កីឡាជាតិ
ជាតិ
លោក ឬទ្ធី សំណាង ជួបជជែកពីរឿងផ្ទេរកីឡាករដ៏ចម្រូងចម្រាសជាមួយ FFC ថ្ងៃនេះ ![លោក ឬទ្ធី សំណាង ប្រធានក្លិបភ្នំពេញក្រោន។ រូបថត វេបសាយភ្នំពេញក្រោន](https://image.thmeythmey.com/pictures/2018/12/20/ssa.jpg)
លោក ឬទ្ធី សំណាង ប្រធានក្លិបភ្នំពេញក្រោន។ រូបថត វេបសាយភ្នំពេញក្រោន
×![]()
លោក ឬទ្ធី សំណាង ប្រធានក្លិបបាល់ទាត់ភ្នំពេញក្រោន ជួបជាមួយសហព័ន្ធកីឡាបាល់ទាត់កម្ពុជានៅរសៀលនេះ ដើម្បីពិភាក្សារកដំណោះស្រាយលើបញ្ហាផ្ទេរកីឡាករទាំង៥រូបដ៏ចម្រូងចម្រាស។ តាមពិតជំនួបនេះ គ្រោងធ្វើឡើងតាំងពីថ្ងៃទី១៧ ខែធ្នូ ឆ្នាំ២០១៨ មកម្ល៉េះ តែដោយសារថ្នាក់ដឹកនាំក្លិបរូបនេះ ជាប់បំពេញបេសកកម្មនៅក្រៅប្រទេស។
ក្រោយមានបញ្ហាចម្រូងចម្រាសពាក់ព័ន្ធការផ្ទេរកីឡាករ៥រូបរបស់ភ្នំពេញក្រោនទៅកាន់ក្លិបវិសាខា ក្លិបបាល់ទាត់ភ្នំពេញក្រោនបានចេញសេចក្តីថ្លែងការណ៍មួយ ដោយប្រកាសបញ្ឈប់កម្មវិធីអភិវឌ្ឍថ្នាលបាល់ទាត់ និងដកខ្លួនចេញពីការប្រកួតក្របខណ្ឌលីគកំពូលជាដើម។ ការប្រកាសបែបនេះ ធ្វើឡើងក្រោមលក្ខខណ្ឌ ប្រសិនបើពុំទទួលបានដំណោះស្រាយសមស្របពាក់ព័ន្ធបញ្ហាចម្រូងចម្រាសខាងលើ។
ក្រោយបញ្ហានេះកើតឡើង សហព័ន្ធកីឡាបាល់ទាត់កម្ពុជា ដែលជាអាណាព្យាបាល បានកោះហៅក្លិបទាំងពីរ និងសាមីកីឡាករមកសាកសួរជុំវិញបញ្ហានេះ ដើម្បីស្វែងរកដំណោះស្រាយសមស្របរួមមួយសម្រាប់ភាគីទាំងពីរ។ តែភាគីក្លិបភ្នំពេញក្រោនត្រូវបានអវត្តមានក្នុងជំនួប ដែលគ្រោងរៀបចំនៅថ្ងៃទី១៧ ធ្នូ ឆ្នាំ២០១៨ ដោយសារជាប់បេសកកម្មនៅក្រៅប្រទេស។
មកទល់ពេលនេះសហព័ន្ធបានជួបភាគីខាងក្លិបវិសាខា និងសាមីខ្លួនកីឡាករហើយនៅឡើយតែខាងភ្នំពេញក្រោនតែប៉ុណ្ណោះ។ បើតាមគេហទំព័រផ្លូវការរបស់ក្លិបបាល់ទាត់ភ្នំពេញក្រោន លោក ឬទ្ធី សំណាង ប្រធានក្លិបភ្នំពេញក្រោន ត្រូវជួបជជែករកហេតុផលជាមួយសហព័ន្ធកីឡាបាល់ទាត់នៅម៉ោង២រសៀលថ្ងៃទី២០ ខែធ្នូ ឆ្នាំ២០១៨។ ទាំងថ្នាក់ដឹកនាំក្លិបភ្នំពេញក្រោន និងវិសាខាសុទ្ធតែរំពឹងទទួលបានលទ្ធផលល្អពីការសម្របសម្រួលរបស់សហព័ន្ធពាក់ព័ន្ធបញ្ហាដ៏ចម្រូងចម្រាសនេះ។
ក្រោយការចាកចេញរបស់កីឡាករ៥រូបរួម ស៊ិន កក្កដា, អ៊ិន សូដាវីដ, អ៊ុក សុវណ្ណ, គឹម ឆៃយ៉ា និង កែន ចាន់សុភ័ក្ត្រ ដែលជាយុវជនថ្នាលរបស់ភ្នំពេញក្រោនទៅកាន់ក្លិបវិសាខា ដោយគ្មានសំណងអភិវឌ្ឍន៍ ក្លិបភ្នំពេញក្រោនបានប្រកាសយ៉ាងម៉ឺងម៉ាត់ថា៖«ក្លិបនឹងមិនចេញលិខិតអនុញ្ញាតិសម្រាប់កីឡាករណាម្នាក់ដែលស្ថិតក្នុងគម្រោងនៃការបណ្តុះបណ្តាលថ្នាលរបស់ភ្នំពេញក្រោនទៅកាន់ក្លិបដទៃ ដោយគ្មានតម្លៃសំណងអភិវឌ្ឍន៍នោះឡើយ ហើយប្រសិនបើបញ្ហានេះមិនត្រូវបានដោះស្រាយដោយសមស្របទេ ក្លិបបាល់ទាត់ភ្នំពេញក្រោន នឹងបញ្ឈប់សកម្មភាពអភិវឌ្ឍបាល់ទាត់ថ្នាលទាំងអស់ ហើយនឹងប្រកាសដកខ្លួនចេញពីការប្រកួតលីគកំពូលកម្ពុជា ឬមិត្តហ្វូនខេមបូឌានលីគ»៕
Tag:
បាល់ទាត់
ឬទ្ធី សំណាង
FFC
© រក្សាសិទ្ធិដោយ thmeythmey.com