ជាតិ
លោក បេអាត រិចឆ្នឺរ ស្នើក្រសួងរៀបចំការប្រឡងវេជ្ជបណ្ឌិត និងបិទគ្លីនិកដែលវេជ្ជបណ្ឌិតប្រឡងធ្លាក់
× ភ្នំពេញ៖ ស្ថាបនិក និងជាប្រធានមន្ទីរពេទ្យគន្ធបុប្ផា លោក បេអាត រិចឆ្នឺរ (Beat Richner) បានស្នើឲ្យក្រសួងសុខាភិបាល គិតគូររៀបចំការប្រឡងត្រួតពិនិត្យវេជ្ជបណ្ឌិត ដែលកំពុងបម្រើការនៅតាមគ្លីនិកឯកជន និង បិទគ្លីនិកឯកជនទាំងឡាយណា ដែលមានវេជ្ជបណ្ឌិតមិនបានប្រឡងជាប់។
ការស្នើរបស់ប្រធានមន្ទីរពេទ្យជួយសង្គ្រោះកុមារកម្ពុជាដ៏ល្បីឈ្មោះរូបនេះ គឺធ្វើឡើងបន្ទាប់ពីមានកុមារឈឺធ្ងន់ចំនួន៤៤៧នាក់ ត្រូវគេបញ្ជូនមកព្យាបាលនៅមន្ទីរពេទ្យគន្ធបុប្ផា កាលពីថ្ងៃទី៣០ កក្កដា និងនៅយប់ថ្ងៃទី៣០ឈានចូលថ្ងៃទី៣១ ខែកក្កដា មានកុមារឈឺធ្ងន់បំផុតចំនួន១៤៦នាក់ ពុំបានព្យាបាលឲ្យបានត្រឹមត្រូវ ពីគ្លីនិកឯកជន និងមន្ទីរពេទ្យបង្អែកមួយចំនួន ដោយបញ្ជូនមកព្យាបាលនៅមន្ទីរពេទ្យគន្ធបុប្ផា។ ករណីខាងលើនេះ ត្រូវបានលោក រិចឆ្នឺរ អះអាងថា កុមារទាំងអស់នេះ គឺមានជំងឺគ្រុនឈាមធ្ងន់ធ្ងរ ដែលបញ្ជូនពីគ្លីនិកឯកជន និងមន្ទីរពេទ្យបង្អែក ដោយពុំបានព្យាបាលឲ្យបានត្រឹមត្រូវនោះទេ។ នេះបើយោងតាមលិខិតរបស់លោក រិចឆ្នឺរ ស្ថាបនិក និងជាប្រធានមន្ទីរពេទ្យគន្ធបុប្ផា ដែលបានបង្ហោះក្នុងទំព័រហ្វេសប៊ុកផ្លូវការរបស់លោកនៅថ្ងៃនេះ។
លិខិតដដែលបានឲ្យដឹងថា មន្ទីរពេទ្យគន្ធបុប្ផា បានចំណាយថវិកាយ៉ាងច្រើន សម្រាប់អ្នកជំងឺជាច្រើន ដែលបានបញ្ជូនពីខាងក្រៅ ដោយសារទីនោះ ពុំបានធ្វើរោគវិនិច្ឆ័យ និងព្យាបាលត្រឹមត្រូវ ហើយទុកអ្នកជំងឺយូរថ្ងៃពេក ក្នុងបំណងទារប្រាក់ពីអ្នកជំងឺ។ ហេតុនេះ ទើបលោករិចឆ្នឺរ បានសំណូមពរដល់ក្រសួងសុខាភិបាលយ៉ាងដូច្នេះ៖«ក្នុងនាមខ្ញុំ ជាទីប្រឹក្សានៃក្រសួងសុខាភិបាល ខ្ញុំសូមសំណូមពរ ដល់ក្រសួងសុខាភិបាល គិតគូររៀបចំការប្រឡងត្រូតពិនិត្យចំពោះវេជ្ជបណ្ឌិត ដែលកំពុងប្រកបវិជ្ជាជីវៈ នៅឯគ្លីនិកឯកជន។ បើពួកគេពុំបានប្រឡងជាប់ក្នុងការត្រួតពិនិត្យនោះទេ គ្លីនិកឯកជនរបស់គេ នឹងត្រូវបិទ មិនឲ្យប្រកបវិជ្ជាជីវៈទៀតទៅ»។
គួរបញ្ជាក់ថា មន្ទីរពេទ្យគន្ធបុប្ផា ពុំមានបុគ្គលិកណាម្នាក់ឆ្លៀតធ្វើការក្រៅម៉ោងនៅគ្លីនិកឯកជន និងពុំមានបុគ្គលិកណាម្នាក់ទារប្រាក់ពីអ្នកជំងឺឡើយ។ ជាងនេះទៅទៀត មន្ទីរពេទ្យដ៏ល្បីល្បាញមួយនេះ នៅតែបង្ហាញតម្លៃនៃការចំណាយធៀបនឹងអត្រាជាសះស្បើយបានល្អបំផុតជាសាកល និងគ្មានអំពើពុករលួយ៕
Tag:
Beat Richner
គន្ធបុប្ផា
© រក្សាសិទ្ធិដោយ thmeythmey.com