ក្លិបកីឡាបាល់ទាត់ភ្នំពេញក្រោននៅថ្ងៃទី២៤ ខែសីហា នេះ បានចេញសេចក្តីប្រកាសព័ត៌មានទាក់ទងនឹងការឈ្នះក្តីក្នុងការប្តឹងឧទ្ធរណ៍ប្រឆាំងការដកសិទ្ធិខ្លួនចូលរួមប្រកួតពានរង្វាន់ AFC Cup 2017 ។ ភ្នំពេញក្រោនបានអះអាងថា ខ្លួនត្រូវបានអនុញ្ញាតឲ្យក្លាយជាបេក្ខភាពពេញសិទ្ធិដើម្បីចូលរួមក្នុងការប្រកួត 2017 AFC Cup វិញហើយក្រោយការឈ្នះក្នុងការប្តឹងឧទ្ធរណ៍ទៅកាន់ស្ថាប័នឯករាជ្យដែលមានឈ្មោះថា Court of Arbitration for Sport (CAS) រួចមក។
កាលថ្ងៃទី២០ ខែឧសភា ឆ្នាំ២០១៦ កន្លងទៅ សហព័ន្ធកីឡាបាល់ទាត់អាស៊ី (AFC) បានប្រកាសថា ក្លឹបភ្នំពេញក្រោន ត្រូវបានដកសិទ្ធិក្នុងការចូលរួមប្រកួតពានរង្វាន់ AFC Cup 2017 បើទោះបីជាក្លឹបរបស់យើងគឺជាជើងឯកលីកកំពូលនៃប្រទេសកម្ពុជាឆ្នាំ២០១៥ ក៏ដោយ។
ក្រោយការប្រកាសនេះ ក្លឹបភ្នំពេញក្រោន បានធ្វើការប្តឹងជំទាស់នឹងសេចក្តីសម្រេចរបស់ AFC ទៅកាន់ស្ថាប័ន Court of Arbitration for Sport (CAS) នៅប្រទេសស្វីស កាលពីថ្ងៃទី៣ ខែមិថុនា ឆ្នាំ២០១៦។ «ឆ្លងកាត់ការពិនិត្យស៊ើបអង្កេតយ៉ាងដិតដល់ ស្ថាប័ន CAS ដែលមានទីស្នាក់ការនៅទីក្រុង Lausanne ប្រទេសស្វីស បានចេញសេចក្តីសម្រេចមួយកាលថ្ងៃទី១៩ ខែសីហា ឆ្នាំ២០១៦ថ្មីៗនេះ ដោយបានច្រានចោលសេចក្តីសម្រេចរបស់សហព័ន្ធកីឡាបាល់ទាត់អាស៊ី AFC ហើយបានតម្រូវឲ្យ AFC ផ្តល់សិទ្ធិទៅឲ្យក្លឹបភ្នំពេញក្រោនជាផ្លូវការវិញដើម្បីចូលរួមក្នុងការប្រកួត AFC Cup 2017»។ នេះបើតាមការប្រកាសរបស់ភ្នំពេញក្រោន។
ភ្នំពេញក្រោនបានអះអាងថា ពួកគេនឹងចូលរួមប្រកួតវគ្គ Playoff Stage ដែលអាចធ្វើឡើងនៅខែកុម្ភៈ ឆ្នាំ២០១៧ ខាងមុខនេះ។ លោក Andy Brouwer មន្ត្រីព័ត៌មាននៃក្លិបជើងឯកកំពូលឆ្នាំ២០១៥ បានសរសេរបន្ថែមថា «ជាមួយគ្នានេះដែរ ថ្នាក់ដឹកនាំក្លឹបបាល់ទាត់ភ្នំពេញក្រោន សូមថ្លែងអំណរគុណយ៉ាងជ្រាលជ្រៅដល់ CAS Arbitration Panel ដែលបានបំពេញការងារយ៉ាងសុក្រឹតក្នុងការវិនិច្ឆ័យដោយយុត្តធម៌លើបណ្តឹងនេះ ព្រមទាំងសូមអរគុណចំពោះលោកមេធាវី David Casserly និងលោក Jose Luis Andrade ដែលបានខិតខំការពារក្តីយ៉ាងស្វិតស្វាញ និងប្រកបដោយវិជ្ជាជីវៈរហូតសម្រេចបាននូវលទ្ធផលដ៏ល្អប្រសើរនេះ»។
