អន្តរជាតិ
លោកស្រីមឺហ្គែល៖ កំណើនកម្តៅផែនដី គឺជាការគំរាមកំហែងដល់មនុស្សជំនាន់ក្រោយ លោកស្រីអធិការបតីអាល្លឺម៉ង់ អែនជែឡា មឺហ្គែល ថ្លែងសុន្ទរកថា ក្នុងឱកាសចូលឆ្នាំថ្មី។ រូបភាព៖Reuters
× លោកស្រីអធិការបតីអាល្លឺម៉ង់ អែនជែឡា មឺហ្គែល នៅថ្ងៃទី៣០ ខែធ្នូ បានទទួលស្គាល់បម្រែបម្រួលអាកាសធាតុពិតជាមានមែន ហើយអ្នកនយោបាយទាំងអស់ ត្រូវតែខ្វាយខ្វល់ពីបញ្ហានេះ ដើម្បីកុំឲ្យមនុស្សជំនាន់ក្រោយប្រឈមនឹងបញ្ហាបម្រែបម្រួលអាកាសធាតុ ។ ទន្ទឹមគ្នានេះ អធិការបតីអាល្លឺម៉ង់បានបន្តថា លោកស្រីនឹងប្រើកម្លាំងទាំងអស់ ដើម្បីដោះស្រាយបញ្ហាដ៏អាក្រក់មួយនេះ។
តាមរយៈកម្មវិធីថតទុកសម្រាប់ចាក់ផ្សាយនាថ្ងៃទី៣១ ខែធ្នូ ពេលល្ងាចដើម្បីអបអរចូលឆ្នាំថ្មី លោកស្រីអធិការបតីអាល្លឺម៉ង់ អែនជែឡា មឺហ្គែល បានទទួលស្គាល់ពីផលវិបាកនៃកំណើនកម្ដៅផែនដី ដែលប៉ះពាល់ទាំងមនុស្សសម័យបច្ចុប្បន្ន ហើយកំពុងគំរាមកំហែងអ្នកជំនាន់ក្រោយ។ ក្នុងនេះន័យ លោកស្រីអធិការបតី បានលើកឡើងថា ការកើនឡើងកម្តៅភពផែនដី និងបញ្ហាជាច្រើនទៀត ដែលកើតចេញពីបញ្ហាបម្រែបម្រួលអាកាសធាតុ គឺសុទ្ធតែបង្កើតឡើងដោយមនុស្ស។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
បើតាមលោកស្រី មឺហ្គែល មនុស្សគ្រប់ៗរូប ត្រូវតែចូលរួមដោះស្រាយបញ្ហាប្រឈមមួយនេះ និងធ្វើអ្វីតាមដែលមនុស្សគ្រប់រូប អាចធ្វើទៅបាន។ ដោយអះអាងថា លោកស្រីមិនធ្លាប់មានបទពិសោធពីការទទួលរងផលវិបាកពីការបម្រែបម្រួលអាកាសធាតុ លោកស្រីអធិការបតី បានទទូចឲ្យអ្នកនយោបាយទាំងអស់ត្រូវតែខ្វល់ និងចាត់វិធានការ ដោះស្រាយបញ្ហាមួយនេះ ព្រោះនៅពេលអនាគត ផលវិបាកដែលកើតចេញពីបញ្ហានេះ នឹងកើតឡើងជាមិនខាន។
ជាមួយគ្នានេះ លោកស្រីអធិការបតីអាល្លឺម៉ង់មានវ័យ ៦៥ឆ្នាំ លើកឡើងដែរថា បើមនុស្សទាំងឡាយនៅតែមិនអើពើពីបម្រែបម្រួលអាកាសធាតុ មនុស្សជំនាន់ក្រោយ នឹងរស់នៅក្នុងស្ថានភាពលំបាក ដែលកើតចេញពីបម្រែបម្រួលអាកាសធាតុ។ ដោយនិយាយមិនត្រឹមតែជំរុញមនុស្សគ្រប់រូបចូលរួមទេ លោកស្រី មឺហ្គែលថា លោកស្រី នឹងខិតខំឲ្យអស់ពីសមត្ថភាព ដើម្បីធានាថា អាល្លឺម៉ង់ នឹងបរិចាគធនធានរបស់ខ្លួន។ពោលគឺធ្វើយ៉ាងណា ដើម្បីឲ្យបញ្ហាបម្រែបម្រួលអាកាសធាតុ ស្ថិតក្រោមការគ្រប់គ្រងបាន។
បញ្ហាបម្រែបម្រួលអាកាស នៅតែមិនមានជាប្រធានបទអាទិភាពឡើយ សម្រាប់ប្រទេសមួយចំនួននៅលើពិភពលោក ទោះជាផលវិបាលរបស់វាស្ដែងចេញរាល់ថ្ងៃក៏ដោយ។ ក្នុងសន្និសីទលើកទី២៥ ស្តីពីការដោះស្រាយបម្រែបម្រួលអាកាសធាតុ (COP25) ដែលប្រព្រឹត្តទៅចាប់ពីថ្ងៃទី២ ដល់ ១៦ ខែធ្នូ នាទីក្រុងម៉ាឌ្រីដ អេស្ប៉ាញ គឺទទួលបានលទ្ធផលតែបន្តិចបន្ទួចតែប៉ុណ្ណោះ ព្រោះ ក្រុមប្រទេសធំៗដូចជាប្រេស៊ីល ឥណ្ឌាជាដើម បានច្រានចោលគម្រោងធំៗ ក្នុងការកាត់បន្ថយឧស្ម័នកាបូនិក។ ចំណែកបញ្ហាសំខាន់ៗជាច្រើន នៅតែមិនទាន់បានដោះស្រាយដដែល ៕
Tag:
អាល្លឺម៉ង់
អែនជែឡា មឺហ្គែល
© រក្សាសិទ្ធិដោយ thmeythmey.com