អន្តរជាតិ
នយោបាយអន្តរជាតិ
បក្សប្រជាធិបតេយ្យគ្រប់គ្រងព្រឹទ្ធសភាអាមេរិក ក្រោយឈ្នះអាសនៈទាំង២របស់រដ្ឋ Georgia
អាគារសភាតំណាង និងព្រឹទ្ធសភាអាមេរិក។ រូបភាព៖AFP
×![]()
បក្សប្រជាធិបតេយ្យ ទទួលបានអាសនៈពីរបន្ថែមទៀតក្នុងការបោះឆ្នោតជ្រើសរើសសមាជិកព្រឹទ្ធសភារដ្ឋ Georgia ។ ពីរអាសនៈបន្ថែមនេះ នាំឲ្យបក្សនេះទទួលបានអាសនៈចំនួន៥០ស្មើបក្សសាធារណរដ្ឋ ហើយក៏បញ្ចប់ការគ្រប់គ្រងព្រឹទ្ធសភាដោយបក្សសាធារណរដ្ឋចាប់ពីឆ្នាំ២០១០មក។ ជ័យជម្នះ ក៏ជារឿងល្អសម្រាប់លោក ចូ បៃឌិន ដែរ។
បន្ថែមពីការបន្តគ្រប់គ្រងសភាតំណាង ហើយមានបេក្ខជនជាប់ឆ្នោតដឹកនាំសេតវិមានទៀត បក្សប្រជាធិបតេយ្យ រឹតតែរីកមុខរីកមាត់ ក្រោយអាចកាន់កាប់ព្រឹទ្ធសភាឡើងវិញដែរ។ ក្នុងការបោះឆ្នោតជ្រើសរើសសមាជិកព្រឹទ្ធសភាតំណាងរដ្ឋ Georgia ជុំទីពីរ បេក្ខជនបក្សប្រជាធិបតេយ្យ២នាក់ យកឈ្នះបេក្ខជនបក្សសាធារណរដ្ឋ។
លោក Raphael Warnock បេក្ខជនបក្សប្រជាធិបតេយ្យ បានឈ្នះលោកស្រីសមាជិកព្រឹទ្ធសភា Kelly Loeffler នៃបក្សសាធារណរដ្ឋ។ ជ័យជម្នះរបស់លោក Warnock វ័យ៥១ឆ្នាំ នាំឲ្យលោកក្លាយជាសមាជិកព្រឹទ្ធសភាអាមេរិកស្បែកខ្មៅដំបូងបង្អស់មកពីរដ្ឋ Georgia ។ ឯលោក Jon Ossoff ទទួលជ័យជម្នះលើលោក David Perdue ដែលជាសមាជិកព្រឹទ្ធសភាប្រចាំរដ្ឋនេះចាប់ពីឆ្នាំ២០១៥មក។ លោក Ossoff វ័យ៣៣ឆ្នាំ នឹងក្លាយជាសមាជិកព្រឹទ្ធសភាក្មេងបំផុតរាប់ចាប់តាំងពីឆ្នាំ១៩៧៣មក។
សរុបអាសនៈទាំងពីរ បក្សប្រជាធិបតេយ្យមានអាសនៈ៥០ ស្មើបក្សសាធារណរដ្ឋដែរ។ ប៉ុន្តែបក្សប្រជាធិបតេយ្យ ជាអ្នកគ្រប់គ្រងព្រឹទ្ធសភា បើគិតអនុប្រធានាធិបតីអាមេរិក កាម៉ាឡា ហារីស មួយបន្ថែមទៀត។ បើការអនុម័តច្បាប់ ឬផ្តល់សេចក្តីទុកចិត្តដល់បេក្ខភាពរដ្ឋមន្ត្រី ឬមន្ត្រីសហព័ន្ធជាន់ខ្ពស់មានសំឡេងស្មើគ្នា លោកស្រី ហារីស នឹងបោះឆ្នោតកាត់សេចក្ដី។
ស្របពេលជាមួយគ្នានេះ សមាជិកព្រឹទ្ធសភាបក្សប្រជាធិបតេយ្យលោក Charles Schumer បានប្រកាសថា រូបលោកនឹងទទួលតំណែងជាប្រធានក្រុមសំឡេងភាគច្រើនក្នុងព្រឹទ្ធសភាអាមេរិក។ ពីឆ្នាំ២០១៧ មក លោកSchumer មានតំណែងជាប្រធានក្រុមសំឡេងភាគតិច ឯប្រធានក្រុមសំឡេងភាគច្រើន គឺលោក Mitch McConnell។
ជ័យជម្នះពេលនេះ នាំឲ្យបក្សប្រជាធិបតេយ្យគ្រប់គ្រងទាំងសេតវិមាន ទាំងសភាតំណាងរាស្ត្រ ទាំងព្រឹទ្ធសភាផ្ទាល់។ បក្យប្រជាធិបតេយ្យរបូតការគ្រប់គ្រងព្រឹទ្ធសភា និងសភាតំណាងរាស្ត្រក្នុងឆ្នាំ២០១០ និងសេតវិមានក្នុងឆ្នាំ២០១៦។
បើទោះបីជាបក្សប្រជាធិបតេយ្យគ្រប់គ្រងព្រឹទ្ធសភាក៏ពិតមែន នេះពុំបានន័យថា រដ្ឋបាល បៃឌិន អាចអនុម័តច្បាប់ដោយស្រួលនោះឡើយ។ នីតិវិធីព្រឹទ្ធសភាអាមេរិក តម្រូវឲ្យមានសំឡេងចំនួន៦០ភាគរយបោះឆ្នោតយល់ព្រមក្នុងការបញ្ចប់ការពិភាក្សាលើសេចក្តីព្រាងច្បាប់ណាមួយ(filibuster) បើទោះបីជាសេចក្តីព្រាងច្បាប់នោះ ត្រូវអនុម័តក្នុងសំឡេងលើស៥០ភាគរយក្ដី។ បក្សប្រជាធិបតេយ្យ ត្រូវធ្វើការធ្ងន់បន្តិចដើម្បីបញ្ចុះបញ្ចូលសមាជិកព្រឹទ្ធសភាបក្សសាធារណរដ្ឋយ៉ាងហោចណាស់១០រូបទៀតនៅពេលអនុម័តច្បាប់ណាមួយ។
បក្សប្រជាធិបតេយ្យ នឹងគ្រប់គ្រងព្រឹទ្ធសភាពីឆ្នាំ២០២១ ដល់ឆ្នាំខែមករា ឆ្នាំ២០២៣ ដោយសារតែនៅចុងឆ្នាំ២០២២ អាមេរិកនឹងមានការបោះឆ្នោតពាក់កណ្តាលអាណត្តិ ដែលក្នុងនោះអាសនៈសមាជិកព្រឹទ្ធសភាចំនួន៣៤រូបនឹងត្រូវប្រកួតប្រជែងសម្រាប់អាណត្តិ៦ឆ្នាំ។ បក្សប្រជាធិបតេយ្យ មានសមាជិកព្រឹទ្ធសភា១៤រូប ឯបក្សសាធារណរដ្ឋមាន២០រូប ដែលត្រូវបោះឆ្នោតឡើងវិញ៕
Tag:
បោះឆ្នោតអាមេរិក
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
