ក្រោយនាយករដ្ឋមន្ត្រីព្រមានដាក់ខ្នោះ លោក សម រង្ស៊ី តបថានឹងមកកម្ពុជា នៅឆ្នាំ២០១៩

ជាតិ

នយោបាយជាតិ

ក្រោយនាយករដ្ឋមន្ត្រីព្រមានដាក់ខ្នោះ លោក សម រង្ស៊ី តបថានឹងមកកម្ពុជា នៅឆ្នាំ២០១៩

29, Dec 2018 , 4:29 pm

រូបភាព

រូបពី AFP

ដោយ: ថ្មីៗ

លោក សម រង្ស៊ី ហាក់មិនញញើតនឹងការព្រមានចាប់ដាក់គុកពីសំណាក់ប្រមុខរដ្ឋាភិបាលកម្ពុជាឡើយ។ ក្រោយឮការព្រមាន លោក ក៏បានបង្ហោះសារលើហ្វេសប៊ុកថា លោក នឹងវិលមកប្រទេសកម្ពុជា ក្នុងឆ្នាំ២០១៩។

លោក សម រង្ស៊ី ក៏បានលើកឡើងក្នុងវិទ្យុអាស៊ីសេរីផងដែរ ពីការធ្វើមាតុភូមិនិវត្តនេះ។ ប៉ុន្តែ លោក មិនប្រាប់ឡើយថា លោក នឹងវិលមកនៅថ្ងៃ-ខែណាឲ្យច្បាស់លាស់។ ក្នុងបទសម្ភាសជាមួយលោក ជុន ច័ន្ទបុត្រ លោក សម រង្ស៊ី បានប្រៀបធៀបថា កងទ័ព ដែលរៀបចំប្រតិបត្តិសឹក ដើម្បីវាយលុកទីណាមួយ មិនអាចប្រកាសប្រាប់សត្រូវពីគម្រោងរបស់ខ្លួននោះទេ។

លោក ពន្យល់បែបនេះថា៖«[….] គេមិនដែលប្រាប់មុនទេថា ទៅតាមផ្លូវនេះ តាមច្រកនោះ ម៉ោងប៉ុន្មានទៅដល់ តាមរបៀបយ៉ាងម៉េច និងមានកម្លាំងប៉ុន្មាន។ បើយើងជាមេទ័ព ហើយយើងប្រកាសឲ្យខ្មាំង ដឹងមុនទាំងអស់ថា យើង ធ្វើអី អាហ្នឹង គេ ចាំវាយឆ្មក់ គេចាំកម្ទេចយើងហើយ.....»។

ក្រៅពីនិយាយពីការធ្វើមាតុភូមិនិវត្ត លោក សម រង្ស៊ី ដែលទើបនឹងឡើងកាន់តំណែងជាប្រធានស្តីទីនៃអតីតគណបក្សសង្គ្រោះជាតិ ក៏បានបង្ហាញការជឿជាក់របស់លោកផងដែរថា កម្ពុជា នឹងត្រូវផ្លាស់ប្តូរជាមិនខាន។ លោក សង្កត់បែបនេះថា៖«ខ្ញុំជឿជាក់១០០ភាគរយ ថានឹងមានការផ្លាស់ប្តូរជាវិជ្ជមាន ក្នុងអំឡុងឆ្នាំ២០១៩ ដូចអ្វីដែលប្រជារាស្ត្រខ្មែររង់ចាំចង់បានយូរមកហើយ។ [.....] ឆ្នាំ២០១៩ យើងនឹងបើកទំព័រប្រវត្តិសាស្ត្រថ្មីមួយ នៅប្រទេសកម្ពុជា»។

លោក សម រង្ស៊ី ប្រកាសជាថ្មីពីការវិលត្រឡប់នេះ គឺបន្ទាប់ពីឮការព្រមានរបស់សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា។ ក្នុងពិធីជួបសំណេះសំណាលជាមួយកម្មករ-កម្មការិនី នាពេលថ្មីៗនេះ ប្រធានគណបក្សកាន់អំណាច បានពន្យុះលោក សម រង្ស៊ី ឲ្យវិលមកវិញ បើពិតជាក្លាហានមែន។ ប៉ុន្តែ មេដឹកនាំរូបនេះ បានព្រលយពាក្យបំភ័យតាមក្រោយថា «គុកនិងខ្នោះ» បានត្រៀមសម្រាប់លោក សម រង្ស៊ី រួចហើយ។

ដោយឡែក លោក សុខ ឥសាន អ្នកនាំពាក្យគណបក្សកាន់អំណាច ក៏ឆ្លៀតចំអកឲ្យលោក សម រង្ស៊ី តាមមេដឹកនាំរបស់ខ្លួនផងដែរ។ លោក បានសរសេរសារទៅកាន់អ្នកកាសែតតាមបណ្តាញទំនាក់ទំនងតេឡេក្រាមបែបនេះថា៖«កងកម្លាំងប្រដាប់អាវុធគ្រប់ប្រភេទ បានត្រៀមខ្លួនរួចជាស្រេច ដើម្បីចាប់ទណ្ឌិតសម រង្ស៊ី ញាត់គុក និងបង្ក្រាបគ្រប់ជនទំងឡាយណា ដែលធ្វើសកម្មភាពញុះញង់ឲ្យមានការគាំទ្រទណ្ឌិតសម រង្ស៊ី....»។

លោក សម រង្ស៊ី ប្រកាសមិនតិចដងឡើយពីគម្រោងវិលមកកម្ពុជា។ ប៉ុន្តែ ការប្រកាសទាំងនោះ តែងតែស្ងាត់ទៅវិញ។ លោក ព្យាយាមបកស្រាយថា មូលហេតុដែលលោក រំសាយគម្រោងវិលមកកម្ពុជា គឺដោយសារតែសភាពការណ៍មិនទាន់សមស្រប និងមានគេ ហាមឃាត់។

ចំណែក ការប្រកាសរបស់លោក សម រង្ស៊ី ថា កម្ពុជានឹងមានការផ្លាស់ប្តូរនោះ ក៏គេបានឮជាញឹកញាប់ដែរ។ ប៉ុន្តែជាលទ្ធផល គេ នៅតែឃើញគណបក្សកាន់អំណាច បន្តដឹកនាំប្រទេសដដែល ហើយក្រុមអ្នកប្រឆាំងរបស់លោក នៅតែខ្ចាត់ខ្ចាយនិងបែកខ្ញែកពីគ្នា ដោយអ្នកខ្លះ រស់នៅក្នុងស្រុកដោយស្ងៀមស្ងាត់ និងអ្នកខ្លះ បន្តទ្រាំរស់នៅឯក្រៅប្រទេស។

យ៉ាងណាក៏ដោយ ស្ថានភាពនៅកម្ពុជា អាចនឹងមានការប្រែប្រួល ប្រសិនបើមេដឹកនាំខាងប្រឆាំងនិងមេដឹកនាំខាងកាន់អំណាច ត្រូវរ៉ូវគ្នា ដោយប្រការណាមួយ នាពេលខាងមុខ។ មជ្ឈដ្ឋានជាច្រើន ជាពិសេសអ្នកតាមដានស្ថានការណ៍នយោបាយ បានលើកទឹកចិត្តនិងជំរុញឲ្យភាគីទាំងពីរ សម្រុះសម្រួលគ្នា និងព្យយាមកែប្រែស្ថានការណ៍ឲ្យមានភាពល្អប្រសើរ ដើម្បីគេចផុតពីទណ្ឌកម្មរបស់សហគមន៍អន្តរជាតិ៕