កីឡាជាតិ
ជាតិ
អស្ចារ្យ! កម្ពុជាឈ្នះម្ចាស់ការពារជើងឯកមីយ៉ាន់ម៉ា ២-១ ដើម្បីឈានទៅវគ្គផ្តាច់ព្រ័ត្រពានស្តេចព្រុយណេ
× ក្រុមកីឡាបាល់ទាត់ជម្រើសជាតិអាយុក្រោម២១ឆ្នាំកម្ពុជា បានកក់កៅអីសម្រាប់ការប្រកួតវគ្គផ្តាច់ព្រ័ត្រនៃពានរង្វាន់ស្តេចព្រុយណេ Hassanal Bolkiah Trophy ឆ្នាំ២០១៨ ក្រោយឈ្នះមីយ៉ាន់ម៉ា ដែលជាម្ចាស់ការពារតំណែងជើងឯកក្នុងលទ្ធផល ២-១ ។
ដោយសារភ្លៀងធ្លាក់ខ្លាំងជំនួបនៅលើទីលាន Hassanal Bolkiah National Stadium និងនៅលើទីលានមួយទៀត ត្រូវបានពន្យាពេលជាង១ម៉ោង។ U21 កម្ពុជា បាននាំមុខ២គ្រាប់ ក្រោយការស៊ុតបាល់បញ្ចូលទីជាបន្តបន្ទាប់របស់ ណារ៉ុង កក្កដា ក្រោយការបញ្ជូលយ៉ាងល្អទាំងពីរគ្រាប់របស់ សុះ ស៊ូហាណា។
នៅ៥នាទីមុនបញ្ចប់តង់ទីមួយ មីយ៉ាន់ម៉ា មានឱកាសទាត់បាល់ពិន័យពីចម្ងាយ។ ការទាត់របស់ Lwin Moe Aung បាននាំបាល់ទៅដល់ សឿយ វិសាល នៅតំបន់គ្រោះថ្នាក់ ហើយប្រធានក្រុមកម្ពុជាព្យាយាមតែតក្រោយ ប៉ុន្តែភ្លាត់ស្នៀតចូលទីខ្លួនឯង។
ឈានចូលតង់ទីពីរ មីយ៉ាន់ម៉ាវាយលុកយ៉ាងខ្លាំង ខណៈទីលានលែងមានទឹកដក់។ តែនៅនាទី៦៦ សុះ ស៊ូហាណា បានបញ្ចូលបាល់យ៉ាងល្អ ទៅប្រអប់គ្រោះថ្នាក់ ប៉ុន្តែការសម្រេចចិត្តយឺតរបស់ កាន់ ពិសាល នាំឲ្យកម្ពុជា ខកឱកាសរកបានគ្រាប់ទីបី។
នៅនាទី៧៥ លី វ៉ាហេទ មានបញ្ហារបួស ហើយត្រូវបានដាក់ជំនួសដោយ អ៊ុក សុវណ្ណ។ ទោះបីយ៉ាងណាក៏ដោយ លទ្ធផល ២-១ ត្រូវបានរក្សារហូតដល់បញ្ចប់ការប្រកួត ដែលនាំឲ្យកម្ពុជាឡើងទៅវគ្គផ្តាច់ព្រ័ត្រជាលើកដំបូង។ កម្ពុជាត្រូវតទល់ដណ្តើមពានរង្វាន់មិត្តភាពអន្តរជាតិនេះជាមួយទីម័រខាងកើតនាថ្ងៃទី៥ ខែឧសភា បន្ទាប់ពីទីម័រខាងកើត បានយកឈ្នះសិង្ហបុរីនៅវគ្គ១/២ផ្តាច់ព្រ័ត្រក្នុងលទ្ធផល ២-១ ដូចគ្នា។
© រក្សាសិទ្ធិដោយ thmeythmey.com