អន្តរជាតិ
នយោបាយអន្តរជាតិ
ក្រោយបារាំងចោទថាកំពុងវាតទីនៅប៉ាស៊ីហ្វិក ចិនសួរវិញថានរណាជាអ្នកវាតទីពេញពិភពលោក លោកស្រី Hua Chunying អ្នកនាំពាក្យក្រសួងការបរទេសចិនក្នុងសន្និសីទសារព័ត៌មានថ្ងៃទី៤ ខែឧសភា (រូបភាពគេហទំព័រក្រសួងការបរទេសចិន)
× នៅថ្ងៃទី៤ ខែឧសភា ក្រុងប៉េកាំងបានប្រតិកម្មខ្លាំងទៅនឹងសម្ដីប្រធានាធិបតីបារាំង អេម៉ានុយអែល ម៉ាក្រុង ដែលបានដៀមដាមឲ្យចិនជុំវិញការកើនឡើងឥទ្ធិពលនៅតំបន់ឥណ្ឌូ-ប៉ាស៊ីហ្វិក។ ក្នុងទស្សនកិច្ចនៅអូស្ត្រាលី លោក ម៉ាក្រុង ថែមទាំងនិយាយថា បារាំង អូស្ត្រាលី បូកទាំងឥណ្ឌាមាននាទីការពារតំបន់នេះពីនយោបាយអនុត្តរភាពរបស់ប្រទេសណាមួយនៅតំបន់នេះ។ ចិនបានហៅការអធិប្បាយរបស់លោក ម៉ាក្រុង ជារឿងគ្មានមូលដ្ឋានច្បាស់លាស់។
មហាយក្សចិនមិនសប្បាយចិត្តឡើយ ពេលប្រធានាធិបតីបារាំង អេម៉ានុយអែល ម៉ាក្រុង ព្រមានពីការអនុញ្ញាតឲ្យប្រទេសណាមួយពង្រីកឥទ្ធិពលនៅតំបន់ឥណ្ឌូ-ប៉ាស៊ីហ្វិក។ ខណៈលោក ម៉ាក្រុង មិននិយាយចំឈ្មោះចិននោះ ចិនហាក់ដឹងខ្លួនថា មេដឹកនាំបារាំងរូបនេះចង់សំដៅលើខ្លួនតែម្ដង។ ការលើកឡើងរបស់លោក ម៉ាក្រុង ធ្វើឡើងចំពេលដែលគេមើលឃើញថា ចិនបានពង្រីកឥទ្ធិពលរបស់ខ្លួននៅតំបន់ដ៏ធំនេះ។
យ៉ាងណាមិញ ក្រុងប៉េកាំងបានប្រាប់លោក ម៉ាក្រុង វិញថា កុំបារម្ភអី។ ក្នុងសន្និសីទសារព័ត៌មាននៅថ្ងៃទី៤ ខែឧសភា អ្នកនាំពាក្យក្រសួងការបរទេសចិន Hua Chunying ចាត់ទុកការភ័យខ្លាចពីអនុត្តរភាពរបស់ចិនថា ជាការចោទប្រកាន់គ្មានមូលដ្ឋាន។ អ្នកនាំពាក្យរូបនេះបានសួរវិញថា៖ «ក្នុងក្រសែភ្នែកពិភពលោក តើប្រទេសណាឲ្យពិតប្រាកដដែលអនុវត្តនយោបាយវាតទីលើពិភពលោកសព្វថ្ងៃ? តើអ្នកណាដែលអនុវត្តអនុត្តរភាពសេដ្ឋកិច្ច ឬយោធានៅក្នុងតំបន់នោះ?»
សំណួរខាងលើរបស់មន្ត្រីការបរទេសចិនខាងលើនេះ ទំនងជាសំដៅដល់អាមេរិក។ លោកស្រី Hua ចង់ប្រាប់លោក ម៉ាក្រុង វិញថា អាមេរិកដែលជាសម្ព័ន្ធមិត្តបារាំងឯណោះទេ ទើបជាអ្នកវាតទីនៅប៉ាស៊ីហ្វិកនោះ។ លោកស្រីអ្នកនាំពាក្យរូបនេះបន្ថែមថា មុននឹងនិយាយពីអ្វីមួយ ឬចោទប្រកាន់ដោយគ្មានមូលដ្ឋាន លោក ម៉ាក្រុង គួរបញ្ជាក់ការពិតសិន។
តាមពិតទៅ បារាំងលូកមាត់ក្នុងបញ្ហានៅតំបន់ប៉ាស៊ីហ្វិក គឺជាប្រកៀកស្មាជាមួយអូស្ត្រាលី និងនូវែលសេឡង់ ដែលបារម្ភចំពោះវត្តមានរបស់ចិននៅតំបន់នេះ ហើយម្យ៉ាងបារាំងក៏មានដែនកោះមួយចំនួននៅតំបន់នេះដែរ។ អូស្ត្រាលីបានបង្កើនការប្រុងប្រយ័ត្នខ្លាំងចំពោះការងើបឡើងឆាប់រហ័សនៃឥទ្ធិពលរបស់ចិន ខណៈដែលនូវែលសេឡង់វិញក៏ដេកមិនលក់មិនល្ហើយដោយសារចិនដូចគ្នាដែរ។ នេះក៏ព្រោះតែចិនបានពង្រឹងទំនាក់ទំនងកាន់ស្អិតល្មួតជាមួយប្រទេសកោះតូចៗនៅប៉ាស៊ីហ្វិកតែម្ដង។
នៅប៉ុន្មានឆ្នាំចុងក្រោយនេះ ឥទ្ធិពលរបស់ចិននៅតំបន់ប៉ាស៊ីហ្វិកពិតបានកើនឡើងយ៉ាងខ្លាំង។ ជាញឹកញយក្រុងប៉េកាំងបានធ្វើសមយុទ្ធយោធាជើងទឹក និងការហោះរយៈចម្ងាយឆ្ងាយនៅតំបន់សមុទ្រចិនខាងត្បូង និងប៉ាស៊ីហ្វិកខាងលិច។ ប្រទេសក្នុងតំបន់ជ្រួលច្រាលខ្លាំងដោយសារតែអានុភាពយោធាចិន ខណៈអូស្ត្រាលី បារម្ភថា តុល្យភាពនៅតំបន់នឹងប្រែប្រួលដោយសារចិន ខណៈតំបន់នេះស្ថិតក្រោមឥទ្ធិពលអាមេរិករាប់សិបឆ្នាំមកហើយនោះ៕
Tag:
ចិន
បារាំង
ប៉ាស៊ីហ្វិក
© រក្សាសិទ្ធិដោយ thmeythmey.com