អន្តរជាតិ
នយោបាយអន្តរជាតិ
ប្រមុខរបបសឹកថៃ ព្រមានចាត់វិធានតឹងរ៉ឹងប្រឆាំងអ្នករិះគន់រដ្ឋាភិបាលតាមអ៊ីនធឺណិតគ្មានហេតុផល ![](https://image.thmeythmey.com/pictures/2017/11/22/prayuth.jpg)
×![]()
ប្រមុខរបបសឹកថៃឧត្តមសេនីយ៍ ប្រាយុទ្ធ ចន្ទ អូចា បានថ្លែងប្រាប់អ្នកសារព័ត៌មានពីវិធានការតឹងរ៉ឹងអនុវត្តលើអ្នករិះគន់រដ្ឋាភិបាលតាមប្រព័ន្ធអនឡាញដែលខុសការពិត ។ លោកបានណែនាំឲ្យមន្ត្រីក្រោមឱវាទតាមដានពីការអត្ថាធិប្បាយនានារបស់អ្នករិះគន់ដើម្បីចាត់វិធាន និងអនុវត្តច្បាប់ដែលរួមមានទាំងទោសពិន័យ និងពន្ធនាគារ ។
លោកនាយករដ្ឋមន្ត្រី ប្រាយុទ្ធ ចន្ទ អូចា នៅថ្ងៃ២១ វិច្ឆិកា បានព្រមានអ្នករិះគន់រដ្ឋាភិបាលតាមបណ្តាញអ៊ីនធឺណិតឲ្យមានការប្រុងប្រយ័ត្នបន្តិច នៅពេលដែលពួកគេនិយាយពីការអនុវត្តសកម្មភាពនយោបាយរបស់រដ្ឋាភិបាល ។ លោកក៏បានដាក់បញ្ជាឲ្យមន្ត្រីរាជការទាំងអស់តាមដានអ្នកអត្ថាធិប្បាយទាំងនោះ រួមទាំងអនុវត្តច្បាប់ប្រឆាំងពួកគេ ។ នេះបើយោងតាមការចុះផ្សាយរបស់សារព័ត៌មាន The Nation ។
លោកនាយករដ្ឋមន្ត្រី បានប្រាប់ប្រព័ន្ធផ្សព្វផ្សាយពីសេចក្តីព្រាងច្បាប់ថ្មីពាក់ព័ន្ធនឹងការរឹតបន្តឹងតាមប្រព័ន្ធអនឡាញ ដែលបានអនុញ្ញាតឲ្យរដ្ឋាភិបាល ពិន័យជនទាំងឡាយណាដែលផ្តល់ព័ត៌មានដែលប៉ះពាល់ដល់សន្តិសុខជាតិ និងថែមទាំងអាចបិទគេហទំព័រណាដែលបំពានច្បាប់ទៀតផង ។ ជនល្មើស ក៏ត្រូវប្រឈមការពិន័យជាទឹកប្រាក់ពី ២ម៉ឺនបាតដល់២០ម៉ឺនបាត ឬជាប់ទោសពន្ធនាគារចាប់ពី១០ឆ្នាំផងដែរ ។
ប្រមុខរបបសឹករូបនេះ បានសង្កត់ធ្ងន់ថា៖«មានការផ្តល់ព័ត៌មាន និងការអធិប្បាយមិនពិតគ្រប់ទីកន្លែង ហើយបុគ្គលមិនល្អមួយចំនួននោះស័ក្តិសមនឹងទទួលការពិន័យណាស់»។ ការព្រមានរបស់លោកឧត្តមសេនីយ៍ ធ្វើឡើងក្រោយពីមានការរិះគន់ខ្លាំងលើរដ្ឋាភិបាល បន្ទាប់ពីលោក ប្រាយុទ្ធ បានប្រកាសរុះរើគណៈរដ្ឋមន្ត្រី ។
អ្នកនាំពាក្យរដ្ឋាភិបាលថៃ លោកឧត្តមសេនីយ៍ Sansern Kaewkamnerd បានបញ្ជាក់ថា លោកនាយករដ្ឋមន្ត្រី បានបញ្ជាឲ្យគ្រប់ភ្នាក់ងាររដ្ឋាភិបាលទាំងអស់ដំណើរការនីតិវិធី ប្រសិនបើរកឃើញសារណាមួយនៅតាមបណ្តាញសង្គម ដែលហួសពីសិទ្ធិរបស់ពួកគេ និងវាយប្រហារមកលើរដ្ឋាភិបាល។ នេះមានន័យថា ការរិះគន់ទាំងឡាយណា ដែលបំប៉ោង និងបំផ្លើសមានចរិតនយោបាយ ។
គួររម្លឹកផងដែរ ឧត្តមសេនីយ៍ប្រាយុទ្ធ ចន្ទអូចា បានឡើងកាន់អំណាចជានាយករដ្ឋមន្ត្រីថៃ ក្រោយពីលោក បានដឹកនាំរដ្ឋប្រហារទម្លាក់អតីតនាយករដ្ឋមន្ត្រីថៃ លោកស្រី យីងឡាក់ ស៊ីនណាវ៉ាត នៅថ្ងៃ២២ ឧសភា ឆ្នាំ២០១៤ ។ បន្ទាប់ពីកាន់តំណែងកំពូលនេះ លោកនាយករដ្ឋមន្ត្រី ហាក់អនុវត្តគោលនយោបាយរឹតបន្តឹងសិទ្ធិបញ្ចេញមតិទាំងឡាយដែលប៉ះពាល់ដល់រដ្ឋាភិបាលលោក រួមទាំងហាមការប្រមូលផ្តុំតាមទីសាធារណៈផងដែរ ៕
© រក្សាសិទ្ធិដោយ thmeythmey.com