អន្តរជាតិ
ប៉ូលិសឥណ្ឌូណេស៊ី បំបែកហ្វូងបាតុករដែលប្រឆាំងច្បាប់ពុករលួយនិងហាមរួមភេទមុនរៀបការ រូបភាព AFP
× ដោយ៖ ឈួន ឈីវអ៊ីង
ប៉ូលីសឥណ្ឌូណេស៊ី បានបាញ់ឧស្ម័នបង្ហូរទឹកភ្នែក និងបាញ់ទឹកដើម្បីបំបែកក្រុមអ្នកតវ៉ា នៅថ្ងៃទី២៤ កញ្ញា ខណៈនិស្សិតរាប់ពាន់នាក់បានប្រមូលផ្តុំគ្នានៅតាមទីក្រុងនានាទូទាំងប្រទេសដើម្បីធ្វើបាតុកម្មប្រឆាំងនឹងច្បាប់ពាក់ព័ន្ធអំពើពុករលួយ និងការហាមប្រាមការរួមភេទមុនរៀបការ។
សភាឥណ្ឌូណេស៊ីកាលពីសប្តាហ៍មុន បានអនុម័តការកែប្រែដ៏ចម្រូងចម្រាសពាក់ព័ន្ធច្បាប់គ្រប់គ្រងគណៈកម្មការលុបបំបាត់អំពើពុករលួយ។ នៅថ្ងៃទី២៤ ខែកញ្ញា មនុស្សរាប់ពាន់នាក់បានប្រមូលផ្តុំគ្នានៅខាងមុខ និងខាងក្រោយច្រកចូលអគារសភាក្នុងទីរដ្ឋធានីហ្សាការតា ដើម្បីទាមទារជួបប្រធានសភាលោក Bambang Soesatyo។
ប៉ូលីសបានបាញ់ឧស្ម័នបង្ហូរទឹកភ្នែកនិងទឹកដើម្បីបំបែកពួកគេ។ នៅក្រៅពីរដ្ឋធានី ការតវ៉ាក៏កើតមាននៅទីក្រុងឯទៀត។ ឧស្ម័នបង្ហូរទឹកភ្នែកក៏ត្រូវបានបាញ់ទៅលើក្រុមអ្នកតវ៉ាគប់ដុំថ្មនៅ Bandung ភាគខាងលិចកោះជ្វា ក៏ដូចជានៅ Makassar នៅលើកោះស៊ូឡាវេស៊ី ខណៈដែលក្រុមបាតុករបានបំបែករបាំងនៅខាងក្រៅការិយាល័យអភិបាលខេត្តនៅ Semarang។
ជារឿយៗ និស្សិតពាក់អាវធំមានពណ៌ចម្រុះរបស់ពួកគេ ប្រមូលផ្តុំគ្នានៅតាមទីក្រុងនានាទូទាំងប្រទេស។ បើតាមទូរទស្សន៍សិង្ហបុរី Channel NewAsia អ្នកតវ៉ាឈ្មោះ Fuad Wahyudin អាយុ ២១ ឆ្នាំនិយាយថា យើងនឹងទៅសភាដើម្បីប្រឆាំងនឹងច្បាប់ថ្មីសម្រាប់ទីភ្នាក់ងារប្រឆាំងអំពើពុករលួយដែលមិនមែនគាំទ្រប្រជាជនទេ ប៉ុន្តែគាំទ្រអ្នកប្រព្រឹត្តអំពើពុករលួយ។ បើតារបាយការណ៍នានា បុគ្គលិកប៉ូលិសជាងប្រាំពាន់នាក់ ត្រូវបានដាក់ពង្រាយដើម្បីការពារសន្តិសុខនៅហ្សាការតា។
អ្វីធ្វើឲ្យមានការតវ៉ានោះ គឺការបង្កើតគណៈកម្មការមួយទៀតដើម្បីគ្រប់គ្រងលើគណៈកម្មប្រឆាំងអំពើពុលរលួយ។ ក្រុមអ្នកប្រឆាំងបារម្ភថា ការណ៍នេះ នឹងធ្វើឲ្យការប្រយុទ្ធប្រឆាំងអំពើពុករលួយគ្មានប្រសិទ្ធភាព ហើយស្ថាប័នប្រឆាំងអំពើពុករលួយ លែងឯករាជ្យដូចមុន។
ក្រៅពីច្បាប់ទាក់ទងគណៈកម្មការប្រឆាំងអំពើពុករលួយ បាតុករក៏ប្រឆាំងវិសោធកម្មក្រមព្រហ្មទណ្ឌដែលមានគោលដៅដាក់ពិន័យចំពោះការរួមភេទមុនរៀបអាពាហ៍ពិពាហ៍ ការប្រមាថសេចក្តីថ្លៃថ្នូររបស់ប្រធានាធិបតី និងបញ្ញត្តិដែលចែងឲ្យជាប់ពន្ធនាគាររយៈពេល ៤ ឆ្នាំចំពោះការរំលូតកូនក្នុងករណីគ្មានការសង្គ្រោះបន្ទាន់ ឬការរំលោភសេពសន្ថវៈជាដើម។ គេបារម្ភថា សំណើច្បាប់នេះ នឹងប៉ះពាល់ខ្លាំងដល់សេរីភាពរបស់ប្រជាជនឥណ្ឌូណេស៊ី។
យ៉ាងណាមិញ ប្រធានាធិបតី ចូកូ វីដូដូ បានចេញបញ្ជាឲ្យផ្អាកសំណើវិសោធនកម្មនេះសិន៕
© រក្សាសិទ្ធិដោយ thmeythmey.com