ជាតិ
រដ្ឋមន្ត្រីពាណិជ្ជកម្ម ស្នើសមាជិកព្រឹទ្ធសភាអាមេរិក ជំរុញអ្នកវិនិយោគបោះទុនលើគ្រឿងបន្លាស់រថយន្ត ថាមពល និងកសិកម្មកម្ពុជា
រូបពីហ្វេសប៊ុកក្រសួងពាណិជ្ជកម្ម
×![]()
ដោយ: ធឿន បញ្ញាឬទិ្ធ
ភ្នំពេញ៖ រដ្ឋមន្ត្រីពាណិជ្ជកម្ម ស្នើឲ្យសមាជិកព្រឹទ្ធសភាអាមេរិក ជំរុញអ្នកវិនិយោគបោះទុនលើគ្រឿងបន្លាស់រថយន្ត ថាមពល និងកសិកម្មកម្ពុជា ដែលកំពុងមានសក្តានុពល និងឱកាសវិនិយោគនៅកម្ពុជា។ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ថ្លែងបែបនេះ ទៅកាន់លោក ដុក អេរិកសិន (Doug Ericksen) សមាជិកព្រឹទ្ធសភាអាមេរិក និងលោក ជេយ រូដនី (Jay Rodne) វីរៈសេនីយ៍ឯក មកពីរដ្ឋធានីវ៉ាស៊ីនតោន។
ថ្លែងក្នុងជំនួបនេះលោក ប៉ាន សូរស័ក្តិ បានប្រាប់គោលការណ៏វិនិយោគខ្លះៗនៅកម្ពុជា ទៅសមាជិកព្រឹទ្ធសភាអាមេរិកថា កម្ពុជា គឺជាប្រទេសបើកចំហរ ជាមួយគោលនយោបាយវិនិយោគល្អជាងគេនៅក្នុងតំបន់ ដែលវិនិយោគិនបរទេស អាចធ្វើប្រតិបត្តិការធុរកិច្ចលើគ្រប់វិស័យ ហើយអាចកាន់កាប់ភាគហ៊ុន និងប្រាក់ចំណេញ ១០០ភាគរយ ដោយមិនបាច់មានដៃគូសហការក្នុងស្រុក ព្រមទាំងទទួលការលើកលែងពន្ធនាំចូលគ្រឿងចក្រធុនធ្ងន់ សម្រាប់ការវិនិយោគលើវិស័យកសិកម្មទៀតផង។
ក្នុងន័យនេះរដ្ឋមន្ត្រីពាណិជ្ជកម្មកម្ពុជា បានស្នើឲ្យសមាជិកព្រឹទ្ធសភាអាមេរិក និងលោកវីរៈសេនីយ៍ឯក ជួយកៀងគរវិនិយោគិនអាមេរិក ឱ្យចូលមកបណ្តាក់ទុនថែមទៀតនៅកម្ពុជា លើវិស័យដែលមានសក្តានុពលសំខាន់ៗដូចជា ឧស្សាហកម្ម (គ្រឿងបន្លាស់រថយន្ត និងវាយនភណ្ឌ) ទេសចរណ៍ ហេដ្ឋារចនាសម្ព័ន្ធ ថាមពល បរិស្ថាន និងកសិកម្ម ដោយសារកម្ពុជាមានធនធានធម្មជាតិមិនទាន់កែច្នៃជាច្រើន ហើយអាចឲ្យធុរជនអាមេរិក អភិវឌ្ឍន៍ខ្សែចង្វាក់តម្លៃ ដើម្បីទាញយកប្រាក់ចំណេញខ្ពស់ពីការនាំចេញ។
ទាំងលោក ដុក អេរិកសិន (Doug Ericksen) សមាជិកព្រឹទ្ធសភាអាមេរិក និងលោក ជេយ រូដនី (Jay Rodne) វីរៈសេនីយ៍ឯក បានសន្យាប្រាប់ពីភាពវិជ្ជមាននេះទៅកាន់សហគមន៍ធុរកិច្ចនៅអាមេរិក ដើម្បីជំរុញការវិនិយោគពីអាមេរិក មកកាន់កម្ពុជាឱ្យកាន់តែច្រើន សំដៅលើការពង្រឹងទំនាក់ទំនងប្រទេសទាំងពីរ។
រាជរដ្ឋាភិបាល បានដាក់ចេញគោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ២០១៥-២០២៥ ដែលមានគោលដៅបង្កើនជំនាញ និងធ្វើពិពិធកម្មវិស័យកម្មន្តសាល ដើម្បីជំរុញកំណើនសេដ្ឋកិច្ច និងប្រែក្លាយកម្ពុជា ទៅជាប្រទេសមានប្រាក់ចំណូលមធ្យមកំរិតខ្ពស់ នៅឆ្នាំ២០៣០។ នេះបើតាមរដ្ឋមន្ត្រីក្រសួងពាណិជ្ជកម្ម៕
Tag:
ប៉ាន សូរស័ក្តិ
ពាណិជ្ជកម្ម
© រក្សាសិទ្ធិដោយ thmeythmey.com
