ថវិការដ្ឋសភាឆ្នាំ២០១៩ នឹងកើនឡើង១,៦ភាគរយ

ជាតិ

ថវិការដ្ឋសភាឆ្នាំ២០១៩ នឹងកើនឡើង១,៦ភាគរយ

25, Oct 2018 , 9:19 pm

រូបភាព

ដោយ: ថ្មីៗ

ភ្នំពេញ៖ ថវិការដ្ឋសភា សម្រាប់ប្រើប្រាស់ក្នុងឆ្នាំ២០១៩ នឹងកើនឡើង១,៦ភាគរយ បើធៀបនឹងឆ្នាំ២០១៨។ ថវិកាទាំងនេះ ត្រូវបានគណៈកម្មាធិការអចិន្ត្រៃយ៍រដ្ឋសភា ពិនិត្យសេចក្តីព្រាងថវិកា នៅព្រឹកថ្ងៃទី២៥ តុលានេះ ដើម្បីដាក់បញ្ចូលទៅក្នុងថវិកាជាតិឆ្នាំ២០១៩។ នេះបើតាមលោក ឡេង ប៉េងឡុង អ្នកនាំពាក្យរដ្ឋសភា។

លោក ឡេង ប៉េងឡុង បាននិយាយថា មូលហេតុដែលថវិការដ្ឋសភា សម្រាប់ប្រើប្រាស់ឆ្នាំ២០១៩ មានការកើនឡើង ដោយសាររដ្ឋសភា ត្រូវចំណាយច្រើនលើប្រាក់ខែមន្ត្រីរាជការ និងប្រាក់បំណាច់មុខងារមន្ត្រីរាជការ ដែលត្រូវបានដំឡើង១០ភាគរយ។ ហេតុផលមួយទៀតនោះ គឺការកើនថវិការដ្ឋសភានេះ ដើម្បីឲ្យមានសុក្រឹត្យភាព ជាមួយថវិកាខាងព្រឹទ្ធសភា។

ត្រូវធ្វើឲ្យមានសុក្រឹត្យភាពខាងថវិកាជាមួយព្រឹទ្ធសភា ពោលថវិកាសម្រាប់ប្រើប្រាស់ក្នុងរដ្ឋសភា និងព្រឹទ្ធសភា ត្រូវតែស្នើគ្នា។ លោកបន្តថា ហេតុផលម្យ៉ាងទៀតដែលធ្វើឲ្យថវិកាជាតិ ត្រូវចំណាយច្រើនជាងមុន ក៏ដោយសារប្រាក់ខែមន្ត្រីរាជការ ត្រូវបានដំឡើងផងដែរ។

យោងតាមច្បាប់ថវិកានេះ រដ្ឋសភាចំណាយ ១៨០,៨៨៧.៧លានរៀល ហើយព្រឹទ្ធសភាចំណាយ ៧៣,៦១៧លានរៀល។ នេះបើតាមលោក ឡេង ប៉េងឡុង។

សូមស្ដាប់សំឡេងអ្នកនាំពាក្យរដ្ឋសភា៖

គួរបញ្ជាក់ថា ថវិកាជាតិកាលពីឆ្នាំ២០១៨ មានទំហំ ២៤ ៣៧៥ ១០២ លានរៀល (ប្រហែល ៦០៣៣ លានដុល្លារ កើនឡើង ១៥,២ភាគរយ ធៀបនឹងថវិកាក្នុងច្បាប់ឆ្នាំ២០១៧។ ថវិកាចំណាយនេះ គឺស្មើ ២៤,៥៩ភាគរយនៃផលិតផលជាតិសរុប (GDP) ៕