ជាតិ
កម្ពុជា បញ្ជូនកងទ័ពមួកខៀវ៤០០នាក់ទៀត ទៅរក្សាសន្តិភាពជាមួយ UN ![រូបពីក្រសួងការពារជាតិ](https://image.thmeythmey.com/pictures/2018/05/02/ff.jpg)
រូបពីក្រសួងការពារជាតិ
×![]()
កងកម្លាំងមួកខៀវកម្ពុជាចំនួន៣កង ដែលមានគ្នាសរុបជាង៤០០នាក់ នឹងទៅបំពេញបេសកកម្មរក្សាសន្តិភាពរបស់អង្គការសហប្រជាជាតិ (UN)។ ការបញ្ជូនជាលើកទី២ ក្នុងឆ្នាំ ២០១៨នេះ មានពីរកងទៅសាធារណរដ្ឋម៉ាលី និងមួយកងទៅសាធារណរដ្ឋស៊ូដង់។
ដើម្បីចូលរួម ក្នុងបេសកម្មថែរក្សាសន្តិភាពរបស់អង្គការសហប្រជាជាតិ នៅថ្ងៃទី០៣ ខែឧសភា ឆ្នាំ២០១៨ កម្ពុជា នឹងបញ្ជូនកងកម្លាំងមួកខៀវចំនួន៣ក្រុម ដែលមានចំនួនសរុប៤២៨នាក់ ទៅកាន់ប្រទេសចំនួន២។ កងកម្លាំងទាំងនោះមកពី កងវិស្វកម្មព្រលានយន្តហោះលេខ១៨៨ ចំនួន១៦៥នាក់ និងកងកម្ទេចគ្រាប់មិនទាន់ផ្ទុះលេខ១៣២ ចំនួន១៤៤នាក់ ទៅកាន់សាធារណរដ្ឋម៉ាលី។ ដោយឡែក កងអាវុធហត្ថលេខ៦៨១ មានចំនួន១១៩នាក់ នឹងទៅកាន់សាធារណរដ្ឋស៊ូដង់ខាងត្បូង។ នេះបើតាមសេចក្ដីប្រកាសរបស់ក្រសួងការពារជាតិ ចុះថ្ងៃទី៣០ ខែមេសា ឆ្នាំ២០១៨។
នេះជាការបញ្ជូនកងកម្លាំងមួកខៀវជាលើកទី២ នៅក្នុងឆ្នាំ២០១៨ ដោយកាលពីថ្ងៃទី៣០ ខែមីនា ប្រទេសកម្ពុជា ក៏បានបញ្ជូនកងទ័ពមួកខៀវរបស់ខ្លួនចំនួន៨០នាក់ ទៅកាន់សាធារណរដ្ឋម៉ាលី តាមរយៈអង្គការសហប្រជាជាតិផងដែរ។
ចាប់តាំងពីឆ្នាំ២០០៦មក កម្ពុជាបានបញ្ជូនកងកម្លាំងជិត៥,០០០នាក់ ដោយក្នុងនោះមានស្ត្រីចំនួនជាង២០០នាក់ ទៅចូលរួមបេសកកម្ម របស់អង្គការសហប្រជាជាតិ។ បច្ចុប្បន្នកម្ពុជា មានកងកម្លាំងប្រមាណជាង៨០០នាក់ ដែលបំពេញបេសកកម្មនៅប្រទេសចំនួន៥ រួមមាន សាធារណរដ្ឋស៊ូដង់ ស៊ូដង់ខាងត្បូង អាហ្វរិកកណ្ដាល លីបង់ និងម៉ាលី៕
Tag:
សង្គម
កងកម្លាំងមួកខៀវ
UN
សន្តិភាព
© រក្សាសិទ្ធិដោយ thmeythmey.com