ជាតិ
បោះឆ្នោត
មន្ត្រីជាន់ខ្ពស់CPP៖ ហុងស៊ុយ CPP មិនធ្លាក់ចុះតាមលេខរៀងទី២០ទេ លោក អ៊ក គីមហាន នៅខាងស្ដាំ
× ភ្នំពេញ៖ មន្ត្រីជាន់ខ្ពស់គណបក្សប្រជាជនកម្ពុជា បានបញ្ជាក់ថា ហុងស៊ុយគណបក្សប្រជាជន មិនធ្លាក់ចុះ តាមលេខរៀងទី២០ នៃការឈរឈ្មោះគណបក្ស នៅលើសន្លឹកឆ្នោត ដែលត្រូវប្រកួតប្រជែងខាងមុខឡើយ។ គណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសលំដាប់លេខរៀងគណបក្សទាំងអស់រួចហើយ ដោយគណបក្សប្រជាជនឈរលេខរៀងទី២០ ។
លោក អ៊ក គឺមហាន មន្ត្រីជាន់ខ្ពស់គណបក្សប្រជាជន បាននិយាយថា លំដាប់លេខរៀងទី២០នេះ មិនមែនជាបញ្ហាចោទ ដែលធ្វើឲ្យប៉ះពាល់ដល់សំឡេងឆ្នោតរបស់គណបក្សប្រជាជនឡើយ។ ប៉ុន្តែវាជាលំដាប់លេខល្អ ដែលផ្ដល់ភាពងាយស្រួល ដល់អ្នកគាំទ្រគណបក្សចំណាំ និងគូសលើសន្លឹកឆ្នោតគាំទ្រគណបក្សទៅវិញទេ។ លោក អ៊ក គឹមហាន ដែលចូលរួមតាមដានការចាប់លេខរៀងគណបក្សនយោបាយ បានអះអាងថា អ្នកគាំទ្រគណបក្សចំណាំសញ្ញាបក្ស ជាងលំដាប់លេខរៀងក្នុងការបោះឆ្នោត ដូច្នេះគណបក្សលោក គ្មានការព្រួយបារម្ភពីបញ្ហានេះឡើយ។
នៅពេលអ្នកកាសែតសួរថា តើមានការព្រួយបារម្ភពីរាសី(ហុងស៊ុយ)គណបក្សធ្លាក់ចុះតាមលំដាប់លេខរៀងទី២០ ដែរទេ សម្រាប់ការបោះឆ្នោតខាងមុខ? ឆ្លើយតបនឹងសំនួរនេះ លោក អ៊ក គឹមហាន បានបញ្ជាក់ថា រាសីគណបក្សប្រជាជន មិនស្រុតចុះតាមលេខរៀងទី២០ឡើយ ពោលគឺគណបក្សនឹងទទួលបានជ័យជម្នះបន្តទៀត។
ថ្លែងចំពោះមុខអ្នកកាសែត នៅសាលប្រជុំក្រសួងមហាផ្ទៃ ដែលរៀបចំការចាប់លេខរៀងបក្សនៅថ្ងៃទី២៩ ឧសភា មន្ត្រីជាន់ខ្ពស់គណបក្សប្រជាជនរូបនេះ បានបញ្ជាក់ថា៖«ខ្ញុំអត់មានយល់ថា លេខរៀងនៅក្រោមគេ គឺថា រាសី (ហុងស៊ុយ) ចុះអ្វីទេ គឺសំខាន់ប្រជាពលរដ្ឋ លោកស្រលាញ់ លោកជឿទុកចិត្តលើគោលនយោបាយរបស់គណបក្ស មើលឃើញគណបក្សធ្វើបានអ្វីខ្លះ កសាងអ្វីខ្លះ ឲ្យតែពួកគាត់មានជំនឿទុកចិត្តនោះ ពួកគាត់នឹងគាំទ្រហើយ។ ក្តីសង្ឃឹមនៅតែមាន ហើយនៅឈរលេខរៀងក្រោមគេនេះ វាស្រួលឲ្យប្រជាពលរដ្ឋចំណាំវិញទេ»។
សូមស្តាប់សំឡេង៖
សម្រាប់លោក អ៊ក គីមហាន «លេខមុនគេ និងលេខចុងគេ គឺស្រួលចំណាំបំផុត»។ គណបក្សប្រជាជនកម្ពុជា ដែលបានស្ថិតក្នុងលេខរៀងលំដាប់ទី៤ពីអណត្តិជាប់គ្នាក្នុងការបោះឆ្នោតជ្រើសតាំងតំណាងរាស្ត្រនោះ បានប្តូរទៅលេខរៀងលំដាប់ទី២០ នៃបញ្ជីលេខរៀងគណបក្សនយោបាយសម្រាប់ការបោះឆ្នោតនីតិកាលទី៦ នាថ្ងៃទី២៩ ខែកក្កដា ខាងមុខ។ លេខរៀងលំដាប់ទី៤ បានទៅលើគណបក្សសញ្ញាតិកម្ពុជា៕
Tag:
អ៊ក គីមហាន
CPP
បោះឆ្នោត
© រក្សាសិទ្ធិដោយ thmeythmey.com