អាហ្វ្រិកខាងលិចសុំ UN ប្រើកម្លាំងទម្លាក់មេដឹកនាំផ្តាច់ការហ្កំប៊ី Jammeh ពីអំណាច

អន្តរជាតិ

អាហ្វ្រិកខាងលិចសុំ UN ប្រើកម្លាំងទម្លាក់មេដឹកនាំផ្តាច់ការហ្កំប៊ី Jammeh ពីអំណាច

16, Jan 2017 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

មេដឹកនាំអាហ្វ្រិកនិងបារាំងបានអំពាវនាវឲ្យមេដឹកនាំចាញ់ឆ្នោតហ្កំប៊ីចុះចេញពីតំណែងដោយស្ម័គ្រចិត្តនៅថ្ងៃ ១៩ មករាថ្ងៃកំណត់ចុងក្រោយ ដើម្បីឲ្យប្រធានាធិបតីថ្មីស្បថចូលកាន់តំណែង។ តែបណ្តាមេដឹកនាំអាហ្វ្រិកខាងលិចបានទទូចសុំឲ្យក្រុមប្រឹក្សាសន្តិសុខបើកផ្លូវឲ្យមានការប្រើប្រាស់កម្លាំងទម្លាក់ជនផ្តាច់ការនេះតែម្តង បើសិនជាជននេះនៅរឹងរូស។

ក្នុងកិច្ចប្រជុំកំពូលអាហ្វ្រិក-បារាំង បានរៀបចំឡើងនៅក្នុងទីក្រុង Bamako នៃប្រទេសម៉ាលីនៅសប្តាហ៍មុន បណ្តាមេដឹកនាំអាហ្វ្រិកនិងបារាំងបានដង្ហោយជាថ្មីទៅកាន់ប្រធានាធិបតីក្រាញអំណាចហ្កំប៊ី Yahya Jammeh ឲ្យចុះចេញពីតំណែងនៅថ្ងៃ ១៩ មករាខាងមុខ។ បើសិនជាមេដឹកនាំចាញ់ឆ្នោតនេះមិនព្រមចុះចេញដោយស្ម័គ្រចិត្តទេ គេនឹងអាចប្រឈមបញ្ហាផងដែរ។

យោងតាមសារព័ត៌មានអង់គ្លេស BBC មេដឹកនាំហ្កំប៊ី Jammehនៅតែបដិសេធចុះចេញពីតំណែង ទោះខ្លួនចាញ់ឆ្នោតកាលពីថ្ងៃ ១ធ្នូកន្លងមកក៏ដោយ។ លោកបញ្ជាក់ថា លោកនឹងចុះដរាបណាតុលាការកំពូលអាចរកចៅក្រមគ្រប់មកជំនុំជម្រះបណ្តឹងបោះឆ្នោតនៅខែឧសភាខាងមុខសិន។

ប៉ុន្តែការបដិសេធនេះបានបង្កឲ្យមានការខឹងសម្បារពីប្រជាជនហ្កំប៊ី និងមានប្រតិកម្មពីក្រុមប្រទេសអាហ្វ្រិកខាងលិច អាមេរិក និងអឺរ៉ុបផងដែរ។

បណ្តាក្រុមប្រទេសសមាជិកសហគមន៍សេដ្ឋកិច្ចអាហ្រិ្វកខាងលិច(ECOWAS) បានបញ្ចុះបញ្ចូលឲ្យក្រុមប្រឹក្សាសន្តិសុខអង្គការសហប្រជាជាតិសម្រេចអនុម័តឲ្យមានការប្រើប្រាស់កម្លាំងទ័ពដើម្បីបណ្តេញមេដឹកនាំផ្តាច់ការនេះចេញពីតំណែងផងក្នុងករណីដែលជននេះមិនព្រមចុះចេញតាមឱសានវាទ។

មេដឹកនាំប្រទេសអាហ្វ្រិកខាងលិច បានបន្តប្រើប្រាស់វិធីការទូតដើម្បីលួងលោមឲ្យមេដឹកនាំក្រាញអំណាច Jammeh ចុះចេញពីតំណែងដោយស្ម័គ្រចិត្តនិងធានាផ្តល់ការជ្រកកោននយោបាយដល់លោកផង បើសិនជាមានបញ្ហាប្រឈម។ លោក Muhammadu Buhari បានធ្វើដំណើរទៅកាន់រដ្ឋធានា Banjul ប្រទេសហ្កំប៊ី កាលពីសប្តាហ៍មុនដែរ ដើម្បីបញ្ចុះបញ្ចូលឲ្យលោក Jammeh ព្រមលះបង់អំណាច តែមេដឹកនាំកាន់អំណាច២២ឆ្នាំនេះនៅតែទាត់ចោលការស្នើសុំនេះ។

ដោយឡែក បច្ចុប្បន្នប្រធានាធិបតីទើបជាប់ឆ្នោតលោក Adama Barrow បានបន្តស្នាក់នៅប្រទេសសេណេហ្កាល់បណ្ណោះអាសន្នសិនរហូតដល់ថ្ងៃស្បថចូលកាន់តំណែង។ ការស្នាក់នៅបរទេសនេះគឺធ្វើឡើងតាមការស្នើសុំពីបណ្តាមេដឹកនាំប្រទេសអាហ្វ្រិកខាងលិច ហើយវាជាការរក្សាសុវត្ថិភាពមួយសម្រាប់ប្រធានាធិបតីហ្កំប៊ីថ្មី។មកដល់ពេលបច្ចុប្បន្ននេះ ប្រជាជន ហ្កំប៊ីរាប់ពាន់នាក់បានបន្តរត់ភៀសខ្លួនទៅកាន់ប្រទេសផ្សេងទៀតនៅជាប់ព្រំដែនរួចទៅហើយ ដោយសារតែពួកគេបារម្ភពីបញ្ហាអស្ថិរភាពនិងអសន្តិសុខដែលអាចកើតឡើងពេលដែលលោក Jammeh មិនព្រមចុះចេញពីតំណែងថ្ងៃ ១៩មករាខាងមុខ។

សូមបញ្ជាក់ លោក Jammedh ជាមេដឹកនាំផ្តាច់ការដែលកាន់តំណែងអស់ពេល ២២ឆ្នាំមកហើយ។ លោកបានចាញ់ឆ្នោតកាលពីថ្ងៃ ១ខែធ្នូកន្លងទៅ។ ក្រោយដឹងលទ្ធផល លោកបានចេញមុខទទួលស្គាល់បរាជ័យរបស់ខ្លួននៅតាមវិទ្យុរដ្ឋ ដោយលោកអះអាងថា លោកទទួលយកការសម្រេចចិត្តរបស់ប្រជាជនហ្កំប៊ីដែលចង់ឲ្យលោកចាកចេញពីតំណែង។ លោកបញ្ជាក់ថា លោកមិនតវ៉ារឿងលទ្ធផលទេ ហើយលោកនឹងចាកចេញទៅរស់នៅចម្ការសាងជីវភាពថ្មីវិញ ក្រោយផ្ទេរអំណាចខែមករាខាងមុខនេះ។ ប៉ុន្តែមួយសប្តាហ៍ក្រោយមក មេដឹកនាំរូបនេះបានក្រឡាស់សម្តីភ្លាមដោយលុបចោលលទ្ធផលបោះឆ្នោត និងទាមទារបោះឆ្នោតជាថ្មី៕