មន្ត្រីអប់រំដែលបំពេញភារកិច្ចពេលប្រឡងបាក់ឌុប ត្រូវស្អាតស្អំ ព្រោះបើប្រព្រឹត្តខុសនឹងរងទណ្ឌកម្ម

ជាតិ

បាក់ឌុប

មន្ត្រីអប់រំដែលបំពេញភារកិច្ចពេលប្រឡងបាក់ឌុប ត្រូវស្អាតស្អំ ព្រោះបើប្រព្រឹត្តខុសនឹងរងទណ្ឌកម្ម

19, Aug 2018 , 5:30 pm

រូបភាព

ដោយ:

ភ្នំពេញ៖ បុគ្គលិកអប់រំដែលត្រូវបានចាត់តាំងឱ្យបំពេញភារកិច្ចជា ប្រធាន អនុប្រធាន និងសមាជិកនៃគណៈមេប្រយោគ គណៈកម្មការ ឬអនុអគណៈកម្មការនានា ក្នុងដំណើរការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ត្រូវទទួលខុសត្រូវក្នុងដំណើរការប្រឡងតាមភារកិច្ចរៀងខ្លួន។ ក្នុងករណីប្រព្រឹត្តកំហុស ពួកគាត់ត្រូវទទួលទណ្ឌកម្មខាងវិន័យ ដែលមាន ២ថ្នាក់ ស្រាល និងធ្ងន់។ នេះបើតាមការប្រកាសនៃក្រសួងអប់រំ ស្ដីពីការកម្រិតវិន័យចំពោះបុគ្គលិកអប់រំក្នុងការប្រឡងបាក់ឌុប។

សេចក្ដីប្រកាសខាងលើបានបន្តថា ការប្រព្រឹត្តសកម្មភាពមិនត្រឹមត្រូវក្នុងដំណើរការទូទៅនៃការប្រឡង ក្នុងនោះជារួមបង្កើតបណ្ដាញស្វែងរកផលកម្រៃពីការប្រឡង, យកទូរសព្ទ ឬឧបករណ៍អេឡិចត្រនិកគ្រប់ប្រភេទចូលមណ្ឌលប្រឡង, ជួយលាក់កំបាំងទង្វើខុសឆ្គងនៃគណៈមេប្រយោគ ឬគណៈកម្មការប្រឡង, មិនបានអនុវត្តពេញលេញភារកិច្ចដែលជាការកំណត់របស់ក្រសួង។

ការប្រព្រឹត្តសកម្មភាពមិនត្រឹមត្រូវពេលសំណេរ ឱ្យបេក្ខជនចម្លងកិច្ចការគ្នា,គំរាម ឬសម្លុតបេក្ខជនក្នុងពេលប្រឡង, ធ្វើ ឬយកចម្លើយវិញ្ញាសាឱ្យបេក្ខជន, អនុញ្ញាតឱ្យបេក្ខជនយកសំណៅឯកសារ និងឧបករណ៍អេឡិចត្រូនិចគ្រប់ប្រភេទចូលបន្ទប់ប្រឡង, ធ្វើឱ្យរំខាន់ដល់បេក្ខជនក្នុងពេលប្រឡង, ប្ដូរប្លង់តុឱ្យបេក្ខជនខុសពីការកំណត់នៃគណៈមេប្រយោគ។ ទាំងអស់នេះជាទណ្ឌកម្មថ្នាក់ទី១ ដោយមិនទាន់គិតពីទោសតាមក្រមព្រហ្មទណ្ឌ។

ចំពោះទោសប្បញ្ញតិ្ត បទល្មើសពាក់ព័ន្ធនឹងដំណើរការនៃកាប្រឡង តាមមាត្រា៥០ នៃច្បាប់ស្ដីពីការអប់រំបានចែងថា គ្រប់ទង្វើដែលប្រព្រឹត្តដោយបុគ្គលិកអប់រំមានភាពមិនត្រឹមត្រូវ ក្នុងដំណើរកានៃការប្រឡង ដូចបានប្បញ្ញត្តិក្នុងមាត្រា២៦ នៃច្បាប់ដដែលនេះ ត្រូវទទួលពិន័យអន្តរការណ៍ជាប្រាក់ពី ២.០០០.០០០(ពីរលានរៀល) ទៅ ១០.០០០.០០០(ដប់លានរៀល)។ នេះបើតាមសេចក្ដីប្រកាសខាងលើ និងបានបញ្ជាក់ថា៖«ក្នុងករណីមិនរាងចាល ត្រូវទទួលពិន័យអន្តរការណ៍ជាប្រាក់ទ្វេដង។ ហើយចំពោះបុគ្គលិកអប់រំសាធារណៈត្រូវទទួលទណ្ឌកម្មវិន័យថ្នាក់ទី២បន្ថែមទៀត»។

បទល្មើសការបន្លំក្នុងការប្រឡង តាមមាត្រា៤៩ នៃច្បាប់ស្ដីពីការអប់រំ ចែងថា សាម៉ីខ្លួន ឬជនណាដែលប្រឡងជំនួស ឬបន្លំគ្រប់រូបភាពក្នុងការប្រឡងដូចបានប្បញ្ញត្តិក្នុងមាត្រា២៦ នៃច្បាប់ដដែលនេះ ត្រូវទទួលពិន័យអន្តរការណ៍ជាប្រាក់ពី ១.០០០.០០០(មួយលានរៀន) ទៅ ៥.០០០.០០០(ប្រាំលានរៀល)។ ក្នុងករណីមិនរាងចាល សាមីខ្លួនត្រូវទទួលពិន័យអន្តរការណ៍ជាប្រាក់ចំនួនទ្វេដងនៃប្រាក់ពិន័យ ហើយត្រូវព្យួរការប្រឡងសម្រាប់រយៈពេល ២ឆ្នាំ ឬហាមឃាត់មិនឱ្យចុះឈ្មោះក្នុងបញ្ជីប្រឡងជាស្ថាពរ៕