អាមេរិក និងកាតាជាឈ្មួញនិងម៉ូយអាវុធធំជាងគេក្នុងទីផ្សាសព្វាវុធឆ្នាំ២០១៥

អន្តរជាតិ

នយោបាយអន្តរជាតិ

អាមេរិក និងកាតាជាឈ្មួញនិងម៉ូយអាវុធធំជាងគេក្នុងទីផ្សាសព្វាវុធឆ្នាំ២០១៥

29, Dec 2016 , 12:00 pm

រូបភាព

ដោយ: សៅ ផលនិស្ស័យ (Sao Phal Niseiy)

សហរដ្ឋអាមេរិកនៅតែជាប្រទេសដែលនាំមុខគេក្នុងការលក់សព្វាវុធក្នុងទីផ្សាអាវុធអន្តរជាតិក្នុងឆ្នាំ ២០១៥។ អាវុធដែលអាមេរិកលក់មានទំហំ ៤០ ពាន់លានដុល្លារ ដែលស្មើនឹងពាក់កណ្តាលនៃតម្លៃអាវុធដែលគេជួញដូរក្នុងទីផ្សារអន្តរជាតិសរុប។ ចំណែកប្រទេសមហាអំណាចបារាំង ស្ថិតនៅលេខរៀងបន្ទាប់ពីអាមេរិក។

ឆ្នាំ ២០១៥ អាមេរិកនៅតែជាមហាអំណាចដែលនាំអាវុធចេញច្រើនជាងគេលើពិភពលោក។ របាយការណ៍ស្រាវជ្រាវស្តីពីការផ្ទេរអាវុធរបស់សភា (Congressional Research Service) បានបង្ហាញថា តម្លៃអាវុធដែលអាមេរិកលក់ចេញឆ្នាំ ២០១៥ មានទំហំ ៤០ ពាន់លានដុល្លារ ដែលវាស្មើនឹងពាក់កណ្តាលនៃតម្លៃអាវុធដែលនាំចេញសរុបទូទាំងពិភពលោកឯណោះ។

យ៉ាងណាក៏ដោយ តម្លៃអាវុធដែលទិញលក់នៅក្នុងទីផ្សារអន្តរជាតិឆ្នាំ ២០១៥ បានធ្លាក់ចុះដែរ ពី ៨៩ ពាន់លានដុល្លារមកត្រឹម ៨០ពាន់លានដុល្លារប៉ុណ្ណោះ។ គេដឹងច្បាស់ថា ការធ្លាក់ចុះនេះក៏បណ្តាលមកពីតម្លៃប្រេងឆៅធ្លាក់ចុះខ្លាំងក្នុងពេលកន្លងមក ដែលរដ្ឋផលិតប្រេងមួយចំនួនត្រូវបន្ថយលុយទិញអាវុធ។ អ្វីដែលគួរឲ្យបារម្ភនោះជម្លោះប្រដាប់អាវុធនិងចលនាភេរវកម្មកើនឡើង មិនមានការថមថយសោះ ថ្វីបើការលក់អាវុធលើទីផ្សារពិភពលោកថយចុះដូច្នេះក្តី។

ក្រៅពីអាមេរិកស្ថិតនៅលំដាប់ថ្នាក់ទី ១ជារដ្ឋលក់អាវុធចេញធំជាងគេ បារាំងឯណោះក៏មិនអន់ដែរ។ មហាណាចមួយនេះស្ថិតនៅលំដាប់ថ្នាក់ទី២ដោយនាំចេញអាវុធក្នុងទំហំទឹកប្រាក់ ១៥ពាន់លានដុល្លារអាមេរិកប៉ុណ្ណោះ។

ចំណូលនៃការលក់អាវុធទៅកាន់ទីផ្សារអន្តរជាតិរបស់មហាអំណាចទាំងពីរកើនឡើងខ្លាំងដែរបើប្រៀបធៀបឆ្នាំ ២០១៤។ ថវិកាដែលបានពីការលក់អាវុធដែលអាមេរិករកបានកើនឡើង ៤ពាន់លានដុល្លារ ខណៈដែលថវិកាបារាំងកើនឡើងច្រើន ៩ពាន់លានដុល្លារឯណោះ។

ក្រៅពីផ្តោតលើប្រទេសដែលនាំចេញអាវុធច្រើនលើសគេ របាយការណ៍នេះក៏ផ្តោតលើអ្នកទិញអាវុធដែរ។ តំណែងរដ្ឋដែលទិញអាវុធចូលច្រើនជាងគេក្នុងឆ្នាំ ២០១៥ បានទៅលើ ប្រទេសកាតា ដោយរដ្ឋអារ៉ាប់នេះចុះកិច្ចព្រមព្រៀងទិញអាវុធក្នុងទំហំទឹកប្រាក់ច្រើនជាង ១៧ពាន់លានដុល្លារ។ ប្រទេសបន្ទាប់គឺ អេហ្ស៊ីប។ ប្រទេសនេះចំណាយលុយទិញអាវុធអស់ប្រហែល ១២ ពាន់លានដុល្លារអាមេរិកឯណោះ។ ចំណែកចំណាត់ថ្នាក់ទីបី បានទៅលើអារ៉ាប៊ីសាអូឌីតដែលជាសេដ្ឋីប្រេងដ៏ធំប្រចាំតំបន់ឈូងសមុទ្រ៕