កម្ពុជាអាចចំណេញកន្លះលានដុល្លារអាមេរិកក្នុង១ថ្ងៃ បើចេះផលិតចំណីសត្វខ្លួនឯង

បទយកការណ៍ / បទសម្ភាសន៍

កម្ពុជាអាចចំណេញកន្លះលានដុល្លារអាមេរិកក្នុង១ថ្ងៃ បើចេះផលិតចំណីសត្វខ្លួនឯង

28, Feb 2016 , 3:19 pm

រូបភាព

ដោយ:

ភ្នំពេញ៖ អ្នកជំនាញផលិតចំណីគ្រប់ប្រភេទ បាននិយាយថា បើសិនជាកសិករខ្មែរអាចផលិតចំណីសត្វចិញ្ចឹម ពិសេសគឺចំណីសម្រាប់សត្វជ្រូកដោយខ្លួនឯង កម្ពុជាអាចចំណេញថវិកាកន្លះលានដុល្លារអាមេរិក ក្នុងមួយថ្ងៃ។ លោក ចាន់ សុភក្ត្រ អ្នកជំនាញផលិតចំណីសត្វបានបន្តថា កសិករអាចផលិតចំណីធម្មជាតិដែលមានគុណភាពមិនចាញ់ចំណីលើទីផ្សារឡើយ ហើយចំណាយតិច តែចំណេញពី ៣០ ទៅ ៤០ភាគរយ។ លោកថា កសិករចំណាយជាង ៧០០ដុល្លារសម្រាប់ទិញ និងដំឡើងឧបករណ៍ផលិតផ្ទាល់ខ្លួន ហើយលទ្ធភាពផលិតចំណីសត្វបានពី ៦០០ ទៅ ៨០០គីឡូក្រាម ក្នុងមួយថ្ងៃ។ ហើយថា តាមរយៈនេះ កម្ពុជាអាចកាត់បន្ថយការនាំចំណី និងសាច់សត្វពីប្រទេសច្រើន។

«បើយើងនាំគ្នាអត់ទិញផលិតផលចំណីសត្វដែលគេនាំចូល ពីក្រុមហ៊ុនបរទេសមកផលិតក្នុងស្រុក ប៉ុន្តែខ្មែរយើងអាចធ្វើបានខ្លួនឯង គុណភាពដូចគ្នា យើងជួយទិញហើយ ឲ្យលុយហ្នឹង នៅក្នុងប្រទេសរបស់យើង គឺលុយអត់ចេញទៅក្រៅទេ»។ នេះជាការពន្យល់របស់លោក សុភក្ត្រ។

លោក ចាន់ សុភក្ត្រ និយាយយោងតាមរបាយការណ៍ស្រាវជ្រាពីតម្រូវការ និងការផ្គត់ផ្គង់ចំណីសត្វនៅកម្ពុជារបស់អង្គការ DAI ក្រោមជំនួយទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) ក្នុងឆ្នាំ ២០១២ ថា កសិករកម្ពុជាត្រូវការចំណីសត្វ ២ពាន់តោនថ្ងៃមួយ ប្រមាណ ៧សែនតោនក្នុងមួយឆ្នាំ ហើយបើ ចំណី ១តោន តម្លៃជាង ៥០០លានដុល្លារនោះ លោកថា កម្ពុជាត្រូវចំណាយជាង ១លានដុល្លារ សម្រាប់ទិញចំណីសត្វពីបរទេស ក្នុងមួយថ្ងៃ មានន័យថា លុយជាង ១លានដុល្លារត្រូវបានធ្លាក់ចូលក្នុងហោប៉ៅបរទេសក្នុងមួយថ្ងៃ។ លោកថា ចំណីសត្វ ៦០ភាគរយ នាំចូលពីបរទេស និង ៤០ភាគរយ ជាចំណីសត្វដែលផលិតដោយក្រុមហ៊ុនបរទេសក្នុងស្រុក ប៉ុន្តែលោកថា បើខ្មែរអាចផលិតបាន ៥០ភាគរយនោះ ខ្មែរននឹងសល់ថវិកា កន្លះលានដុល្លារអាមេរិកក្នុងមួយថ្ងៃ។ លោកថា លោកនឹងបង្រៀនពលរដ្ឋពីរូបមន្តផលិតចំណីសត្វដោយឥតគិតថ្លៃ។

ដើម្បីជ្រាបព័ត៌មានលម្អិត សូមលោកអ្នកស្តាប់បទសម្ភាសន៍រវាងលោក រឿន ភារុន អ្នកសារព័ត៌មានអេឡិចត្រូនិកថ្មីៗ និងលោក ចាន់ សុភក្ត្រ ប្រធាននាយកប្រតិបត្តិ ក្រុមហ៊ុន Angkor Green Investment and Development (AGID) ដូចតទៅ៖