ខ្មែរក្រហម
ជាតិ
អង្គជំនុំជម្រះសាលាដំបូងបញ្ជាក់បន្ថែមស្តីពីការអនុវត្តចំពោះ អៀង ធីរិទ្ធ ![](https://image.thmeythmey.com/pictures/2013/07/22/ieng_thirith.jpg)
×![]()
លោក និល ណុន ប្រធានអង្គជំនុំជម្រះសាលាដំបូងនៃសាលាក្តីខ្មែរក្រហម កាលពីថ្ងៃទី១៩ ខែកក្កដា ឆ្នាំ២០១៣ បានធ្វើការបញ្ជាក់បន្ថែមទាក់ទងនឹងដីកាបង្គាប់ស្តីពីវិធានការដែលត្រូវអនុវត្តចំពោះជនជាប់ចោទ អៀង ធីរិទ្ធ។
កាលពីខែកញ្ញា ឆ្នាំ២០១២ អៀង ធីរិទ្ធ អតីតរដ្ឋមន្ត្រីក្រសួងសង្គមនៃរបបកម្ពុជាប្រជាធិបតេយ្យ ត្រូវបានតុលាការកំពូលនៃសាលាក្តីខ្មែរក្រហម ដោះលែងឲ្យនៅក្រៅឃុំដោយសារតែបញ្ហាស្មារតី ប៉ុន្តែការដោះលែងនេះ ត្រូវស្ថិតនៅក្រោមលក្ខខណ្ឌមួយចំនួន។
ការបញ្ជាក់បន្ថែមរបស់សាលាដំបូងនៃសាលាក្តីខ្មែរក្រហម គឺដើម្បីឆ្លើយតបនឹងមេធាវីការពារក្តី អៀង ធីរិទ្ធ ដែលសុំការណែនាំ និងការបញ្ជាក់បំភ្លឺលក្ខខណ្ឌនៃការដោះលែងជនជាប់ចោទដែលបច្ចុប្បន្នមានវ័យ៨១ឆ្នាំ។
យោងតាមលោក នេត ភត្រា អ្នកនាំពាក្យរបស់សាលាក្តីខ្មែរក្រហម វិធានការដែលត្រូវអនុវត្តចំពោះជនជាប់ចោទ អៀង ធីរិទ្ធ មិនមានអ្វីខុសពីការសម្រេចកន្លងមកឡើយ ប៉ុន្តែចំណុចដែលប្រធានអង្គជំនុំជម្រះសាលាដំបូង បានបន្ថែមនោះ គឺអង្គជំនុំជម្រះសាលាដំបូងនឹងចេញដីការបង្គាប់ដាច់ដោយឡែកមួយទាក់ទងនឹងការវាយតម្លៃឡើងវិញជាទៀតទាត់លើ អៀង ធីរិទ្ធ អំពីមុខងារសតិបញ្ញាស្មារតីរបស់គាត់នៅក្នុងខែកញ្ញា ឆ្នាំ២០១៣ និងការតែងតាំងអ្នកជំនាញមួយរូបនាពេលសមស្របខាងមុខ។
សូមបញ្ជាក់ថា សេចក្តីបង្គាប់ដែលអង្គជំនុំជម្រះសាលាដំបូងបានតម្រូវនោះ គឺ អៀង ធីរិទ្ធ ឬអាណាព្យបាលទូទៅ ត្រូវធ្វើការជូនដំណឹងយ៉ាងតិច៧ថ្ងៃ មុនពេលផ្លាស់ប្តូរអាស័យដ្ឋានរស់នៅ និងមុនការស្នើសុំធ្វើដំណើរចាកចេញពីកម្ពុជា។
បន្ថែមពីលើនេះ អង្គជំនុំជម្រះសាលាដំបូង តម្រូវឲ្យមានការផ្តល់ការបញ្ជាក់ជារៀងរាល់ខែនៅថ្ងៃចុងក្រោយនៃថ្ងៃធ្វើការក្នុងនីមួយៗ ដែលចាប់ផ្តើមពីថ្ងៃពុធ ទី៣១ ខែកក្កដា ឆ្នាំ២០១៣ ទាក់ទងនឹងការរស់នៅក្នុងអាស័យដ្ឋានបច្ចុប្បន្ន និងសេចក្តីរាយការណ៍អំពីការគំរាមកំហែងនានា។ ប្រសិនបើធ្វើដូច្នេះបាន អង្គជំនុំជម្រះសាលាដំបូងនឹងពុំតម្រូវឲ្យមានការត្រួតពិនិត្យបញ្ហាសន្តិសុខបន្ថែមណាមួយឡើយ៕
© រក្សាសិទ្ធិដោយ thmeythmey.com