កីឡាជាតិ
ជាតិ
រូបភាពពីហ្វេសប៊ុក Hun Sen Cup
×![]()
ក្រុមក្រសួងការពារជាតិ(ទ័ព)ត្រូវប្រជែងជាមួយអគ្គស្នងការនគរបាលជាតិ(ប៉ូលិស)ដើម្បីដណ្តើមជើងឯកពានរង្វាន់សម្តេច ហ៊ុន សែន ប្រចាំឆ្នាំ២០១៨ នៅម៉ោង៦:៣០នាទីល្ងាចថ្ងៃទី៦ ខែតុលានេះ នាពហុកីឡដ្ឋានជាតិ។ ការចូលរួមរបស់អ្នកគាំទ្រនៅថ្ងៃនេះ មិនគ្រាប់តែជួយលើកទឹកចិត្តកីឡាករ ឬក្លិបប៉ុណ្ណោះទេ ថែមទាំងបានរួមចំណែកក្នុងសកម្មភាពអំពើមនុស្សធម៌ទៀតផង ព្រោះថវិកាមួយចំនួន ដែលបានពីការលក់សំបុត្រ នឹងយកទៅបរិច្ចាគជូនមន្ទីរពេទ្យគន្ធបុប្ផា។
មុនឡើងមកជួបគ្នានៅវគ្គផ្តាច់ព្រ័ត្រនេះ ក្រុមក្រសួងការពារជាតិបានទម្លាក់ណាហ្គាវើលក្នុងលទ្ធផល ៣-១ នៅវគ្គពាក់កណ្តាលផ្តាច់ព្រ័ត្រ ខណៈអគ្គស្នងការនគរបាលជាតិទម្លាក់អង្គរថាយហ្គឺរជាមួយលទ្ធផល ២-០។ បើតាមប្រវត្តិតាំងពីបង្កើតពានរង្វាន់នេះនៅឆ្នាំ២០០៧ នេះជាលើកទី១ហើយ ដែលក្រុមទាំងពីរបានឡើងមកជួបគ្នានៅវគ្គផ្តាច់ព្រ័ត្រ។
ក្រសួងការពារជាតិធ្លាប់ឡើងដល់វគ្គផ្តាច់ព្រ័ត្រចំនួន៣លើក និងបានគ្រងជើងឯកពីរលើកនៅឆ្នាំ២០១០ ក្រោយយកឈ្នះភ្នំពេញក្រោន ៣-២ និង២០១៦ បន្ទាប់ពីយកឈ្នះព្រះខ័នរាជស្វាយរៀងដោយបាល់កាត់សេចក្តី ៦-៥ និងលេខ២មួយលើកនៅឆ្នាំ២០១៣ ចាញ់ណាហ្គាវើលដោយបាល់កាត់សេចក្តី ៥-៣។ ក្រុមនេះទទួលបាន៤ម្តងផងដែរនៅឆ្នាំ២០១១ ក្រោយចាញ់ណាហ្គាវើល ១-០។
ចំណែកក្រុមអគ្គស្នងការនគរបាលជាតិធ្លាប់ឈ្នះជើងឯក១លើកនៅឆ្នាំ២០១៤ ក្រោយយកឈ្នះបៀលប្រាយយូណាយធីត ២-០ នៅវគ្គផ្តាច់ព្រ័ត្រ។ នៅឆ្នាំ២០១២ ប៉ូលិសទទួលបានលេខ៣ក្រោយយកឈ្នះក្រុមឆ្លាមសមុទ្រ ៣-០ នៅវគ្គដណ្តើមយកចំណាត់ថ្នាក់លេខ៣ មុនមកបានលេខ៤នៅឆ្នាំ២០១៥ ក្រោយចាញ់អង្គរថាយហ្គឺរ ៣-០។
អ្នកចូលរួមទស្សនាការប្រកួតវគ្គផ្តាច់ព្រ័ត្រនៅថ្ងៃនេះ មិនត្រឹមតែបានជួយលើកទឹកចិត្ដកីឡាករ និងក្លិបប៉ុណ្ណោះទេ ថែមទាំងបានរួមចំណែកក្នុងអំពើមនុស្សធម៌ទៀតផង។ គណៈកម្មការរៀបចំការប្រកួត នឹងដកថវិកាចំនួន១ពាន់រៀលពីការលក់សំបុត្រនីមួយៗយកទៅបរិច្ចាគជូនមន្ទីរពេទ្យគន្ធបុប្ផា។ សុំបុត្រដែលដាក់នៅពហុកីឡដ្ឋានជាតិមានពីរប្រភេទ គឺតម្លៃ៣ពាន់រៀលសម្រាប់កន្លែងអត់កៅអី និង៥ពាន់រៀលកន្លែងមានកៅអី៕
Tag:
បាល់ទាត់
ទ័ព
ប៉ូលិស
Hun Sen Cup 2018
© រក្សាសិទ្ធិដោយ thmeythmey.com
