោយការពារសេរីភាពនាវាចរណ៍ និងការហោះហើរផងដែរ៕
Tag:
រិច ធីល័រសិន
ឥណ្ឌា
ចិន
© រក្សាសិទ្ធិដោយ thmeythmey.com