ជាតិ
អគ្គស្នងការដ្ឋាននគរបាលជាតិចង់បង្កើតនាយកដ្ឋានបង្ក្រាបល្បែងស៊ីសង
× ភ្នំពេញ៖ អគ្គស្នងការដ្ឋាននគរបាលជាតិ បានស្នើក្រសួងមហាផ្ទៃ ឲ្យបង្កើតនាយកដ្ឋានបង្ក្រាបល្បែងស៊ីសង ក្នុងគោលដៅ បង្ក្រាបបទល្មើសខុសច្បាប់មួយនេះឲ្យកាន់តែមានប្រសិទ្ធភាព។ តាមរយៈសុន្ទរកថាមួយកាលពីព្រឹកថ្ងៃទី២៦ ខែតុលា លោក គៀត ច័ន្ទថារិទ្ធិ អ្នកនាំពាក្យ និងជាអគ្គស្នងការរងនគរបាលជាតិផងដែរនោះ បានលើកយកបញ្ហានេះ ប្រាប់ទៅសម្តេច ស ខេង រដ្ឋមន្ត្រីក្រសួងមហាផ្ទៃ។
លោក គៀត ច័ន្ទថារិទ្ធិ បានសង្កេតឃើញថា អាជីវកម្មល្បែងខុសច្បាប់គ្រប់ប្រភេទ កំពុងកើតឡើងគួរឲ្យកត់សម្គាល់ក្នុងរាជធានី ខេត្តមួយចំនួន។ ល្បែងស៊ីសងទាំងនោះ រួមមាន ល្បែងអ៊ីនធឺណេត២៤ម៉ោង ឆ្នោតកន្ទុយលេខខុសច្បាប់ ល្បែងជល់មាន់ ល្បែងភ្នាល់ទឹកភ្លៀង ល្បែងបាញ់ត្រី និងល្បែងស៊ីសង ជ្រកក្រោមល្បែងក្មេងលេង ព្រមទាំងអាជីវកម្មបញ្ចាំ គ្មានអាជ្ញាបណ្ណពីក្រសួងសេដ្ឋកិច្ចជាដើម។
អ្នកនាំពាក្យរូបនេះ បានបន្តលើកឡើងពីប៉ះពាល់នៃបទល្មើសល្បែងស៊ីសងទាំងនេះ នាំឲ្យប៉ះពាល់ដល់សន្តិសុខសណ្តាប់ធ្នាប់ សាធារណៈ និងសុវត្ថិភាពសង្គម ព្រមទាំងការសិក្សារបស់កុមារទៀតផង។
ថ្លែងក្នុងពិធីបើកកិច្ចប្រជុំផ្សព្វផ្សាយសេចក្ដីណែនាំស្ដីពីការអនុវត្តវិធានការបង្ក្រាបល្បែងស៊ីសងខុសច្បាប់ នៅថ្ងៃនេះ លោក គៀត ច័ន្ទថារិទ្ធិ ដែលជាអគ្គស្នងការរងនគរបាលជាតិផងដែរនោះ មើលឃើញថា ការបង្ក្រាបបទល្មើសល្បែង ស៊ីសងខុសច្បាប់នៅពុំទាន់មានប្រសិទ្ធភាពខ្លាំងនៅឡើយ។ ហេតុថា សកម្មភាពល្បែង ខុសច្បាប់ទាំងនោះមានលក្ខណៈលួចលាក់ខ្លាំង។
តាំងនាមឲ្យស្ថាប័នអគ្គស្នងការនគរបាលជាតិ លោកគៀត ច័ន្ទថារិទ្ធិ បានស្នើរដ្ឋមន្ត្រីក្រសួងមហាផ្ទៃ ចំពោះមុខតំណាងអាជ្ញាធរមានសមត្ថកិច្ចគ្រប់រាជធានីខេត្ត ឲ្យបង្កើតនាយកដ្ឋានបង្ក្រាបល្បែងស៊ីសងខុសច្បាប់ ដើម្បីការអនុវត្តច្បាប់ និងសេចក្តីណែនាំ ស្ដីពីការបង្ក្រាបល្បែងស៊ីសងខុសច្បាប់ កាន់តែប្រសើរឡើង។ សេចក្តីណែនាំអន្តរក្រសួងមហាផ្ទៃ និងក្រសួងសេដ្ឋកិច្ច ចុះកាលពីខែកញ្ញា ឆ្នាំ២០១៦ កន្លងទៅនេះ។
យ៉ាងណាជាការឆ្លើយតបនឹងបញ្ហានេះ សម្តេចឧបនាយករដ្ឋមន្ត្រី ស ខេង គ្រាន់តែបានជំរុញនគរបាលពាក់ព័ន្ធទាំងអស់ ឲ្យបង្កើនការបង្ក្រាបបទល្មើសល្បែងស៊ីសងខុសច្បាប់ទាំងនេះថែមទៀត ដោយស្មើភាពគ្នាចំពោះមុខច្បាប់។ លើសពីនេះទៀត សម្តេចបានណែនាំមន្ត្រីជំនាញសិក្សាដកពិសោធន៍ពីការបង្ក្រាបបទល្មើសល្បែងស៊ីសងទាំងនេះពីប្រទេសអភិវឌ្ឍមួយចំនួន ដោយសម្តេចលើកឡើងពីប្រទេស ចិន សិង្ហបុរី និងអាមេរិក ជាដើម។ ហើយសម្តេច ស ខេង អះអាង សម្តេចនឹងដឹកនាំការងារនេះដោយផ្ទាល់ ចាប់ពីពេលនេះតទៅ។
ក្រោយពីកម្ពុជាបង្កើតច្បាប់ស្តីពី ការបង្ក្រាបល្បែងស៊ីសង ឆ្នាំ១៩៩៦ មក រដ្ឋាភិបាលបានអនុញ្ញាតឲ្យបើកកន្លែងល្បែងស៊ីបានបណ្តាខេត្តឆ្ងាយពីរាជធានីភ្នំពេញ លើកលែងតែកាស៊ីណូ ណាហ្គាវើល តែប៉ុណ្ណោះ។ តាមលោក គៀត ច័ន្ទថារិទ្ធិ គិតត្រឹមត្រីមាសទី៣ ឆ្នាំ២០១៦នេះ រដ្ឋាភិបាលបានអនុញ្ញាតឲ្យក្រុមហ៊ុនកាស៊ីណូចំនួន ១៦៨ ក្នុងនោះ ៦៥ តាមអនឡាញ ធ្វើអាជីវកម្ម និងបង់ពន្ធស្របច្បាប់នៅកម្ពុជា៕
Tag:
គៀត ច័ន្ទថារិទ្ធិ
ល្បែងស៊ីសង
© រក្សាសិទ្ធិដោយ thmeythmey.com