COVID-19
អន្តរជាតិ
មីយ៉ាន់ម៉ា ចាប់ផ្ដើមកម្មវិធីចាក់វ៉ាក់សាំងកូវីដ-១៩ ដោយប្រើវ៉ាក់សាំងផលិតនៅឥណ្ឌា
ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី កំពុងត្រួតពិនិត្យកម្មវិធីចាក់វ៉ាក់សាំងកូវីដ-១៩ ។ រូបថត AFP
×![]()
ដោយ: តន ចាន់រិទ្ធារ៉ា
មីយ៉ាន់ម៉ា នៅថ្ងៃទី២៧ ខែមករា បានចាប់ផ្ដើមកម្មវិធីផ្ដល់វ៉ាក់សាំងកូវីដ-១៩ របស់ខ្លួនហើយ ដោយអាទិភាពត្រូវបានផ្ដល់ឱ្យក្រុមគ្រូពេទ្យជួរមុខដែលដើរតួនាទីសំខាន់ក្នុងការប្រយុទ្ធនឹងជំងឺនេះ។ រដ្ឋអាស៊ីអាគ្នេយ៍មួយនេះ ប្រើប្រាស់វ៉ាក់សាំងដែលជាអំណោយរបស់រដ្ឋាភិបាលឥណ្ឌា។ 
ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី បានចុះត្រួតពិនិត្យដោយផ្ទាល់ការចាក់វ៉ាក់សាំងកូវីដ-១៩ នៅទីក្រុងពាណិជ្ជកម្មយ៉ាំហ្គោននៅថ្ងៃទី២៧ ខែមករា។ ក្រុមគ្រូពេទ្យ និងអ្នកស្ម័គ្រចិត្តសុខាភិបាល ជាក្រុមអ្នកទទួលបានវ៉ាក់សាំងដំបូងគេ បន្ទាប់មកមានមេដឹកនាំប្រទេស សមាជិកសភា អ្នកស្ម័គ្រចិត្ត និងប្រជាជនមានអាយុលើស៦៥ឆ្នាំ។
វ៉ាក់សាំងដែលត្រូវប្រើនេះ ជាវ៉ាក់សាំងរបស់ក្រុមហ៊ុន AstraZeneca ដែលផលិតនៅឥណ្ឌាផ្ទាល់។ វ៉ាក់សាំងទាំងនេះ ជាអំណោយរបស់រដ្ឋាភិបាលឥណ្ឌាសម្រាប់ប្រទេសជិតខាងរបស់ខ្លួន។ ក្រុងញូវដេលី កំពុងអនុវត្តនយោបាយការទូតវ៉ាក់សាំងដើម្បីពង្រឹងឥទ្ធិពលក្នុងតំបន់ តាមរយៈការផ្ដល់វ៉ាក់សាំងរាប់ម៉ឺនដូសឱ្យប្រទេសនានាដូចជាម៉ាល់ឌីវ ស្រីលង្កា ប៊ូតង់ និងបង់ក្លាដែស ដែលសុទ្ធសឹងជាទីតាំងនៃការប្រកួតប្រជែងភូមិសាស្ត្រនយោបាយជាមួយចិន។
មីយ៉ាន់ម៉ា ទទួលបានវ៉ាក់សាំងដែលផលិតដោយក្រុមហ៊ុនផលិតឱសថដ៏ធំរបស់ពិភពលោក Serum Institute ចំនួន១,៥លានដូសកាលពីសប្ដាហ៍មុន។ ទីក្រុងប៉េកាំង ក៏ប្រកាសផ្ដល់វ៉ាក់សាំងបីសែនដូសឱ្យមីយ៉ាន់ម៉ាដែរ។ បន្ថែមពីនេះ រដ្ឋាភិបាលក្រុងណៃពិដោ ក៏ត្រៀមទិញបន្ថែមទៀតពីប្រភពនានា។ ដើម្បីបង្កើនទំហំទឹកប្រាក់ រដ្ឋាភិបាលមីយ៉ាន់ម៉ាក៏បើកគណនីធនាគារដើម្បីទទួលការបរិច្ចាគពីប្រជាជនផងដែរ។
ជាប្រទេសដែលអាចគ្រប់គ្រងជំងឺកូវីដ-១៩ បានល្អនៅដំណាក់កាលដំបូង មីយ៉ាន់ម៉ា បែរជាប្រឈមមុខការឆ្លងដ៏ច្រើនករណីក្នុងមួយៗថ្ងៃនៅចុងឆ្នាំ២០២០ ។ អាជ្ញាធរបានដាក់ការសង្ស័យលើលំហូរជនភៀសខ្លួនជាដើមហេតុនៃការរាលដាលយ៉ាងរហ័សក្នុងប្រទេស។ ស្ថានភាពហាក់ធូរស្រាលនៅរយៈពេលចុងក្រោយ ដោយករណីឆ្លងប្រចាំថ្ងៃធ្លាក់មកត្រឹមក្រោម៥០០នាក់ក្នុងមួយថ្ងៃៗ។
គិតត្រឹមថ្ងៃទី២៧ ខែមករា មីយ៉ាន់ម៉ា មានករណីឆ្លងសរុបជិត១៤ម៉ឺននាក់ និងស្លាប់ជាងបីពាន់នាក់។ នៅអាស៊ាន ឥណ្ឌូណេស៊ី នៅតែឈរលេខមួយដដែល ជាមួយករណីឆ្លងជាងមួយលាននាក់ទៅហើយឯតិចជាងគេ គឺឡាវដែលមាន៤៤ករណី៕
Tag:
មីយ៉ាន់ម៉ា
កូវីដ-១៩
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
