អន្តរជាតិ
ទោះត្រាំគំរាមផ្តាច់ជំនួយក្តី ប្រទេស១២៨ថ្កោលទោសអាមេរិកដែលទទួលស្គាល់ហ្ស៊េរុយសាឡិមជារដ្ឋធានីអ៊ីស្រាអែល ![](https://image.thmeythmey.com/pictures/2017/12/22/unga.jpg)
×![]()
មហាសន្និបាតអង្គការសហប្រជាជាតិបានបោះឆ្នោតអនុម័តដំណោះស្រាយមួយជាឯកច្ឆ័នដែលថ្កោលទោសសហរដ្ឋអាមេរិកដែលទទួលស្គាល់ក្រុងហ្ស៊េរុយសាឡិមជារដ្ឋធានីអ៊ីស្រាអែលកន្លងមក។ ការបោះឆ្នោតតបតាមការទទូចសុំរបស់អាជ្ញាធរប៉ាឡេស្ទីននេះនៅតែអាចសម្រេចបាន ទោះក្រុងវ៉ាស៊ីនតោនគំរាមផ្តាច់ជំនួយប្រទេសដែលហ៊ានប្រឆាំងខ្លួនក្តី។
នាថ្ងៃព្រហស្បតិ៍ទី ២១ ខែធ្នូ ប្រទេសសមាជិកអង្គការសហប្រជាជាតិចំនួន ១២៨ បានបោះឆ្នោតអនុម័តដំណោះស្រាយប្រឆាំងការសម្រេចចិត្តរបស់អាមេរិកដែលទទួលស្គាល់ហ្ស៊េរុយសាឡិមជារដ្ឋធានីរបស់អ៊ីស្រាអែល។ ប្រទេសទាំងនេះមិនបានខ្វល់នឹងការគំរាមកំហែងរបស់អាមេរិកថាផ្តាច់ជំនួយគាំទ្រពួកគេលើយ។
យោងតាមទីភ្នាក់ងារព័ត៌មាន AFP ប្រទេសចំនួនប្រាំបួនមានអាមេរិក និងអ៊ីស្រាអែលផងនោះបានបោះឆ្នោតប្រឆាំងដំណោះស្រាយ ខណៈប្រទេស៣៥នាំគ្នាបោះអនុប្បវាទក្នុងនោះមានសម្ព័ន្ធមិត្តអាមេរិកដូចជាកាណាដា និងអូស្ត្រាលីផងដែរ។ ប្រទេសនៅសេសសល់គឺអនុវត្តមាន។
តាមពិតទៅសេចក្តីព្រាងដំណោះស្រាយនេះមានកំណត់ថា រាល់សកម្មភាពទាំងឡាយណាដែលធ្វើឲ្យប៉ះពាល់ដល់ឋានៈនិងស្ថានភាពជាក់ស្តែងនៃទីក្រុងហ្ស៊េរុយសាឡីមនឹងមិនមានអនុភាពគតិយុត្តិ និងត្រូវទុកជាមោឃៈ។ ដំណោះស្រាយនេះក៏ស្នើឲ្យរាល់ប្រទេសទាំងអស់ចៀសវាងបើកស្ថានទូតនៅក្រុងហ្ស៊េរុយសាឡិមផងដែរ។
ដំណោះស្រាយនេះត្រូវបានដាក់ចូលរបៀបវារៈនៃមហាសន្និបាតអង្គការសហប្រជាជាតិដោយប្រទេសយេម៉ែន និងប្រទេសតួកគីក្នុងនាមជាតំណាងឲ្យបណ្តាប្រទេសអារ៉ាប់ និងសហគមន៍ម៉ូស្លីមទូទាំងពិភពលោក។
គេសង្កេតឃើញថា ទោះជាអាមេរិកប្រើពាក្យសម្តីគំរាមកំហែងប្រទេសដែលចង់បោះឆ្នោតគាំទ្រដំណោះស្រាយនេះក៏ដោយ ក៏ប្រទេសទាំងនោះមិនបានខ្វាយខ្វាល់នឹងសម្តីនេះដែរ។
មុនការបោះឆ្នោតក្នុងមហាសន្និបាតប្រធានាធិបតីអាមេរិក ដូណាល់ ត្រាំ រួមជាមួយតំណាងអាមេរិកប្រចាំអង្គការសហប្រជាជាតិបានគំរាមប្រទេសដែលទទួលជំនួយអាមេរិកថា បើហ៊ានបោះឆ្នោតប្រឆាំងអាមេរិក ខ្លួននឹងកាត់ជំនួយនៅពេលខាងមុខ។
«ពួកគេយកលុយពីអាមេរិករាប់លាន អាចរាប់ពាន់លានដុល្លារទៀត ហើយពួកគេនាំគ្នាបោះឆ្នោតប្រឆាំងយើង។ ល្អ! យើងកំពុងរង់ចាំមើលការបោះឆ្នោត។ ឲ្យពួកគេបោះឆ្នោតប្រឆាំងយើងទៅ។ យើងនឹងសន្សំលុយបានច្រើន។ យើងមិនដែលខ្វល់ឡើយ»។ នេះជាសម្តីរបស់លោក ត្រាំ។
ចំណែកឯកអគ្គរដ្ឋទូតអាមេរិកប្រចាំអង្គការសហប្រជាតិលោកស្រី Nikki Haley បានបញ្ជាក់ជាថ្មីដែររឿងគំរាមកាត់ជំនួយប្រទេសដែលបោះឆ្នោតគាំទ្រដំណោះស្រាយមហាសន្និបាតនេះ។តំណាងពិសេសនេះអះអាងថា បោះឆ្នោតប្រឆាំងអាមេរិកនៅអង្គការសហប្រជាតិមិនធ្វើឲ្យគ្រប់យ៉ាងផ្លាស់ប្តូរឡើយ៕
Tag:
ដូណាល់ ត្រាំ
អ៊ីស្រាអែល
មហាសន្និបាតអង្គការសហប្រជាជាតិ
ហ្ស៊េរុយសាឡិម
© រក្សាសិទ្ធិដោយ thmeythmey.com