នាយករដ្ឋមន្ត្រីវៀតណាម ដាស់តឿនអ្នកការទូតខ្លួនឲ្យផ្តោតការងារលើវិស័យសេដ្ឋកិច្ចនិងពាណិជ្ជកម្ម

អន្តរជាតិ

នាយករដ្ឋមន្ត្រីវៀតណាម ដាស់តឿនអ្នកការទូតខ្លួនឲ្យផ្តោតការងារលើវិស័យសេដ្ឋកិច្ចនិងពាណិជ្ជកម្ម

19, Aug 2018 , 9:29 pm

រូបភាព

ដោយ:

ខណៈពេលដែលស្ថានភាពសេដ្ឋកិច្ចរក្សាកំណើនជាបន្តបន្ទាប់គួរឲ្យកត់សម្គាល់នោះ រដ្ឋាភិបាលក្រុងហាណូយ បានស្នើឲ្យអ្នកការទូតរបស់ខ្លួនទាំងអស់ផ្តោតការងារសំខាន់លើវិស័យពាណិជ្ជកម្ម និងជួយលើកស្ទួយសេដ្ឋកិច្ចជាតិឲ្យកាន់តែល្អប្រសើរ។ ក្រុងហាណូយ បានមើលឃើញពីសក្តានុពលរបស់អ្នកការទូត ពិសេសអគ្គរដ្ឋទូតរបស់ខ្លួនដែលកំពុងបម្រើការនៅតាមបណ្តាប្រទេសដៃគូ។

លោកនាយករដ្ឋមន្ត្រី Nguyễn Xuân Phúc នៅថ្ងៃ១៥ សីហា បានថ្លែងទៅកាន់មន្ត្រីការទូតជាន់ខ្ពស់របស់ខ្លួនថា វិស័យការទូតត្រូវអនុវត្តឲ្យមានប្រសិទ្ធភាពដើម្បីបង្កើនការអភិវឌ្ឍសេដ្ឋកិច្ច ហើយតាមរយៈការបំពេញមុខងារនេះ អ្នកការទូត ក៏គួរតែកែប្រែទំនាក់ទំនងល្អរវាងវៀតណាម និងដៃគូបរទេសឲ្យក្លាយជាឱកាសសម្រាប់កិច្ចសហប្រតិបត្តិការសេដ្ឋកិច្ច និងសមាហរណកម្មសកល។

តាមរយៈសន្និសីទការទូតលើក៣០របស់ប្រទេស លោកនាយករដ្ឋមន្ត្រី បានទទូចឲ្យគ្រប់អ្នកការទូតវៀតណាមទាំងអស់បំពេញតួនាទីឲ្យកាន់តែសកម្មក្នុងការតម្រែតម្រង់ និងលើកកម្ពស់ភាពជាដៃគូពហុភាគី ក៏ដូចជាចង្អុលបង្ហាញ និងបង្កើនកិច្ចសហប្រតិបត្តិការបន្ថែមដោយផ្តោតលើសេដ្ឋកិច្ចជាធំ។ នេះបើយោងតាមការចុះផ្សាយរបស់សារព័ត៌មានវៀតណាម Vietnam News។

តាមប្រភពព័ត៌មានដដែល ប្រមុខរដ្ឋាភិបាលវៀតណាមរូបនេះ បានបន្តទៀត អ្នកការទូត ក៏ត្រូវតែផ្តល់ព័ត៌មាន និងធ្វើបច្ចុប្បន្នភាពរបាយការណ៍ស្តីពីទីផ្សារបរទេស ក៏ដូចជាផ្តល់ប្រឹក្សាលើការទូតវិស័យសេដ្ឋកិច្ច និងការអភិវឌ្ឍរបស់បរទេស សម្រាប់រដ្ឋាភិបាល ក្រសួង អាជ្ញាធរតាមតំបន់ និងសហគ្រាស។ លោក សង្កត់ធ្ងន់ថា ការធ្វើបែបនេះ អាចធ្វើឲ្យរដ្ឋាភិបាលអនុវត្តគោលនយោបាយកាន់តែប្រសិទ្ធភាព និងនាំវៀតណាមឲ្យក្លាយជាប្រទេសសេដ្ឋកិច្ចឆ្លាត និងឌីជីថល « Digital and Smart Economy »។

សូមជម្រាបថា តាមរបាយការណ៍វាយតម្លៃសេដ្ឋកិច្ច វៀតណាមមានកំណើនសេដ្ឋកិច្ចខ្ពស់រយៈពេលដប់ឆ្នាំចុងក្រោយ។ កន្លងមក អាជ្ញាធរវៀតណាមព្យាករថា សេដ្ឋកិច្ចខ្លួននឹងអាចកើនឡើងដល់ ៦,៨ ភាគរយក្នុងឆ្នាំ ២០១៨ នេះខណៈដែលខាងធនាគារពិភពលោកវាយតម្លៃថា សេដ្ឋកិច្ចវៀតណាមនេះអាចមានកំណើនត្រឹម ៦,៥ប៉ុណ្ណោះ៕