ជាតិ
អ្នកនាំពាក្យរដ្ឋសភា ទាមទារឲ្យតំណាងរាស្ត្រអូស្ត្រាលីមានដើមកំណើតខ្មែរសុំទោស
×
ភ្នំពេញ៖ អ្នកនាំពាក្យរដ្ឋសភាកម្ពុជា បានចេញសេចក្តីប្រកាសមួយ ជុំវិញការលើកឡើងរបស់លោក ហុង លីម តំណាងរាស្ត្ររដ្ឋសភានៃប្រទេសអូស្រា្តលី មានដើមកំណើតជាខ្មែរ ដែលបានចាត់ទុកប្រទេសកម្ពុជាបច្ចុប្បន្ន ថាមានលក្ខណៈដូចជា «តិរច្ឆាន»។ ស្ថាប័នកំពូលមួយនេះ បានហៅ ការលើកឡើងរបស់លោក ហុង លីម ថាជាការប្រមាថយ៉ាងធ្ងន់ធ្ងរ ដល់ប្រជាជនខ្មែរទាំងមូល។
តាមរយៈសេចក្តីប្រកាសរបស់ខ្លួន អ្នកនាំពាក្យរដ្ឋសភាពកម្ពុជា បានថ្កោលទោសយ៉ាងដាច់អហង្ការ ហើយទាមទារឲ្យលោក លោក ហុង លីម ចេញមុខសុំទោសជាសាធារណៈ ចំពោះពាក្យសម្តីរបស់ខ្លួន ដែលអ្នកនាំពាក្យរដ្ឋសភាអះអាងថា លោក ហុង លីម បាននិយាយនៅវិទ្យុអាស៊ីសេរីថា «ការរស់នៅរបស់ប្រជាជនខ្មែរសព្វថ្ងៃមានលក្ខណៈជាតិរច្ឆាន»។
អ្នកនាំពាក្យរដ្ឋសភា បានលើកឡើងថា ទស្សនៈរបស់លោក ហុង លីម តំណាងរាស្ត្រអូស្ត្រាលី មានដើមកំណើតខ្មែរ ផ្ទុយស្រឡះនឹងសច្ចភាព ហើយមិនព្រមទទួលយកការពិត ដែលប្រទេសកម្ពុជា ទទួលបានសន្តិភាព និងរីកចម្រើនផ្នែកប្រជាធិបតេយ្យ ព្រមទាំងមានការអភិវឌ្ឍ ចាប់តាំងពីឆ្នាំ១៩៩៣មក។ លើសពីនេះ រដ្ឋសភាកម្ពុជា ក៏បានវាយបកទៅវិញថា លោក ហុង លីម មិនត្រឹមតែ មិនជួយជ្រោមជ្រែងប្រទេសជាតិប៉ុណ្ណោះទេ តែបែរជាបន្តុះបង្អាប់កម្ពុជា ដែលជាស្រុកដើមកំណើតរបស់ខ្លួនថែមទៀត។
ក្រៅពីរដ្ឋសភា មន្ត្រីរដ្ឋាភិបាលជាន់ខ្ពស់រដ្ឋាភិបាលមួយចំនួន ក៏ខឹងសម្បារនឹងការវាយប្រហាររបស់ លោក ហុង លីម បែបនេះ។ មន្ត្រីជាន់ខ្ពស់នៃរដ្ឋាភិបាល បានទាមទារឲ្យលោក ហុង លីម ចេញមុខសុំទោសជាសាធារណៈ ដូចអ្វីដែលរដ្ឋសភា ទាមទារដែរ។
កាលពីថ្ងៃទី ៤ ខែសីហា ឆ្នាំ២០១៦ លោក ហុង លីម បានផ្តល់បទសម្ភាសជាមួយវិទ្យុអាស៊ីសេរី ជុំវិញឃាតកម្មលើលោក កែម ឡី អ្នកវិភាគនយោបាយ និងជាអ្នកស្រាវជ្រាវការអភិវឌ្ឍសង្គម។ លោក ហុង លីម មានការតក់ស្លុត និងសោកស្តាយជាពន់ពេក ចំពោះការបាត់បង់លោក កែម ឡី ដែលលោក លើកតម្កើងថា ជាអ្នកស្នេហាជាតិ និងជាអ្នកមានចំណេះដឹងខ្ពង់ខ្ពស់មួយរូប។
តំណាងរាស្ត្រអូស្ត្រាលី ដែលមានដើមកំណើតជាខ្មែររូបនេះ មានការហួសចិត្តយ៉ាងខ្លាំង ដោយលោក មិននឹងស្មានថា លោក កែម ឡី ត្រូវបានគេបាញ់សម្លាប់យ៉ាងសាហាវយង់ឃ្នងដូច្នេះ។
ដោយសារតែមរណភាពរបស់កែម ឡី លោក ហុង លីម ក៏បានចាត់ទុកកម្ពុជាសព្វថ្ងៃបែបនេះថា៖« យើងសង្ឃឹមថា ឃាតកម្មលើគាត់ហ្នឹង (លោក កែម ឡី) នឹងធ្វើឲ្យយើងមានចិត្តតស៊ូឡើង ពីព្រោះជាតិយើង ស្រុកយើង ត្រូវថ្លៃថ្នូរ ត្រូវសម្បូរសប្បាយជាងនេះ មិនត្រូវមានលក្ខណៈ របៀបដូចជា តិរច្ឆានដូចសព្វថ្ងៃនេះទេ»៕
© រក្សាសិទ្ធិដោយ thmeythmey.com