អន្តរជាតិ
គ្រួសារអ្នកស្លាប់ក្នុងហេតុការណ៍ធ្លាក់យន្តហោះ Boeing 737 បានថ្លៃសំណងជាង១៤ម៉ឺនដុល្លារម្នាក់ ![ប្រភពរូប៖ Reuters](https://image.thmeythmey.com/pictures/2019/09/24/____________________________reuters.jpg)
ប្រភពរូប៖ Reuters
×![]()
មូលនិធិជំនួយហិរញ្ញវត្ថុ ៥០លានដុល្លារបស់ក្រុមហ៊ុន Boeing Co នឹងត្រូវបង់ដល់ក្រុមគ្រួសារអ្នកស្លាប់ទាំង៣៤៦នាក់ ក្នុងហេតុការណ៍ធ្លាក់យន្តហោះប្រភេទ 737 MAX ចំនួន២លើក ដោយម្នាក់ៗទទួលបាន ១៤៤ ៥០០ ដុល្លារ។
មូលនិធិ ដែលចាត់ចែងដោយផ្ទាល់ពីសំណាក់មេធាវីអាមេរិក Ken Feingberg និង Camille S.Biros នឹងចាប់ផ្តើមបើកប្រាក់ដល់សមាជិកគ្រួសារអ្នកស្លាប់ភ្លាមៗ ចាប់ពីថ្ងៃទី២៣ ខែកញ្ញា។ សមាជិកគ្រួសាររងគ្រោះទាំងនោះ នឹងមិនតម្រូវឲ្យលះបង់សិទ្ធិក្នុងការប្តឹង ដែលជាលក្ខខណ្ឌនៃការចូលរួមនោះទេ។
ការបើកប្រាក់នេះ ត្រូវធ្វើឡើងមិនឲ្យហួសពីថ្ងៃ៣០ វិច្ឆិកាឡើយ ហើយលក្ខខណ្ឌនៃការបើកប្រាក់ គឺថា ក្រុមគ្រួសារជនរងគ្រោះ អាចបើកប្រាក់សំណង់បានក្នុងពេល ១០ ថ្ងៃ ក្រោយពួកគេដាក់ពាក្យសុំរួចរាល់ ហើយឯកសារត្រូវបានពិនិត្យត្រឹមត្រូវ។
តាមការចុះផ្សាយរបស់ទីភ្នាក់ងារព័ត៌មាន Reuters នាយកប្រតិបត្តិក្រុមហ៊ុន Boeing លោក Dennis Muilenburg បានបញ្ជាក់ក្នុងសេចក្តីថ្លែងការណ៍ថា៖«យើងបន្តចូលរួមរំលែកទុក្ខយ៉ាងជ្រាលជ្រៅចំពោះសមាជិកគ្រួសារ និងមនុស្សជាស្រលាញ់ទាំងអស់លើយន្តហោះ [ធ្លាក់] នោះ។ ការបើកមូលនិធិនេះ គឺជាជំហានដ៏សំខាន់មួយក្នុងកិច្ចប្រឹងប្រែងយើងដើម្បីជួយដល់គ្រួសារជនរងគ្រោះ»។ បន្ថែមពីនេះ ក្នុងខែកក្កដា ក្រុមហ៊ុន Boeing ក៏បានប្រកាសថា ខ្លួនមានផែនការចំណាយលុយបន្ថែម ៥០លានដុល្លារដើម្បីគាំទ្រការពង្រឹងសេដ្ឋកិច្ច និងការអប់រំ ក្នុងសហគមន៍ដែលប៉ះពាល់។
សូមបញ្ជាក់ដែរថា យន្តហោះ Boeing 737 MAX ត្រូវបានផ្អាកការហោះហើរ ចាប់តាំងពីខែមីនា ឆ្នាំ២០១៩នេះមកម្ល៉េះ ក្រោយពីកើតហេតុការណ៍ធ្លាក់យន្តហោះក្នុងប្រទេសឥណ្ឌូណេស៊ី និងអេត្យូពី។ យ៉ាងណាមិញ ក្រុមហ៊ុន Boeing បានប្រកាសថា ខ្លួនមានគោលដៅយកឈ្នះលើបណ្ដឹងដើម្បីបន្តការហោះហើរឡើងវិញ នាដើមត្រីមាសទី៤នៃឆ្នាំ២០១៩នេះ។
ពាក្យបណ្តឹងជិត ១០០ ត្រូវបានប្តឹងប្រឆាំងក្រុមហ៊ុន Boeing ដោយក្រុមហ៊ុនច្បាប់តំណាងឲ្យសមាជិកគ្រួសារអ្នកស្លាប់ក្នុងហេតុការណ៍ធ្លាក់យន្តហោះរបស់ក្រុមហ៊ុនអាកាសចរណ៍អេត្យូពី ។ ជនរងគ្រោះទាំងនោះ គឺមកពីបណ្តាប្រទេស៣៦ ផ្សេងគ្នា ដោយក្នុងនោះ មានប្រជាជនអាមេរិក ៩ នាក់ និងកាណាដា ១៩នាក់៕
© រក្សាសិទ្ធិដោយ thmeythmey.com