អន្តរជាតិ
លោក មហាធៀ ហាមរដ្ឋមន្ត្រីទទួលអំណោយដើម្បីធានាថា រដ្ឋាភិបាលស្អាតស្អំ នាយករដ្ឋមន្រ្តីម៉ាឡេស៊ី មហាធៀ មហាម៉ាត់ ឈរអមដោយមន្រ្តីរដ្ឋាភិបាលជាន់ខ្ពស់ (រូបភាព Malay Mail)
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី៨ ខែមិថុនា បានប្រកាសដាក់ចេញគោលនយោបាយគ្មានការទទួលអំណោយឲ្យរដ្ឋមន្ត្រីទាំងអស់អនុវត្ត។ នយោបាយថ្មីនេះ ជាផ្នែកមួយនៃការសន្យារបស់នាយករដ្ឋមន្ត្រីវ័យចំណាស់រូបនេះក្នុងពេលឃោសនារកសំឡេងឆ្នោត ក៏ដូចជាបង្កើតរដ្ឋាភិបាលស្អាតស្អំ។ វាក៏ជាការលុបបំបាត់ទម្លាប់ចាស់ដែលសេសសល់ពីអតីតរដ្ឋាភិបាលលោក ណាជីប រ៉ាហ្សាក់ផងដែរ។
ដើម្បីធ្វើតាមពាក្យសន្យា និងការបង្កើតរដ្ឋាភិបាលមិនពុករលួយ លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ បានហាមប្រាមសមាជិកគណៈរដ្ឋមន្ត្រីទាំងអស់ទទួលអំណោយថ្លៃៗ។ លោក មហាធៀ ប្រកាសដូចនេះក្នុងកិច្ចប្រជុំគណៈកម្មាធិការស្ដីពីសុចរិតភាពរបស់រដ្ឋាភិបាល។ យ៉ាងណាមិញ គោលនយោបាយនេះអនុវត្តលើមន្ត្រីស៊ីវិលប៉ុណ្ណោះ។
យោងតាមតាមទីភ្នាក់ងារព័ត៌មាន Xinhua លោក មហាធៀ បានបញ្ជាក់ក្នុងសន្និសីទសារព័ត៌មានក្រោយកិច្ចប្រជុំថា ប្រសិនបើមានវត្ថុអំណោយ អាចត្រឹមជាផ្កា អាហារ ឬផ្លែឈើប៉ុណ្ណោះ។ កាលពីក្នុងពេលស្វែងរកគាំទ្រ លោក មហាធៀ ដែលធ្លាប់កាន់តំណែងនាយករដ្ឋមន្ត្រី២២ឆ្នាំរួចហើយនោះ បានរិះគន់អតីតនាយករដ្ឋមន្ត្រី ណាជីប រ៉ាហ្សាក់ ថា ពុករលួយខ្លាំង។ លោកក៏បានសន្យាបង្កើតច្បាប់ប្រឆាំងការប្រើប្រាស់ទឹកប្រាក់ក្នុងវិស័យនយោបាយ និងរឹតបន្តឹងការបរិច្ចាគប្រាក់ទៀតផង។
បន្ថែមពីការហាមប្រាមទទួលអំណោយថ្លៃៗ នាយករដ្ឋមន្ត្រីទី៧ របស់ម៉ាឡេស៊ីរូបនេះក៏ប្រាប់ឲ្យសមាជិកគណៈរដ្ឋមន្ត្រីទាំងអស់ បូករួមទាំងលេខារបស់ពួកគេ ប្រកាសទ្រព្យសម្បត្តិចំពោះមុខនាយករដ្ឋមន្ត្រី។ ព័ត៌មានទាំងអស់ទាក់ទងការប្រកាសទ្រព្យសម្បត្តិនេះ នឹងត្រូវចែករំលែកទៅគណៈកម្មការប្រឆាំងអំពើពុករលួយរបស់ប្រទេសផង ដោយលោក មហាធៀ អះអាងថា នាយករដ្ឋមន្ត្រីមិនអាចលាក់បាំងអំពើពុករលួយរបស់មន្ត្រីក្រោមឱវាទឡើយ។
តាមពិតទៅនោះ បម្រាមទទួលអំណោយនេះ ក៏ជាវិន័យរបស់សម្ព័ន្ធភាពកាន់អំណាច Pakatan Harapan ដែរ។ ពោល គឺគណបក្ស Pakatan Harapan ដែលកំពុងដឹកនាំរដ្ឋាភិបាលក្រោយផ្ដួលសម្ព័ន្ធភាព Barisan Nasional កម្រិតមិនឲ្យអ្នកនយោបាយរបស់ខ្លួនទទួលអំណោយពីគេឡើយ វាលែងតែអំណោយនោះជាផ្កា ឬជាចំណីអាហារប៉ុណ្ណោះ។
សូមរំឭកថា ក្រោយស្បថចូលកាន់តំណែងជានាយករដ្ឋមន្ត្រីម៉ាឡេស៊ីទី ៧ ភ្លាមៗ គេឃើញមានការបន្តសាទរ និងការជូនពរឲ្យលោក មហាធៀ និងក្រុមគ្រួសារមានសុខភាពល្អ ព្រមទាំងបន្តដឹកនាំប្រទេសទៅមុខទៀត។ ប៉ុន្តែមានខ្លះទៀតជូនអំណោយដល់លោក មហាធៀ និងភរិយាផងដែរ ប៉ុន្តែត្រូវបានបដិសេធ។ ក្នុងសន្និសីទសារព័ត៌មានខាងលើ លោក មហាធៀ អះអាងជាថ្មីថា បើមានអ្នកចង់ឲ្យអំណោយដល់លោក នោះពិតជាមិនបានឡើយ៕
Tag:
ម៉ាឡេស៊ី
មហាធៀ មហាម៉ាត់
អំពើពុករលួយ
© រក្សាសិទ្ធិដោយ thmeythmey.com