សូមបញ្ជាក់ផងដែរ ក្រោយការបដិសេធសិទ្ធិចូលរួមរបស់ភ្នំពេញក្រោន AFC បានជ្រើសរើសយកក្លិបណាហ្គាវើល ដែលជាជើងឯករង ចូលលេងជំនួសនៅវគ្គ Qualifying Stage ដោយស្ថិតនៅពូល B ជាមួយម្ចាស់ផ្ទះ Erchim របស់ម៉ុងហ្គោលី និង Three Star Club របស់នេប៉ាល់។
កាលពីថ្ងៃទី២៣ ខែសីហា ណាហ្គាវើល បានបញ្ចប់ការប្រកួតក្នុងលទ្ធផលស្មើ ១-១ ជាមួយ Three Star Club ហើយនៅថ្ងៃទី២៥ ខែសីហា ពួកគេត្រូវតទល់ជាមួយម្ចាស់ Erchim ។ Erchim បានចាញ់ Three Star Club ២-០ ហើយណាហ្គាវើលរំពឹងទទួលជ័យជម្នះជាមួយនឹងគ្រាប់បាល់បញ្ចូលទីមានប្រៀបលើសពីពីរគ្រាប់ដើម្បីទទួលបានកៅអីទៅកាន់វគ្គ Preliminary Stage ដែលមានការប្រកួតពីរជុំ។
បន្ទាប់ពីវគ្គ Preliminary Stage នាអំឡុងខែមករា ខាងមុខ គេឈានដល់វគ្គ Playoff Stage នាខែកុម្ភៈ ឆ្នាំ២០១៧ ដែលភ្នំពេញក្រោនទទួលបានសិទ្ធិចូលរួម ប៉ុន្តែគេមិនទាន់ដឹងថា AFC នឹងមានការរៀបចំរូបមន្តប្រកួតបែបណានោះឡើយ។
ថ្លែងប្រាប់សារព័ត៌មានថ្មីៗតាមទូរសព្ទ លោក Sam Schweingruber គ្រូបង្វឹកភ្នំពេញក្រោន ដែលទទួលបានសញ្ជាតិខ្មែរក្រោមឈ្មោះថា សែម សំណាង បានបញ្ជាក់ថា ភ្នំពេញក្រោនអាចមានសិទ្ធចូលរួមប្រកួត AFC Cup 2017 តាមរយៈសេចក្តីសម្រេចរបស់តុលា Court of Arbitration for Sport (CAS )ដែលឲ្យក្លិបនេះឈ្នះក្តីលើ AFC ដែលរារាំងមិនឲ្យខ្លួនចូលរួមប្រកួតវគ្គជម្រុះនៅប្រទេសម៉ុងហ្គោលី ហើយសម្រាប់ការចូលរួមប្រកួតប្រកួតពានរង្វាន់ AFC Cup 2017 ភ្នំពេញក្រោនមិនបាច់ប្រកួតវគ្គជម្រុះតាមពូលនោះទេ ដោយឡើងទៅកាន់វគ្គបន្តដោយស្វ័យប្រវត្តិ។
លោកបានបន្ថែមទៀតថា សម្រាប់ក្រុមណាហ្គាវើលដែលកំពុងប្រកួតជម្រុះពានរង្វាន់ AFC Cup 2017 ក្នុងពូល B នៅប្រទេសម៉ុងហ្គោលីប្រសិនបើក្រុមនេះអាចយកឈ្នះក្រុមម្ចាស់ផ្ទះបាននឹងឡើងទៅកាន់វគ្គបន្តដូចគ្នា មានន័យថា ក្លិបបាល់ទាត់កម្ពុជាចំនួនពីរនឹងលេងក្នុងពានរង្វាន់ AFC Cup 2017 រដូវកាលនេះ៕