ខ្មែរក្រហម
ជាតិ
កម្ពុជា និង UN អំពាវនាវរួមគ្នាដើម្បីរកការគាំទ្រហិរញ្ញវត្ថុសម្រាប់ភាគីជាតិ
× បន្ទាប់ពីប្រាក់បៀវត្សរ៍បុគ្គលិកជាតិនៃសាលាក្ដីខ្មែរក្រហមត្រូវបានពន្យាពេលជាបន្តបន្ទាប់ ដោ យ សារតែជួបវិបត្តិថវិកានោះ តំណាងរដ្ឋាភិបាលកម្ពុជា និងតំណាង អគ្គលេខាធិការអង្គការសហប្រជាជាតិ បានចេញនូវសេចក្ដីថ្លែងការណ៍រួមគ្នាមួយដោយអំពាវនាវដល់សហគមន៍អន្តរជាតិ ព្រមទាំងប្រទេសក្នុងសហគមន៍អាស៊ាន ផ្ដល់នូវការគាំទ្រផ្នែកហិរញ្ញវត្ថុបន្ថែមទៀត។
យោងតាមសេចក្តីថ្លែងការរួមដែលចុះថ្ងៃទី១៩ ខែសីហា ការប្រកាសអំពាវនាវរកថវិកាបន្ថែមនាពេលនេះ គឺធ្វើឡើងដើម្បីចៀសវាងនូវការពន្យាពេលបន្តទៀតក្នុងការបើកប្រាក់ខែរបស់មន្ត្រីដែលជាបុគ្គលិកជាតិនៃសាលាក្ដីខ្មែរក្រហម។
តំណាងរដ្ឋាភិបាលកម្ពុជា និងតំណាងអគ្គលេខាធិការអង្គការសហប្រជាជាតិ ក៏បានសម្ដែងការស្វាគមន៍ ចំពោះកិច្ចពិភាក្សានាពេលថ្មីៗនេះរវាងលោក សុខ អាន និងលោក ដេវីដ សេហ្វ័រ អ្នកជំនាញការ អង្គការសហប្រជាជាតិសម្រាប់ជំនួយសាលាក្ដីខ្មែរក្រហម ដែលអ្នកទាំងពីរបានលើកយកបញ្ហាសំខាន់ៗដែលការិយាល័រដ្ឋបាលរបស់សាលាក្ដីខ្មែរក្រហមកំពុងប្រឈមចំពោះមុខមកជជែកពិភាក្សា។
ដោយអះអាងថា សាលាក្ដីខ្មែរក្រហមសម្រេចបានសមិទ្ធិផលជាប្រវត្តិសាស្ត្រសម្រាប់ប្រជាជនកម្ពុជា និងសម្រាប់យុត្តិធម៌ព្រហ្មទណ្ឌអន្តរជាតិនោះ រដ្ឋាភិបាលកម្ពុជា និងអង្គការសហប្រជាតិ ក៏បានបញ្ជាក់ជំហរជាថ្មីរបស់ខ្លួនថា នឹងបន្តគាំទ្រចំពោះការងារដ៏មានសារសំខាន់នេះ។ ប៉ុន្តែអ្វីដែលត្រូវការជាចាំបាច់នោះគឺ ការធានារនូវនិរន្តរភាពនៃជំនួយហិរញ្ញវត្ថុឲ្យបានគ្រប់គ្រាន់ដើម្បី ឲ្យសាលាក្ដីមួយនេះ អាចបន្តដំណើការសំណុំរឿង០០២ ដែលជាផ្នែកមួយនៃអាណត្តិការងាររបស់ខ្លួន។
នាដំណើរទស្សនកិច្ចនៅក្នុងប្រទេសកម្ពុជាកាលពីពេលថ្មីៗនេះ លោក Jerry Mateparae អគ្គទេសាភិបាលនៃប្រទេសនូវែលសេឡង់ បានសន្យាផ្តល់ថវិកាបន្ថែមចំនួន២០០.០០០ដុល្លារនូវែលសេឡង់ (ប្រមាណ១៦០.០០០ដុល្លារអាមេរិក) សម្រាប់ភាគីជាតិនៃសាលាក្តីខ្មែរក្រហម។
សូមបញ្ជាក់ថា កាលពីថ្ងៃទី៣១ ខែកក្កដា កន្លងមក លោក នេត្រ ភត្រា អ្នកនាំពាក្យសាលាក្តីខែ្មរក្រហម បានថ្លែងឲ្យដឹងថា ភាគីជាតិបានប្រកាសគម្រោងសុំសម្រាកពីការងារជាបណ្តោះអាសន្ន បើគ្មានដំណោះស្រាយថវិកា។ អ្នកនាំពាក្យរូបនេះ បានអះអាងថា ភាគីជាតិនៃអង្គជំនុំជម្រះវិសាមញ្ញក្នុងតុលាការកម្ពុជា បាននិងកំពុងតែជួបប្រទះនូវកង្វះសាច់ប្រាក់ដ៏ធ្ងន់ធ្ងរ ហើយមន្ត្រីបុគ្គលិកជាតិចំនួនជិត ២៥០នាក់ ចាប់ពីអ្នកបើកបររហូតដល់ចៅក្រមមិនទទួលបានប្រាក់ខែរបស់ខ្លួនរយៈពេលជាង ២ ខែមកហើយគឺខែមិថុនា និងខែកក្កដា៕
© រក្សាសិទ្ធិដោយ thmeythmey.com